KL

DK

USA-p annertusarneqarnissaanik Trump  oqalugiaammini oqarpoq Kalaallilli Nunaat eqqaanngilaa

USA-p præsidentitaava aallartinnermi oqalugiaammini USA-mik annertunerulersitsiniarluni oqarpoq, tamatumanili Kalaallit Nunaat eqqaanngilaa.

Donald Trumpip ataasinngornermi USA-p præsidentiatut aappassaanik neriorsuitinneqarpoq. Præsidentitut aallartinnerminut atatillugu saqqummiussinermini Kalaallit Nunaannik piginnittuulernissamik kissaateqarnera eqqaaneqanngilaq.
ritzau
Saqqummersinneqarpoq

USA-p præsidentertaava, Donald Trump, Kalaallit Nunaat pillugu oqaaseqanngilaq, ataasinngornermi Washington D.C.-mi kongresbygningimi oqalugiarnermini.

- Isumannaallisaaneq sanarfeqqinneqarlunilu annertusarneqassaaq, Trump  nalunaaquttap akunnerata affaata missaanik sivisussusilimmi oqalugiaammini oqarpoq, taannalu tassaavoq Kalaallit Nunaannut attuumassuteqarsinnaasunut qaninnerpaatut oqaatigineqarsinnaasoq.

Præsidentilli oqaatigaa, USA-p "nunat immikkoortortani" annertusassagai. Tassunga atatillugu ilaatigut oqaatigineqarpoq USA-p "Panama-kanali utertinneqassasoq".

Donald Trump-ip qanittumi oqaatigaa, neriorsuutigisinnaanagu sakkutuulersortoqassanngitsoq aningaasaqarnikkullu pillaasoqassanngitsoq Kalaallit Nunaannut aqutsilerniarnermini, kingullermik 2019-imi pisiariniarlugu eqqartuivoq, siullermeerluni præsidentinngoqqammerluni.

Oqaaserineqartut taakku  USA-p præsidentimut tullersortigiligaata, J.D. Vancep, kingusinnerusukkut sakkukillisarpai.

Naalakkersuisut siulittaasuat, Múte B. Egede, arlaleriarluni itigartitsisarsimavoq, Kalaallit Nunaat tuniniagaanngitsoq erseqqissaateqartarpoq.

2019-imi Donald Trump Mette Frederiksen (S)-mit Danmarkimi ministeriunermit itigartinneqarpoq, isumassarsiaq Kalaallit Nunaat pisiariniarlugu "tulluartuunngitsoq" taallugu. Tamanna Trumpip Danmarkimut tikeraarnissani pilersaarutaareersoq taamaatippaa.

Tamatumuuna matumani pisumi Mette Frederiksenip oqaasissani eqqarsaatigilluagaanerusut atorpai. Taassuma oqaatigaa, "Kalaallit Nunaat Kalaallit pigaat".

Mette Frederiksenip sapaatip akunnerani kingullermi 45 minutsinik sivisussusilimmik telefonikkut Donald Trump oqaloqatigaa, ilaatigut Kalaallit Nunaat aqussallugu kissaatai pillugit.

Oqaloqatigiinnermilu tassani eqqartorneqanngilaq kissaatini naapertorlugit Danmark iliuuseqanngippat, danskit nioqqutissaat akitsuuserneqarnissaat pillugu Trumpip sioorasaarutini utertinngilai.

Politikkikkut pinnguaatinik nikeriarfiit annertuumik allanngorsimapput 2019-imiilli, pingaartumik Ruslandip Ukrainemut saassussinerata pingasunngormat ukiut pingasut matuma siorna Europami sorsunneq pilersissimavaa.

Taamatuttaaq Issittumi nunap immikkoortuani, taamaalillunilu Kalaallit Nunaat, isumannaallisaanikkut qitiusumik inissisimaffiusimavoq, tassanilu Rusland, USA aamma Kina sakkutuulersuipput.

Præsidentip tullersortaata J.D. Vancep, qanittumi oqaatigaa, Danmarkip Kalaallit Nunaat isumannaallisaanikkut illersussallugu qulakkeersimanngikkaa. Tamatumali malitsigisaanik danskit naalakkersuisuisa Issittoq pillugu nutaamik isumaqatigiissuteqarnissamut isumaqatigiinniarnerit aallartippaat.

ritzau præsidentindsættelse præsident inuiaqatigiit grønland donald trump usa samfund udland

ATORFIIT Se alle jobs

Powered by Labrador CMS