Uppernarsaatissaqannginneq unnerluussisup isorigaa
Lars-Emil Johansen qularnanngitsumik Kofoeds Skolemut suliamut attuumassuteqarsimassaaq, kisianni mailit, ataatsimiinnernit imaqarniliat il.il. nalunaaquttap-akunneri hunnorukkaani pisut amigaataapput, Lars Møller-Sørensenimut aamma Lars-Emil Johansenimut suliami unnerluussisoq oqarpoq.
Lars Møller-Sørensen aamma Lars-Emil Johansen Eqqartuussisoqarfik Sermersuumi ulluni makkunani eqqartuunneqarput.
Assiliisoq: Morten Okkels
- Ninjalluunniit taama isertortigisumik sulisinnaanngillat, unnerluussisoq Bo Bjerregaard kommunaldirektøriusimasumut Lars Møller-Sørensenimut politikkerimullu nuimasumut Lars-Emil Johansenimut peqquserlunnermut suliami naggataarutaasumik oqaaseqarnermini oqarpoq.
Lars-Emil Johansen ukiuni marlunni 730.000 koruunit nalinganik aningaasarsiaqartinneqarluni kommunimut sulisimanngitsoq unnerluussisoq isumaqarpoq.
- Kofoeds Skolemut suliami peqataasimanera qularnanngilaq, Lars-Emil Johansen pillugu unnerluutiginnittoq oqarpoq, nangipporlu:
- Mailit, ataatsimiinnernit imaqarniliat allallu nalunaaquttap-akunnerini hunnorujulunni pisut amigaataapput. Ninjalluunniit taama isertortigalutik sulisinnanngillat.
Allakkatigut uppernarsaatissaqannginnerup saniatigut Lars-Emil Johansenip kommunimi sulisimaneranik uppernarsaasinnaasunik takunnissimasunik amigaateqartoqartoq unnerluussisoq aamma oqarpoq.
Danmarkiliarnermi aningaasartuutaasimasut kommunimi nalunaarsorneqarsimanngitsut unnerluussisoq aamma oqarpoq. Uppernarsaatinik takussutissaqannginnerup saniatigut alla aamma ajornartorsiutaavoq:
Lars Møller-Sørensenip atorfinitsitsinermut malittarisassat malinnagit, allanit siunnersorneqarani isumaqatigiissusioreeramilu aamma paasititsinani Lars-Emil Johansen atorfinitsissimavaa.
- Isertorluni atorfinitsitsisoqarsimanerani taassallugu ingasaassinerunngilaq. Soormitaava, Bo Bjerregaard aperaaq.
Illersuisumit sakkortuumik isornartorsiorneqartoq
Unnerluutigineqartut tamarmik pinngitsuunerarput.
Lars Møller-Sørensenip illersuisua, eqqartuussissuserisoq Peter Giersing, Lars-Emil Johansenimik isumaqatigiissut “piareersimanissamik isumaqatigiissutaasoq, angusaqarnissamullu pisussaaffiunngitsoq” suliami oqaaseqarnermini oqarpoq.
Lars-Møller Sørensenip illersuisua naapertorlugu apeqqutinut arlalinnut tunngatillugu ikiorneqarnissamik pisariaqartitsigami isumaqatigiissusiorpoq.
- Tamanna ajunngitsuusoq ajortorluunniit isumaqartoqarsinnaavoq, tamannali apeqqutaanngilaq, inatsisimmi malillugit iliorneruvoq, illersuisoq tunngavilersuivoq, aperaarlu:
- Atorfinitsitsinerunngilaq. Siunnersuisartumillu isumaqatigiissusiorneruvoq. Sooq borgmesteri tamatumunnga attuumassuteqanngitsoq oqaloqatigeqqaartariaqarpa?
Lars-Emil Johansenip illersuisua Ulrik Blidorf sakkortuumik isorinnilluni ilassuteqarpoq:
- Ukiorpassuarni illersuisutut misilittagaqarpunga. Suliami aatsaat taama uppernarsaatissakitsigisumik takuvunga, Blidorf eqqartuussivimmi oqarpoq, nangillunilu:
- Sooruna Vestegnens Politiit, Kalaallit Nunaanni Politiit pinnatik, suliamik misissuisimasut. Inuit Kalaallit Nunaannik inatsisinillu ilisimasaqanngitsut, Blidorf aperaaq.
