USA sorsunnermut ministereqarfeqassaaq

USA-p præsidentiata Donald Trumpip tallimanngormat naalakkersuit, nunap illersornissamut ministereqarfiata taaguutaanik allannguisoq atsiorpaa, taamaalilluni siunissami sorsunnermut ministereqarfimmik taaguuteqalissaaq, Department of War.

Reuters taama allappoq.

– Nunarsuup massakkorpiaq qanoq isikkoqarnera eqqarsaatigalugu taaguut taanna eqqornerusuuvoq, Reuters naapertorlugu Donald Trump Allaffimmi Ammaloqisaami tusagassiortunut oqarpoq.

Nutaarsiassaqartitsivik naapertorlugu taaguummik allannguineq dollarsinik untritilinnik milliuuninik arlalinnik akeqassangatinneqarpoq.

Ilaatigut allagartarsuit, allakkanut pappiaqqat, ministereqarfiup taaguutaanik allassimasut taarserneqassapput. Tamanna Pentagonimuinnaq tunnganngilaq, aammali Amerikamiut nunarsuaq tamakkerlugu sakkutooqarfiini atuutissaaq.

Trumpip ministereqarfiup taaguutaanik allannguiniarnera naalakkersuisut naalakkersuisoqarfinnik pisariillisaanermut immikkoortuata (Doge) pisortat aningasartuutaannik ileqqaarniarluni soraarsitsinissanik ileqqaarutissanillu siunniussaqarnerata nalaani pivoq.

Reuters naapertorlugu Amerikamiut ministereqarfiisa taaguutaannik allannguineq qaqutigoortuuvoq, Kongressimillu, Trumpip partiiata Republikanerit inatsisartuni tamani amerlanerussuteqaqqarfigisaanni akuersinissaq piumasaqaataavoq.

Taaguummik allannguinissamik peqqusinikkut ilaatigut illersornissamut ministerip Pete Hegsethip pisortatigoortumik attaveqarnermi tamanullu attaveqarnermi sorsunnermut ministeritut taaguutiminik, taaguutit aappaattut atuisinnaatippaa. Reuters naapertorlugu tamanna faktaarkimi Illorsuup Qaqortup saqqummiussaani allassimavoq.

Amerikamiut illersornissamut ministereqarfiata 1949-mi maanna taaguutiminik taaguuteqalerpoq.

Siornatigut ministereqarfik sorsunnermut ministereqarfimmik, War Departementimik taaguuteqarpoq. Taamanikkut taaguummik allannguineq oqaluttuarisaanermik ilisimasallit naapertorlugit, USA-p sorsuunnernik pinaveersaartitsinermik aallussinissaanik oqariartuuteqarnissaq siunertarlugu pivoq.