USA-p præsidentiata Joe Bidenip qineqqusaarnini unitsippaa
USA-p præsidentia, Joe Biden, novembarimi qinersinermi sassarnianngilaq. Tamat attaveqatigiiffianni X-imi taama nammineerluni allappoq.
USA-p præsidentia, Joe Biden, præsidentimut qinigassanngortittut tunuartoq aamma novembarimi qinersinermi sassarnianngilaq. Taama X-mi allaaserisaqarpoq. (Toqqorsivimmit assilisaq).
Nathan Howard
USA-p præsidentiata Joe Bidenip novembarimi præsidentinngorniunnermut sassarniarnani nalunaarutigaa, qineqqusaarnermiillu tunuarnini nalunaarutigalugu.
– Qineqqusaaqqinnissara siunertarigaluarpara, isumaqarpungali partiinnut nunatsinnullu iluaqutaassasoq tunuarlungalu præsidentitut suliassannik naammassinninnissara kisiat aallutissallugu, Biden oqarpoq.
Nangilluni allappoq sapaatip-akunnerani tulliuttumi inuiaqatigiinnut oqalugiarumaarluni.
Biden 2020-mi præsidentinngortussatut qinersinermi republikaneri Donald Trump ajugaaffigalugu 2021-mi januaarip 20-anili USA-mi præsidentiuvoq.
1968-imiilli præsidentiugallartuni Biden siullersaalluni qineqqusaarnissamut periarfissaqaraluarluni qinigassanngorteqqinnianngilaq.
TV-kkut toqqaannartumik Trump juunip 27-anili oqalliseqatigigamiulli Biden qineqqusaarnermit tunuarnissamut tatineqangaalerpoq, parteeqatai arlallit isumaqaramik præsidentitut ingerlaqqissinnaajunnaartoq.
USA-mi inatsisartut sinnerlugit inatsisartunilu ilaasortat Demokraatineersorpassuit præsidenti 81-inik ukiulik qineqqusaarummik taamaatitsiinnarnissaanut toqqaannartumik kajumissaarsimavaat.
