Ulluunerani paaqqinnittarfinni akit Qeqertalimmi qummut killilerneqassapput
Kommune Qeqertalimmi partiit suleqatigiit aalajangiuppaat angajoqqaat meeqqerivinni meeqqerivinnilu akiliutaat 2026-mi atuutilertumik 1.000 koruuninut qummut killilerneqassasoq. Taamatut iliorneq siusinnerusukkut Qeqqata Kommunianit atuutsinneqalereernikuuvoq.
Assiliisoq: Jensine Berthelsen
Siulliullutik Qeqqata Kommuniani 2021-imi aalajangerput angajoqqaat meeqqatik meeraaqqerivimmi imaluunniit meeqqerivimmi inissisimanerannut akiliuteqartarnissaat 1.000 koruuninik qummut killeqartitsisoqassasoq.
Maanna Kommune Qeqertalik malinnaavoq. Tamanna takuneqarsinnaavoq kommunalbestyrelsemi ilaasortap Kristian Jeremiassenip partiit suleqatigiit Demokraatit, Inuit Ataqatigiit aamma Naleraq sinnerlugit nalunaarutaani.
Kommune Qeqertalimmi ulluunerani paaqqinnittarfimmiittuuteqarnermi akiliutit 2026-imi aallartittumik taamak isikkoqartinneqassapput.
Tusarfik: Kommune Qeqertalik
- Demokraatit, Inuit Ataqatigiit aamma Naleraq sinnerlugit siullermik nalunaarutigissavarput akiliuteqartarnermut qummut killiliussaq 2026-imi atuutilissasoq siunnerfigineqarmat, taamaalilluni 1.000 koruuninik qummut killiliussaqalissaaq meeraaqqerivinni meeqqerivinnilu atuutilissaaq. siunnersuut Inua-mut (aningaasaqarnermut ataatsimiititaliaq) nassiunneqarpoq kingornalu kommunalbestyrelsimit aalajangiiffigineqassalluni.
Meeqqerivinni meeqqat kaatsitaasarnerarlugit Siumut isornartorsiuivoq
Aqqa Samuelsenip Siumumeersup ataatsimiititaliap Inuata (aningaasaqarnermut ataatsimiititaliap) aggustip 20-ani 2025 ataatsimiinnerani kommunimi tamarmi aningaasartuutinut atorfinitsitsisarnermullu unitsitsisoqarnissaanik aalajangernerat innersuussutigalugu, amerlanerussuteqartut meeqqanik ulluunerani paaqqinnittarfinni nerisassaarutsitsisimasutut sakkortuumik isornartorsiorpai.
Tamanna pillugu Kristian Jeremiassen tusagassiuutitigut nalunaarumminni erseqqissaavoq, meeqqat nerisassaannik sipaarniarneq siunertarineqarsimanngitsoq, neriorsuillunilu "taamaattoqaqqinngisaannassasoq".
- Qeqertalimmi angajoqqaat meeqqallu pittaasumik avatangiiseqarnissaat pingaartipparput suleqatingiinnissamullu isumaqatingiissummi tamanna pingaartipparput, Kristian Jeremiassen (IA), Kommune Qeqertalimmi partiit suleqatigiittut sinnerlugit erseqqissaavoq.
