Ikiaroornartulerinermi eqqartuussinermi uppernarsaatit tupaallannartut unnerluussisussaatitaasup Brian Viholtip kingulliullugit saqqummiuppai.
N-iugunartup S-imut kokainimik pisinissaq pillugu oqaloqateqarnera immiussami tusaaneqarsinnaavoq. Uppernarsaatit saqqummiunneqartut pillugit suliami illuatungeriit apeqquteqarnerannik kinguneqanngilaq.
Ikiaroornartulerinermi eqqartuussinermi uppernarsaatit tupaallannartut unnerluussisussaatitaasup Brian Viholtip kingulliullugit saqqummiuppai.
N-iugunartup S-imut kokainimik pisinissaq pillugu oqaloqateqarnera immiussami tusaaneqarsinnaavoq. Uppernarsaatit saqqummiunneqartut pillugit suliami illuatungeriit apeqquteqarnerannik kinguneqanngilaq.
Unnerluussisussaatitaasup naggataarutaasumik oqaaseqarnera sisamanngornermi ullaap tungaani pivoq.
Taassuma N-ip unnerluutigineqarnera ikiaroornartulerinermut tunngassuteqanngitsut aallarniutigai.
Tusindileriarluni sianeqattaartoq
N-ip aapparisimasani nakkutigisarsimagaa, allasiorsimanerarlugu paasissutissanik atuisarsimasoq, Snapchatianut isersimasoq uukapaatinniarlugulu imminut toqunnissamik sioorasaarisimasoq unnerluussisussaatitaasup ilaatigut uppernarsarpaa.
2024-mi tusindileriarluni sianeqattaarsimavoq. N-ip arnaq sakkortuumik kimigiiserfigisimagaa, tamannalu tarnikkut naalliutitsinermut inatsit aallaavigalugu pineqaatissiissutaasinnaasoq unnerluussisussaatitaasoq isumaqarpoq.
N-ip arnaq ilaqutaalu ima aamma oqarfigisimavai: "Tamassi ikuallassavassi“, tamannalu ersilersitsiniaanerusoq unnerluussisussaatitaasoq isumaqarpoq. Tassalu tarnikkut naalliutsitsisimasutut sioorasaarisimasutullu pineqaatissinneqassasoq piumasaraa.
Naatsorsuutit uppernarsaatini pingaarutillit
Taava ikiaroornartulerinermi unnerluutigineqarnera sammineqalerpoq. Unnerluutigineqartut tamarmik kokainimik 112 grammimik, S-imit N-imut ingerlateqqinneqarsimasorineqartumik, piginnittuusutut pasineqarput. Naatsorsuutit allattaavinni immiussissummut qilersimasuni 112 x 2350-imik allassimasut uppernarsaatini pingaarutillit saqqummiunneqarput. Kisitsisit kokainimik tuniniaanissamut tunngassuteqartut unnerluussisussaatitaasoq isumaqarpoq.
Unnerluussisussaatitaasoq naapertorlugu S aamma Nuummi cannabisimik naatitseqataasimavoq. Naasut naatitassallu 96-iusimasutut unnerluutigineqaqqaaraluartoq 81-inngortinneqarput. Uppernarsaatit tassaapput takunnittup oqaasii, Skoda Yetimi videoliarineqarsimasut naasullu ikiaroornartut pillugit siunnersuisarsimanerminik nammineq nassuiaatai.
Naatitsinerli qanorluunniit pisoqarsimagaluarpat inerteqqutaasoq Brian Viholtip naqissuserpaa.
Kiisalu kokainimik Kangerlussuarmut anngiortumik eqqussinerit marluk, S-ip akisussaaqataaffigisimaneranik pasitsaanneqartup, pingaarutillit unnerluussisup eqqartorpai. Anngiortumik eqqusseriartoqarsimanera pillugu allaasereriikkatsinniittut unnerluussisussaatitaasup tamaasa taakkartorpai.
Sioorasaarineq nerisassanut toqqugaq
S-ip ikiaroornartunik Danmarkimiit Nunatsinnut eqqusseriartoqarnerani pingaarutilimmik inissisimaffeqarsimanera uppernarsarneqarsinnaasoq unnerluussisussaatitaasoq isumaqarpoq. Tamanna S-ip eqqussuisut marluk allaqatigisarnerisigut inuillu allat attaveqarfigisarsimanerannik takussutissaqarnerarpaa. Tamatuma saniatigut S pineqaatissinneqarsimasut inissiisarfianni nerisassanut allakkat toqqorlugit N-imut sioorasaarisimasutut eqqartuunneqartariaqartoq unnerluussisussaatitaasoq isumaqarpoq.
S ukiuni qulini pineqaatissinneqarsimasunut inissiisarfimmiittussanngortinneqartariaqartoq Brian Viholt oqarpoq. N-imulli tunngatillugu unnerluutiginninnni sakkukillivaa. Ukiut pingasut affarlu N-imut tunngatillugu naammattut taanna isumaqarpoq. Unnerluussissut naapertorlugu ukiut sisamaaqqaaraluarput.
Taava illersuisut marluk oqaaseqartussanngorput, taakkualu pisimasut allaanerulluinnartumik oqaluttuarissavaat. Ualeru eqqartuussut saqqummiunneqassasoq neriuutigaarput, sulili nalunarpoq.
