KL

DK

BORGMESTERI STINE EGEDE (IA)

- Utoqqatserpunga akileraarutit A-t akilerneqarsimannginneri pillugit

Sisamanngornermi juunip 27-iani Kommune Kujallermi kommunalbestyrelsip ataatsimiinnerani najummatsisimanartumi tatiginnikkunnaarnermik taasisitsineq borgmesterip aamma kommunaldirektørip anigorpaat. - Aningaasaqarnermut ataatsimiititaliaq aamma kommunalbestyrelsi sinnerlugit utoqqatserpunga akileraarutit A-t akilersimannginneri pillugit, kisianni akisussaaffiga qimarratiginianngilara aamma nangittumik sulissutigissavara kommunalbestyrelsinngorumaartussaq pitsaanerusunik atugassaqartinneqassasoq, borgmesteri Sermitsiamut oqarpoq.

Borgmester Stine Egede (IA) aamma siunnersortaa qaninnerpaaq, kommunaldirektør Tina Pars, kommunip aningaasaqarnikkut ajornartorsioranut aaqqissuiniarnertik ingerlateqqissavaat.
Jensine Berthelsen
tusagassiortoq
Saqqummersinneqarpoq

Borgmester Stine Egede (IA) qinikkatut akisussaaffimmik tigumminnittutut najummatsisimanartorsiornermik annertunerpaamik, tassalu komunalbestyrelsimi ilaasortaqatiminit tatiginninnginnermik taasisitsinermik anigueqqammerpoq, taasisitsinerup ilutigisaanik aamma kommunaldirektøri Tina Pars tatigiunnaarlugu soraarsinneqassasoq piumasarineqaraluarpoq, taannali aamma aniguivoq.

Borgmester Stine Egede tunuarsimaanngilaq akileraarutinik A-nik akiliisimannginnerup kingunerisaanik ajornartorsiutit pillugit utoqqatsissalluni:

- Aningaasaqarnermut ataatsimiititaliaq/kommunalbestyrelse sinnerlugu kommunitsinni innuttaasut utoqqatserfigiumavakka akileraarutaat qaammatini pingasuni akilerneqarsimanngimmata aammalu akileraaruserivimmut akiitsoqarnerup aningaasartuuteqarfiusariaqarnera pillugu. 

- Ajornartorsiulli nammineerluta pilersissimarput aaqqissallugu siunertaraarput. 

- Aaqqiissuteqarnissamut pilersaarut, pingaartumik isumaginnittoqarfimmut tunngasoq, naammassineqassaaq taamaalilluta 2024-mut missingersuutit eqqortissinnaaniassagatsigit taavalu akileraaruseriffimmut ernianik qaffasissunik akiliinissarput pinngitsoorumallugu aningaasatigut tigugallagassatsinnik qinnuteqarsinnaanngorniassagatta. 

Stine Egede aamma erseqqissaavoq nammineq kommunaldirektørimik tatiginninnini innarlinngitsoq, innersuussutigaalu aprilimi aningaasaqarnermik aqutsinermi naapertuutinngitsumik ingerlasoqarsimasoq paasineqarmat kommunaldirektørip paasiniariaramiuk kinguarsaanertaqanngitsumik aaqqiissutissanik sulissutiginnikkasuarsimasoq aammalu taassuma kingorna aaqqiissutissanik pilersaarummik aallartitsisimalluni.

Demokraatit tatiginnikkunnaarput

Borgmesterip utoqqatsissutiginninnissaa sioqqullugu, Inuit Ataqatigiit Kommune Kujallermi suleqatigisaasa, Demokraatit, borgmesterimut kommunaldirektørimullu tatiginikkunnaarnertik nalunaarutigivaat.

Demokraatit isumaqarput kommunimi akisussaasut qullerpaat akisussaaffimminnik sumiginnaasimasut aningaasaqarnikkullu ingerlatsinermi nakkutilliinissaminnik pisussaaffitsik naammassisimanngikkaat.

Illuatungeriit tatiginninnermik nalunaaruteqarnissaq sioqqullugu arlaleriarlutik aningaasaqarnermut inuussutissarsiornermullu ataatsimiititaliami ataatsimiinnerit ingerlappaat ilaatigut tatigeqatigiinneq aallaavigalugu ingerlaqqinnissamut tunngavissat isumannaarniarsaralugit.

Kisianni Demokraatit akileraarutinik akiliinngitsoorsimaneq pillugu aammalu aningaasat akiliutissaraluit 40 millioner koruuninit amerlanerusut sumut atorneqarsimanersut pillugit nassuiaatigineqartunut naammaginninngillat, tamatumalu malitsigisaanik kommunalbestyrelsimi immikkut ittumik ataatsimiinneq najummatsisimanartorsiorfiusoq ingerlanneqarpoq, naggaserneqarlunilu borgmesterimut kommunaldirektørimullu tatiginninnginnermik nittarsaassinermik taasinertalimmik, taannalu 8-6-imik naammassineqarluni pinngitsoortitsisoqarpoq.

Egede: Akisussaaffiga qimarratigissanngilara

Borgmesteri nammineq aalajangersinnaagaluarpoq tunuarniuteqassalluni tatiginninnginnermik nittarsaassisoqarneranut atatillugu. Kisianni taanna aalajangerpoq suliaminik ingerlatiinnarusulluni:

- Kommunitta aningaasaqarnerani unammilligassat annertuujusut naluneqanngilaq. Unammilligassat ukiut arlalissuit, allaallu kommunalbestyrelsi maanna atuuttoq sioqqullugu piupput, assersuutigiinnarlugu oqaatigissavara kommunalbestyrelsi maanna atuuttoq aallartimmat 30 millionit koruuninik nassaarniartariaqarluni, Stine Egede (IA) Sermitsiamut oqaluttuarpoq.

Taamaattumik borgmesteri tamaviaaruteqarniarnerarpoq kommunalbestyrelse nutaaq, kingusinnerpaamik apriilip arferngani 2025-mi qinigaajumaaartussaq, aningaasaqarnikkut aqutsinermi ajunnginnerusumik atugassaqartitaalluni aallartissinnaanissaa nammineq isumannaarusullugu.

Nuna tamakkerlugu ajornartoorneq

Taamaattorli kommunalbestyrelsi tulliuttoq kommunip aningaasaqarnikkut ajornartorsiutigisap pitsaanerusumik aqunneqarnissaanut atugassarititaasunik pitsaanerusunik atugassaqartinneqarsinnaassappat, borgmesterip Naalakkersuisunut kaammattuutigaa immikkut ittumik eqqumaffiginnittoqassasoq:

- Naalakkersuisunut kajumissaarutigissavara meeqqanik angerlarsimaffiup avataanut inissiisarnermut kommunit aningaasartuutaasa qaffakkiartornerujussuat ilungersunartutut tigullu pimooruteqqullugu, Stine Egede oqarpoq.

Stine Egede Sermitsiamut oqarpoq Kommune Kujalleq kisimiinngitsoq, kisianni kommunit tamarmik inuiaqatigiinni isumaginninnikkut ajornartooqqanermik annertuumik eqqugaaqqasut, tamannalu ersersikkaa inuiaqatigiit ataatsimoortumik  ajornartooqqanermik killiffeqartut.

inuiaqatigiit samfund

ATORFIIT Se alle jobs

Powered by Labrador CMS