USA-miit Nuummut toqqaannartumik timmisartoq siulleq ilaasunik ulikkaarluinnalerpoq
United Airlinesip USA-miit Nuummut timmisartuussinera siulleq arfininngornermi pissaaq. Akunnerit sisamat missaat timmisartuussereernermi USA-miit nunatsinnut tikittoqarsinnaalerpoq.
Nuummi mittarfik annertunerusumik tallilerneqareerluni 2024-imi novembarip 28-ani pisortatigoortumik ammarneqarpoq, Københavnimiit Kalaallit Nunaata illoqarfiata pingaarnersaannut toqqaannartumik timmisartuussisoqarsinnaalersillugu. (Arktikfoto).
Foto: Mads Claus Rasmussen/Ritzau Scanpix
Silaannakkut aqqut nutaaq arfininngornermi pisortatigoortumik atoqqaarfissiorneqareerpat, nalunaaquttap-akunneri sisamat missaanni timmisartukkut angalagaanni New Yorkimiit nunatsinnut tikittoqarsinnaalissaaq.
Timmisartoq siulleq toqqaannartumik Newarkip mittarfianit Nuummi mittarfimmut nunatta nalunaaqutaa malillugu nal. 18.45 tikissaaq.
Timmisartortitseqatigiiffiup nittartagaani allassimavoq arfininngornermi ullaap tungaani timmisartumi inissat nungungajalersut.
Angallassineq nutaami, septembarip tungaanut sapaatip akunneranut marloriarluni timmisartuussisoqartassaaq. Taamaattumillu Kalaallit Nunaannut tikeraartartut “amerlanerulernissaat” ilimagineqarpoq.
Visit Greenland Ritzauimut allakkatigut akissuteqarluni taama ilisimatitsivoq.
- Misissuinitta takutippaat nunatsinnut tikikkusuttut misigisarsimasut nunarput tikikkuminaatsuusoq. Maanna tikikkuminarnerulerpoq, tamannalu inuiaqatigiinnut angalasunullu iluaqutaangaatsiassaaq.
Jens Lauridsenip, Greenland Airportsimi pisortap, ulloq taanna „oqaluttuarisaanermi pingaaruteqarluinnartutut“ taavaa.
- Iluatsissimagatsigu tulluusimaarutigaarput, maannalu nunarsuarmut aqqutit ammanerulerput, innuttaasunut, inuussutissarsiortunut Kalaallit Nunaannullu tamarmut periarfissanik nutaanik ammaassillutik, tusagassiorfimmut Check-in.dk-mut oqarpoq.
United Airlinesip timmisartuussisarfiata timmisartuutaa Boeing 737 MAX-8-p 168-inik ilaasoqarsinnaasoq timmisartuussinermi atorneqartassasoq ilimagineqarpoq.
United Airlinesip nittartagaani allassimavoq arfininngornermi timmisartuussinissamut inissat tamakkerneqaliivissut. Arfininngornermi ullaakkut timmisartuussinissamut inissat 14-it sinnerussimasut, timmisartortitseqatigiiffiup nittartagaani allassimavoq.
Nuummi mittarfik nutaaq siorna novembarimi Danmarkimit toqqaannartumik timmisartumit siullermit tikiffigineqaqqaarpoq.
Københavnimiit Nuummut akunnerit tallimangajaat timmisartoreernermi Kalaallit Nunaanni illoqarfiit pingaarnersaannut tikittoqarsinnaavoq, angalaneq eqaannerulersillugu. Danmarkimiit siusinnerusukkut Kangerlussuarmut tikeqqaarluni angalaneq ingerlaqqittarsimagaluarpoq.
Mittarfik, ukiuni kingullerni naalagaaffeqatigiinni attaveqaqatigiinnermut suliniutit annersaasa ilaat, arlaleriarluni ajornartorsiuteqartarsimavoq.
Mittarfissap nutaap 2200 meterisut takitigisup sananeqarnerata nalaani, atlantiku qulaallugu timmisartuussinertut atulertussatut akuerineqarnissaanut piffissaq sivisungaatsiartoq atorneqarsimavoq.
Mittarfilli nutaaq, siornatigut 950 meterisut takitigisimasoq, atulermat timmisartut anginerusut Københavnimit, Europamit nunarsuarmilu sumiiffinnit allanit toqqaannartumik Kalaallit Nunaata illoqarfiisa pingaarnersaanni missinnaanngorput.
