KILISAAT KIVISOQ
Uuliakoorneq annikitsoq
Kilisaat Lumor arfininngornermi marsip 16-iata unnuaani kivimmat uuliakoorpallaarsimanngitsoq, Avatangiisinut naalakkersuisoqarfiup Issittumi Sakkutooqarfik suleqatigalugu nalilerpaa. Kilisaatip imaanit qaqinneqarnissaa pilersaarutaanngilaq.
Kilisaatip Lumorip immap naqqanut kiviartortup assingi Issittumi Sakkutooqarfiup saqqummiuppai. Inuttat tamarmik qimagussortinneqarlutillu annanneqarput.
Arktisk Kommando
Royal Greenlandip kilisaataataa Lumor arfininngornermi marsip 16-iata unnuaani kivimmat annikitsumik uuliakoortoqarsimavoq. Avatangiisinut Naalakkersuisoqarfik, inuttat qimagussortinneqarnerannik ataqatigiissaarisuusimasoq, Issittumi Sakkutooqarfik qanimut suleqatigalugu taama ilisimatitsivoq.
- Annikitsuinnarmik uuliakoortoqarsimasoq Issittumi Sakkutooqarfik aamma nalunaarpoq. Issittumi Sakkutooqarfik sumiiffimmiinngilaq, ilaannikkulli sumiiffimmik nakkutilliisarluni, Avatangiisinut Naalakkersuisoqarfik Sermitsiap nittartagaanut ilisimatitsivoq.
Kilisaat maanna 94 meterit missaannik ititigisumiittoq, Avatangiisinut Naalakkersuisoqarfik nalunaarpoq.
Qaqinneqarsinnaanersoq naliliisoqanngilaq
Umiiarneq pissutsillu pillugit paasissutissat suli pissarsiarineqartartut, Avatangiisinut naalakkersuisoqarfik ilisimatitsiitigivoq.
- Kilisaat kivisimasoq qaqinneqarsinnaanersoq maannakkumut nalilerneqarnikuunngilaq. Taamaattumik qaqinneqarnissaanut tunngasut suliap suliarineqarnerani ilanngunneqassapput, allassimavoq.
Qaammammi matumani siusinnerusukkut kilisaatip kivilersup assingi Issittumi Sakkutooqarfiup tamanut saqqummiuppai, aamma annaassiniarnerup qanoq ingerlanneqarsimanera sukumiisumik nassuiaateqarpoq. Kilisaatip kivinnginnerani inuttat qulit tamarmik annaanneqarput.
