Vancep tikeraarnerata kingorna USA-p Pituffimmi sakkutooqarfiup pisortaa soraarsippaa
Pituffik Space Basimi sakkutooqarfiup pisortaata, sakkutooqarfimmut siuttuusinnaanera USA-p tatiginngilaa.
Susannah Meyers (saamilleq) vicepræsidentimik J. D. Vancemik nulianillu Usha Vancemik, taakku nunatsinnut tikeraarneranni oqaloqatiginnippoq.
Assi: Jim Watson/Reuters/Ritzau Scanpix
Susannah Meyers, Pituffik Space Basemi pisortaasoq, soraarsitaavoq.
Taama Amerikamiut sakkutuui oqaaseqarnerminni ilisimatitsipput. Taama Berlingske allappoq.
“Sakkutooqarfimmik siulersortaanissaanut tatiginninnginneq” patsisaavoq.
- Sakkutuut pisortaat qanoq pissusilersornissaminni piumasaqaatinik qaffasinnerpaanik naammassinninnissaannik naatsorsuuteqarfigineqarpoq, ingammik suliassaminnik naammassinninnermut atatillugu arlaannaannulluunniit attuumassuteqannginnissaq pineqartillugu, taama sakkutuut allapput.
Pituffik Space Base siusinnerusukkut Thule-basiuvoq, marsillu naalernerani Amerikamiut vicepræsidentiata J. D. Vancep tikeraarnera aalassassimaartitsilerpoq.
Vancep oqaaseqaatai isumaqatiginngikkai
Sivikitsumik tikeraarnermi, aamma Sisimiuni qimussersuaqarnerani takuniaanermik ilaqartussaagaluartumi, Vancep Danmarkip Kalaallit Nunaanni suliniutai annertuumik isornartorsiorpai.
- Danmarkimut oqariartuuterput paasiuminartupilussuuvoq: Iluamik suliaqanngilasi. Inuiannut kalaallinut taakkulu isumannaatsuunissaannut annikippallaamik aningaasaliivusi. Tamanna allanngortinneqassaaq, taanna ilaatigut sivikitsumik tikeraarnermi nalaani oqarpoq.
Military.com naapertorlugu tikeraarnerup kingorna Susannah Meyers Pituffik Space Basemi sakkutuunut e-mailimik nassiussivoq, tassanilu Vancep oqaaseqaatai isumaqatiginagit allappoq.
- Ullutsinni politikimik ingerlatsinermut ilisimasaqartutut imminut nittarsaannianngilanga, nalunngisaralu tassaavoq, Amerikamiut naalakkersuisuisa aarlerissutaat, vicepræsident J. D. Vancep tallimanngormat oqaluuserisai, Pituffik Space Basemi pisunik ersersitsisuunnginnerat, Military.com naapertorlugu taanna taama allappoq.
Amerikamiut sakkutuuisa e-mailip imarisaa uppernarsaraat, tusagassiorfik allappoq.
Tikeraarneq nakkutilliineq pillugu oqaaseqarnerup kingorna pivoq
Amerikamiut præsidentiata Donald Trumpip, arlaleriarluni Kalaallit Nunaannik nakkutiginnilernissamik oqaaseqartarnerata kingorna, Vance tikeraarpoq. Taassuma aamma sakkutuulersornissaq tunuartinngilaa.
Pituffik Space Base 1952-mi sananeqarluni naammassivoq, taamanikkullili USA-p Kalaallit Nunaanniinnini attappaa.
Qanga USA tuusintilikkaanik sakkutooqarfimmi sakkutooqarpoq. Ullumikkulli sakkutuut 150 missaat taavaniipput.
Danmarkip USA-llu 1951-mi illersornissaq pillugu isumaqatigiissutaat naapertorlugu, USA Kalaallit Nunaanniinnissamut annertuunik sinaakkutissaqarpoq.
