Ullut pingasut ilungersorfiusut: Angajoqqaat suliffitik qimallugit meeqqatik aasariaqaraat
Sisimiuni angajoqqaat meeqqatik ullut suliffiusut pingasut sinnerlugit meeqqerivimmiit aalleqqullugit kajumissaarneqarput sulisussaaleqineq pissutigalugu. Qeqqata Kommunia naapertorlugu meeqqat 44-t isumaginissaannut sulisut arfineq-marluinnaapput, naak 15-it sulisorineqartussaagaluartut.
Assiliisoq: Tôrtia Reimer-Johansen
Takorloorsinnaaviuk qitornat meeqqeriviliaallugu meeqqat 44-uusut sulisullu arfineq-marluinnaasut?
Tamanna nalinginnaangajattoq oqaatigineqarsinnaavoq.
Meeqqerivinni sulisut amigarmata Sisimiuni angajoqqaat meeqqaminnik aallernissaannik kajumissaarneqarput. Tamanna ulluni pingasuni pivoq, sapaatip akunnerata siuliini.
Qeqqata Kommuniata nassuiaatai naapertorlugit meeqqanut 44-unut sulisut arfineq-marluinnaasimasut, nalinginnaasumik meeqqanut taama amerlatigisunut sulisut 15-usussaapput.
- Malittarisassat malippagut
Qeqqata Kommuniata malittarisassat kommunalbestyrelsimit aalajangiiffigineqarsimasut malillugit ilisimatitsivoq.
Sulisussaaleqinermi allaffissuarmik attavigineqarsinnaasoq ataqatigiissaarissaaq, ullormi meeqqerivinni sulisunik amigarfimmi sulisussarsiornikkut. Iluatsinngippat meeqqeriviit allat attavigineqassapput, tassani sulisut meeqqerivimmut sulisunik amigartoorfiusumut suliartorsinnaanersut aperineqassallutik. Tamanna iluatsinngippat taartaasussarsiortoqassaaq.
Allanik sulisussarsiorneq iluatsinngiivippat periarfissaq kingulleq malinneqassaaq, tassa meeqqanik angerlartitsineq, angajoqqaanik suleqateqarnikkut. Tassa kommunalbestyrelsip malittarisassatut aalajangigaat.
Malittarisassarli taanna angajoqqaanut sulisunut unammillernartitsivoq.
Angajoqqaatut nukillalaarnartoq
Meeqqanik aallertariaqarnermut aqqusaagaqartut ilagaat, Jane Olsen Kreutzmann. Taanna Sisimiut Napparsimavianni niviarsiatut atorfeqarpoq. Taassuma Sermitsiamut oqaluttuaraa meeqqerivimmi sulisunik amigartoqaraangat ernini ataatsimik ukiulik aasariaqartarsimallugu.
Suliffitsinniik ingerlasariaqartarneq nukillalaarnartarpoq, suleqatinullu ajuusaarnartarluni.
- Ataatsimut ukiulimmut anaanaasoq
Jane Olsen Kreutzmannip ataasiarnani misigisarpaa ullaakkut meeqqanukaassigaangami sulisoq ataasiinnaasartoq.
- Ataasiaannarnata meeqqanukaassisarpugut nal.7.45 sulisoq ataasiinnaasoq, neriunnerartoq suleqatini aggiliivissut. Taamatut meeqqanukaassineq toqqisisimanartanngilaq. Meeqqat malugisarpaat angajoqqaat iluaalliortut toqqissisimanngitsullu, taamaasillutik aamma meeqqat toqqissisimajunnaarsinnaallutik ilaat aallaamalersinnaasarlutik.
Taassuma erseqqissaatiga meeqqerivimmi sulisut ajortumik isiginagit aamma ajortumik isigitinniarsarinagit, qullersaqarfianniilli pitsaanerusumik atugassaqartinneqarnissaat kissaatigaluarlugu.
Taassuma ilaatigut apeqqutigaa meeqqerivimmi sulisunut qaangiuttoortarneq atulersinneqarsinnaanersoq kiisalu ajornartorsiut aaqqinniarlugu suliartoqqaartoq suleqatiminik aggertoqarsimanngippat qanoq iliuusissamik allassimasoqarsimannginnersoq.
Qeqqata Kommuniata paasissutissiissutigaa angajoqqaat suliffeqanngikkallartut soraajaartartullu sianerfigalugit siulliunneqartartut, naliginnaasumillu angajoqqaat sianerfigigaanni kaammattuinerusoq pingitsaaliissutaaneq ajorluni aalleqqusaaneq.
