Utoqqatserneq sapaatit-akunneri marluk qaangiuppata pissasoq
Nuummi Katuami aaqqissuussinermi spirali pillugu utoqqatserneq septembarip 24-ani malunnartinneqassaaq.
Naalakkersuisut siulittaasuat Jens-Frederik Nielsen aamma Danmarkimi ministeriuneq Mette Frederiksen spiralilersuinermut atatillugu pisortatigoortumik utoqqatserput. Tamanna maanna malunnartinneqartussanngorpoq.
Assi: Mads Claus Rasmussen/Ritzau Scanpix
Danskit ministeriunerat Mette Frederiksen aamma Naalakkersuisut siulittaasuat Jens-Frederik Nielsen kalaallit arnarpassuit ukiuni qulikkuutaani akuersinatik spiralimik ikkussiffigineqarsimasut pillugit aggustip 27-ani ilimaginngisamik utoqqatserput.
Maanna naalakkersuisut siuttui marluk pisortatigoortumik utoqqatsernerup malunnartinneqarnissaa pillugu isumaqatigiissuteqarput.
Tamanna 2025-mi pingasunngornermi septembarip 24-anni nalunaaqutaq 14.00 Nuummi Katuami aaqqissuussisoqarneratigut pissaaq.
Naalakkersuisut Siulittaasuata Naalakekrsuisoqarfia tusagassiutitigut taama nalunaaruteqarpoq.
Pisumut attuumassuteqartut Nuummi peqataasinnaanngitsoq utoqqatsernermi malinnaasikkumallugit utoqqatserneq KNR-TV-kkut kalaallisut danskisullu toqqaannartumik aallakaatinneqarumaarpoq.
Aaqqissuussineq arnat spiralimik ikkussiffigineqarsimasut sinniisaat peqatigalugu pilersaarusiorneqarpoq.
Spiralilersiusimaneq pillugu misissuinermi nalunaarusiaq septembarip aallaqqaataani piareertussaavoq. Maannali sapaatip-akunnera qaangiutereeraluartoq suli tamanut saqqummiunneqanngilaq.
