Uuliakoornermik immiussaq kommunip qisuariarfigigaa
Video Ittoqqortoormiini uuliakoornerup imaanut siaruaanneranik immiussaq inuit nittartakkatigut attaveqaqatigiittarfianni siaruarterneqartoq Kommuneqarfik Sermersooq paasissutissiivoq. Immiussalli uppernassusaa suli qulakkeerneqanngitsoq kommuni allappoq.
- Kommunimi Upalungaarsimasut imaaniit uulia katersornissaanut atortoqaratik, atortullu pisiarineqartut tikingajalersut aamma paasissutissiissutigat ilisimatitsipput, Kommuneqarfik Sermersooq nittartakkamini allappoq.
Assi: Leiff Josefsen
Ittoqqortoormiit eqqaani dieseli kuuttoq imaanut siaruaappoq. Immiussaq inuit nittartakkatigut attaveqatigiittarfiini ingerlaartinneqartoq takuneqarsinnaasoq Kommuneqarfik Sermersooq ilisimatitsivoq.
Kommunip videop iluumuussusaa suli naqissusersinnaanngikkaa, taamaattorli ilumoorartarsinnaanera pimoorunneqartoq kommunip nittartakkamini allappoq.
Uulia Tunumi ajornartoornermi innaallagassiuummit kuuppoq.
Kommuneqarfik Sermersooq Nukissiorfiit oqartussallu allat suleqatigalugit uuliamik mingutsitsineq suli iliuuseqarfiginiarpaa:
- Kommunimi Upalungaarsimasut imaaniit uulia katersornissaanut atortoqaratik, atortullu pisiarineqartut tikingajalersut aamma paasissutissiissutigat ilisimatitsipput, kommuni nittartakkamini allappoq.
Innuttaasut tamarmik uuliamik nunami imaanilu attuissanngilluinnartut kommuni kaammattuivoq. Pisoq qanimut malinnaavigineqarpoq innuttaasunullu ataavartumik paasissutissiisoqartassalluni.
Dieseli 22.000 literip missaaniittoq, Ittoqqortoormiit kitaani Qinngaaivata tungaaniittumi, Nukissiorfiit peqqumaataasivia tanki angisooq uuliakoortoq Kalaallit Nunaanni Politiit maajip 23-ani tusagassiutinut nalunaarutiginikuuaat.
