Utoqqaat illuanni ajornartorsiutit ombudsmandip maluginiarpai
Inatsisartut ombudsmandiata Upernavimmi utoqqaat illuanni sulisut akisussaassuseqartumik tunniusimallutillu sulinerat nuannaarutigaa. Allagaatinilli isertuussisoqarnera pulaartullu imigassartorsinnaanerannut malittarisassanut tunngatillugu ajornartorsiuteqartoqarnera maluginiarpaa.
Assiliisaq Hernnhuthusimi Nuummit, Ombudsmandi Inatsisartuniittoq najugaqarfigisaa.
Assi: Morten Okkels
Inatsisartut Ombudsmandiata misissuisartuisa Upernavimmi utoqqaat illuat juunip arfernani arfineq-aappaanilu 2024-mi siumut nalunaarutigeriikkamik misissuiffigaat. Nalunaarusiarli aatsaat maanna tamanut saqqummiunneqarpoq.
Ombudsmandi Gedion Jeremiassenip sulisumi naapissimasaat pillugit ima oqarpoq:
- Utoqqaat illuat pillugu ombudsmandip pingaarnertut maluginiagara unaavoq, najugaqartut naammagisimaarinnittut aamma utoqqaat illuanni najugaqarsinnaanertik qujamasuutigigaat, ombudsmandi allappoq.
– Aamma maluginiarpara akisussaassuseqarlutik, sungiussisimallutik aammalu najugaqartut tungaannut pissaanermik atuinnginnissaq ukkataralugu, kiisalu aqutsisoqatigiit suliaminnut tunniussimallutik unammillernarsinnaasullu ilisimaaralugit najugaqartut, sulisut ilaqutaasullu misigisartagaat eqqarsaatigalugit sulisut suliaqarnerat.
Ombudsmandelli utoqqaat illuat Avannaata Kommunialu arlalitsigut iluarsineqartussanik oqaaseqarfigisimavai.
Taassuma maluginiarpaa sulisut pissaanermik atuinermut inatsimmik nutaamik, 2023-mi atuutilersumik, tunineqarsimanngitsut. Utoqqaat illuini sulisut inatsisip assinganik tunineqartussaapput. Kommunip maleruagassat maanna isumagissavai.
Akuerineqartigani allakkanik ammaasoq
Ombudsmandip aamma oqaatigaa sulisut najugaqartut allagaat, ilaatigut akissarsianut allagartat utoqqalinersiutinullu allagartat, akuersissuteqaratik ammartaraat, tamannalu kukkusumik iliuuseqarnerusoq.
- Pisortaqatigiinnit oqaatigineqarpoq, allakkat taakkua ammarneqartartut, arlaleriarluni utoqqaat illuanni misigineqartarmat, utoqqaat illuanni najugaqarnermi akiliutit kommunimiit ilanngaatigineqarneq ajortut, ombudsmandi oqarpoq.
– Oqaatigissavara, Tunngaviusumik Inatsimmi § 72-ikkut ilaatigut aalajangersarneqarmat, allagarsianik arsaarinninneq ammaasarnerlu inatsisitigut tunngavissaqartinnagu eqqartuussivilluunniit aalajangiitinnagit pisinnaanngitsut. Najugaqartut allagarsiaannik arsaarinnittarneq najugaqartumulluunniit allakkanik, najugaqartoq akuersitinnagu ammaasinnaaneq pissaanermik atuineq pillugu inatsimmi kapitali IV-kkut inerteqqutaammat.
Avannaata Kommunia nalunaarpoq taamaaliorneq maanna unitsinneqartoq.
Aamma imigassaq isummerfigineqarpoq. Utoqqaat illuannimi aalakoortunik pulaartoqarnermi tulluanngitsunik pisoqartareersoq imigassanik nassataqarlutik pulaarniartut itigartinneqartalersimapput.
Ombudsmandilli maluginiarpaa inuit angerlarsimaffigisaannut taama pulaartoqaqqusiunnaartoqarsinnaanngitsoq. Taamaattoq najugaqartut ataatsimoorfigisaanni imigassartortoqaqqusinnginneq atuutsinneqarsinnaasoq maluginiaqquaa.
