Ulluunerani paaqqinnittarfiit pillugit malittarisassat ingerlatsiviup allanngortinniarpai

Meeqqanut Atuarfeqarnermullu Ingerlatsivik aalajangiisuuppat, assersuutigalugu meeraq siusinnerpaamik arfineq-marlunnik qaammateqalereerpat ulluunerani paaqqinnittarfimmut innersuunneqarsinnaalissaaq. Ullumikkut qaammatit arfinilinnut inissitaavoq. Erninermut atatillugu sulinngiffeqarneq 2020-mi sivitsorneqarneranik tamanna tunngavilersuutigineqarpoq.

Kommunini allani apersuinermi paasineqarpoq „kommunimi ataatsimi qaammatit arfinillit, kommunimi allami qaammatit arfineq-marlunni qaammatillu affaani kommuninilu marlunni qaammatit arfineq-pingasut killiliussaasut“.

Meeqqap qaammammi tassani qaammatinik tallimaqalerfissaani utaqqisunut allattorsimaffimmut ilanngunneqarnissamik angajoqqaat qinnuteqarsinnaanissaat aammattaaq pilersaarutaavoq. Ullumikkut qaammammi meeqqap pingasunik qaammateqalerfiani taamaaliortoqarsinnaavoq.

Qujaannarneq

Malittarisassani allannguut alla tassaavoq angajoqqaat neqeroorummut naaggaarsinnaanissaat, utaqqisut allattorsimaffianni inissisimanerat qanorlu sivisutigisumik allatseqqanerat allanngunngikkaluarluni.

Aammattaaq utaqqisut allattorsimaffiannut tunngatillugu ingerlatsivik nutaamik najoqqutassiivoq, taamaalilluni meeqqat ilaat ulluunerani neqeroorutinut inissaminnut allanut sanilliullugit pingaarnerutinneqartalissapput. Ingerlatsiviup misilittagai tunngavigalugit immikkoortut arfineq-marluk — A-miit G-mut — ima nassuiarneqarput:

1. Eqimattat A: (Meeqqat immikkut pisariaqartitsisut) Meeqqat §12, imm. 2 aamma §3 imm. 4, naapertorlugit Meeqqanut Ilaqutariinnullu Ingerlatsivimmit innersuunneqartut, perorsaanikkut immikkut pisariaqartitsinerat imaluunniit pissutsit allat tunngavigalugit meeqqap ineriartornera aarlerinartorsiortinneqarpat. 2. Eqimattat B: Meeqqat, ulluunerani maannakkut neqeroorutini atuisut, ukiutik tunngavigalugit nuuttussat.
3. Eqimattat C: Nuummi ilinniartut meerai – ilinniartut nassuiarneqarput ima; angajoqqaaq kisimiittoq ilinniartoq imaluunniit aappariit tamarmik ilinniakkamik ingerlatsisut, immikkut isumaqatigiissut naapertorlugu.
4. Eqimattat D: Meeqqat ulluunerani neqeroorutinit utaqqiisaasumik anisikkallarnikut anigallarnerullu piffissaliussap naanissaata tungaanut utaqqisut.
5. Eqimattat E: Meeqqat ulluunerani neqeroorutiniinngitsut eqimattanilu A-D/F-G-mi piumasaqaatinik naammassinninngitsut.
6. Eqimattat F: Kommuneqarfik Sermersuup iluani nammineq illoqarfigisami/nunaqarfigisami neqeroorutini allamut nuunneq, Meeqqeriveqarnermut immikkoortortamit akuerineqartoq.

Allannguutinut pissutaasoq

Perorsaanikkut inerikkiartuutaasunik ulluunerani neqeroorutinut malittarisassat allanngortinneqarnerannut pissutaasoq „innuttaasut pitsaanerusumik kiffartuunneqarsinnaalernissaannik sulinerullu pisariillisarneqarnissaanik“ nassuiarneqarpoq.

Ataatsimiititaliami politikkerit malittarisassat nutaat akuerisinnaappatigit, suliaq Aningaasaqarnermut Inuussutissarsiornermullu Ataatsimiititaliamut kommunalbestyrelsimullu ingerlateqqinneqassaaq, taakkualu inaarutaasumik akuerissavaat.

Najoqqutassiat nutaat uani takukkit