KL

DK

Uumasuaraqarnissamut aarlerinaat: Tuttup neqaa ima isumagissavat

Tuttut nunani allani Issittumiittut uumasuaqqanit perululluni napparsimalersitsisinnaasunit saassunneqartartut, nunatsinni taama suli pisoqarsimanngilaq. Taamaakkaluartorli mianersortoqartariaqarpoq siunnersuutillu pitsaasut maleruarneqartariaqarlutik.

Neqi uumasuaqqanit tunillanneqarsimappat napparsimalertoqannginniassammat uulluarnissaa eqqaamaneqassaaq.
Tusagassiortoq
Saqqummersinneqarpoq

Canadami, Finlandimi, Sverigemi Norgemilu inunnik perulunnartumik napparsimalersitsisinnaasunik uumasuaqqanik nassaartoqartarpoq, soorlu uumasuaraq Toxoplasma gondii aamma qumaarsussuaq Echinococus granulosus, nassaarineqarsimapput.

- Uumasuaqqanik taakkuninnga nunatsinni tuttuni nassaartoqanngilaq, aalisarnermut piniarnermullu naalakkersuisoq Kim Kielsen Demokraatineersumut Jens-Frederik Nielsenimut paragraf 37 naapertorlugu apeqquteqaat naapertorlugu akissummini erseqqissaavoq.

Pimoorunneqassasut

Taamaakkaluartoq Kalaallit Nunaanni tuttuni uumasuaqqat eqqarsaatiginissaat pissutissaqarluarpoq.

- Nunatsinni inuit tunillanneqarsinnaanerannut aarlerinaat mikisuaraavoq, nalunartulli pillugit tuttup neqaa uulluarneqartariaqarpoq, neqimi uumasuaqqat ilaat isaannarmik takuneqarsinnaasanngimmata. Uumasut qaasuttut aqqutigalugit uumasuararpassuit pinngortitami siammartertarput, tamannalu pissutigalugu neqi pinngortitamut qimaannarneqassanngilaq qimminulluunniit nerukkaatissatut atorneqassanngilaq. Neqi qimminut nerukkaatissatut atorneqartariaqarpat, neqi uulluarneqaqqaartariaqarpoq, Kim Kielsenip akissutaani siunnersuut taama nipaqarpoq.

Uumasuaqqanik akiuiniarnermut ilaatillugu nunatsinni tuttut nujuartat nakorsaasersorniarnerat ajornavittussaavoq. Taarsiullugu "pisarineqartut isumagilluarneqarnissaat ukkatarineqartariaqarpoq, taamaalillunimi uumasuaqqat uumasunut allanut ingerlateqqinneqartassanngillat".

Ersiutit

Sarcosysterit timmitsitsisinnaallutillu, kissarneqartitsilersinnaallutillu, meriartitsisinnaallutillu, nukitsigut nukillaangalersitsisinnaallutillu aamma nukitsigut anniartitsisinnaapput.

- Taamaammat uumasuaqqat toqunissaat qulakkeerniarlugu tuttut uumasullu allat neqaat iluani minnerpaamik 75°C-nik kiassuseqartumik uunneqartarnissaat inassutigineqarpoq. Uumasuaqqat toqunniarlugit neqinik pujoorisarneq, panertitsisarneq qerititsisarnerlu tamatigut naammanneq ajorput. Taamaammat uumasuaqqat toqusimanissaat qulakkeerniarlugu neqip uulluarneqartarnissaa inassutigineqartarpoq. Neqi uulluarneqarsimasoq qasersutut isikkoqartarpoq. Neqi tunillanneqarsimaneranik ajornanngitsumik takuneqarsinnaappat nereqquneqanngilaq, Kim Kielsen tikkuaavoq.

Nunatsinni tuttut uumasuaraannik inuit tunillanneqarsinnaanerannut aarlerinaat annikitsuaqqatut Aalisarnermut Piniarnermullu Naalakkersuisoqarfimmit nalilerneqarsimavoq.

- Tuttup tunillanneqarsimasup neqaa uulluarneqanngitsoq nerigaanni sarcocysterit inunnut tuniluussinnaapput, tamannali nalinginnaasuunngilaq aamma nunatsinni inunnik tunillanneqarsimasunik nalunaarsuisoqarsimanngilaq.

Qimminut nerukkaatissaq

Neqi uunneqarani uumasuaralik qimminut nerukkaatigineqassanngilaq, qimmit uumasuaqqanik pinngortitami siammartereqataalissammata, taamaalilluni tuttut amerlanerit uumasuaraqalissallutik. Neqip ilua 75°C-mut uunneqarsimasoq qimminut nerukkaatissatut atorneqarsinnaasoq paasissutissiissutaavoq.

- Tuttup neqaa uumasuaralik tamanut saqqumiinnartumik pinngortitamut qimaannarneqaqquneqanngilaq. Neqip uumasuarartai assersuutigalugu terianniat qimmilluunniit aqqutigalugit tuttunut amerlanerusunut siammarterneqarnissaat pinngitsoortinniarlugu neqi naammaginartumik peersinneqartariaqarpoq nunamut matoorunneqarluni ikuallanneqarluniluunniit (qaqqamiunngitsorli, ilaatigut ikuallattoqarsinnaammat). Periarfissaatillugu neqi ikuallaavimmut qaninnermut tunniunneqarnissaa innersuussutigineqarpoq.

Sullineq niviukkanut assingusoq arnamik tunillaasimasoq

Sullinerit niviukkanut assingusut amermiittartut qaqutiguinnaq inunnut tunillaassuisinnaasut paasissutissiissutaavoq, tassa sullineq ataaseq ajutoornikkut inummi manniliussagaluarpat. Nalinginnaasumik uumasuni, soorlu tuttuni umimmannilu manniliortarput.

- Inuk ataasiinnaq myiasiseqartoq (sullinermit tunillanneqarsimasoq) 2014- imi Ilulissani nalunaarsorneqarpoq, tassani arnap inuusuttup niaquata qaavani amermi quperloqalersimalluni. Tuttumik umimmammilluunniit arnaq attugaqarsimanngilaq, taamaammat uumasunit taakkunanit tunillanneqarsimanissaa ilimagineqanngilaq. Sullineq ataaseq kukkulluni arnap nujaani manniliorsimassasoq pasitsaanneqarpoq.

samfund inuiaqatigiit

ATORFIIT Se alle jobs

Powered by Labrador CMS