IMARMI AVATANGIISIT
Umiarsuarnik mingutsitsinngitsumik isaterineq Kalaallit Nunaannit tapersersorneqartoq
Kalaallit Nunaat umiarsuarnik mingutsitsinngitsumik isaterineq pillugu Hongkongimi isumaqatigiissummut 2021-mi ilannguppoq. Kingornali siunnersuut allanngortinneqarpoq, maannalu aamma Inatsisartuni isumaqatigiilluni akuerineqarpoq.
Nunat Hong Kongimi isumaqatigiissummut, 2025-mi juunimi atuutilersussamut, tapersersuisut naammattut ukiut 16-it pissarsiariniarneqarsimapput. Isumaqatigiissummi mingutsitsinani umiarsuarnik isaterisarnissaq qulakkeerneqassaaq. Uani danskit umiarsuaat Alangip Indiamiittup sissaani isaterneqarpoq.
Assiliisoq: Ajit Solanki/AP/Ritzau Scanpix
Umiarsuit
pisoqqat isumannaatsumik avatangiisinullu ajoqutaanngitsumik isaterneqartarnissaat
pissusissamisoorluinnarpoq. Taamaanngilarli. Tamannali ingammik nunani
kinguarsimanerusuni soorlu Bangladeshimi immikkut ittumik sunniuteqarmat
tassani innuttaasut umiarsuit niuernermi assartuutigineqartartorpassuit
inuunerminnik ulorianartorsiorlutik isatertarpaat.
Isumaqatigiissut
Ajornartorsiut nunarsuaq tamakkerlugu 2009-mili eqqumaffigineqarpoq, Hong Kongimilu
naalagaaffinnut allanut attaveqartitsisut ataatsimeersuarneranni nunat
minnerpaamik 15-it — silarsuarmi umiarsuit toniskkaartumik oqimaassusaat naapertorlugit
naatsorsorneqarsimasut minnerpaamik 40 procentiinik assartuisartuusut —
umiarsuarnik isumannaatsumik piujuartitsisumillu isaterinissamik
isumaqatigiissummik tapersersuinissaat sulissutigissallugu
isumaqatigiissutigineqarpoq.
Nunalli naammattut isumaqatigiissummut ilanngunnissaat aatsaat 2023-mi
iluatsimmat, matumanittaaq Kalaallit Nunaat sapaatip-akunnerani kingullermi
umiarsuarnik mingutsitsinngitsumik isaterineq pillugu Inatsisartuni
oqaluuserisassanngortitsisoq, ilannguppoq.
Kalaallit
Nunaanni Hong Kongimi isumaqatigiissummut, Inatsisartut 2021-mi kingornalu
aamma 2023-mi ukiakkut ataatsimiinneranni oqaluuseralugulu akuerineqartumi,
pisortatigoortumik akuersereernikuuvoq.
Kingornali
inatsisissatut siunnersuummut allannguutissatut siunnersuuteqartoqarpoq, taannalu
Inatsisartut ukiaanerani ataatsimiinneranni oqaluuserineqaqqittussanngorpoq.
Ukiaanerani ataatsimiinneq
Siullermeerilluni oqaluuserinninneq pingasunngornermi oktobarip 16-iani pivoq, tassani
partiit allannguutissatut siunnersuut akerliusoqaratik taperserpaat, taamaalillunilu
Kalaallit Nunaata aningaasaqarneranut atatillugu kisermaassiffimmi umiarsuarnik
isaterinermut maleruagassiortoqarsinnaalerpoq.
Aappassaaneerinnilluni
oqaluuserineqarnissaa novembarip 15-iani pissaaq. Isumaqatigiissummi umiarsuit 500 tonsiniit oqimaannerusut umiarsuup atortuini
sananeqaataanilu akuutissat ulorianartut soorlu asbestit, saffiugassat
oqimaatsut akuutissallu ozonimut ajoqutaasinnaasut allassimasuutigissagaat
ilaatigut piumasaqaataavoq. Tamatuma saniatigut umiarsuarnik isateriviit
isumaqatigiissummik malinninnersut naalakkersuisut qulakkiissavaat.
Hong Kongimi
isumaqatigiissut 2025-mi juunip 26-ani atuutilissaaq.
