Visit Greenland nunarsuarmut nittarsaassivoq
Visit Greenlandip suliassaasa pingaarnersaat tassaavoq nunatsinni takornariaqarnermik siuarsaanissaq, 2023-milu nunami maani nunanilu allani suliniuterpassuit ingerlappai.
Assiliisoq: Visit Greenland
2023 Visit Greenlandimut ulapaarfiuvoq, upernaarlu takornariaqarneq pitsaanerulersinniarlugu ataatsimeersuarneq ingerlammassuk nuna tamakkerlugu 100-nit amerlanerusut peqataapput, tassanilu takornariartitsisartut ataatsimut oqariartuutaat saqqummiunneqarput.
- Piujuartitsisumik takornariartitsinerup pisariaqartinneqarnera, najukkami tunngaviliineq, Kalaallit Nunaata kulturianik ataqqinninneq, piginnaasanik sulisunillu pisariaqartitsineq kiisalu ataqatigiissumik aqutsinerup attaveqaatinillu ineriartortitsinerup pingaaruteqarnera tusarliussat pingaarnerit ilagaat. Tusarliussat taakku Naalakkersuisut takornariartitsinermut 2023-2024-mut ikaarsaariarnermut periusissiaanni ilanngunneqarput, siunissamilu suliniutinut aallaavioqqissallutik, ukiumoortumik nalunaarusiami aqutsisut nalunaarutaanni ilisimatitsissutigineqarpoq.
Suliniuterpassuit
Aqutsisut nalunaarusiaanni sukumiisumi ukiumi qaangiuttumi Visit Greenlandip suliniuterpassui allaatigineqarput:
Nunanit tamalaanit takornarialerisut ataatsimeersuarnerini aqqanilinni peqataaneq, tassani nunani tamalaani angalatitsisut suleqatigisallu suleqatigiinnissamut isumaqatigiissuteqarfigineqarsimallutik.
Kinami takornariaqarneq pillugu isumasioqatigiinnermut Naalakkersuisut aaqqissugaannut peqataaneq
Tusagassiortut 70-init amerlanerusut Visit Greenlandimit aningaasaliiffigineqarlutik Kalaallit Nunaannut tikeraarput, Kalaallit Nunaat takornariarfissatut tusagassiuutit nittarsaassiffiginiassammassuk. Tusagassiortut ilaatigut makkuninngaanneerput: Danmark, Sverige, Norge, Tuluit Nunaat, Island, Frankrig, Tyskland, USA, Italia, Holland, Schweiz, Polen aamma Belgia. Tusagassiortut angalaneranni sammineqartut pingaarnerit tassaapput ukiukkut sammisassat, arsarnerit, kaperlak, sermersuaq, sermeq iigartartoq, iluliarsuit, nerisassat nerisassiornerlu, naasut, kulturi, niviugaasalerluni qissattarneq, nunami pisuttuarneq, savaateqarneq, angalanermut atuakkat, qajartorneq, silap pissusiata allanngoriartornera, illuliorneq, eqqumiitsuliorneq uumasullu.
Vestnordenimi angalaneq pillugu ataatsimeersuartoqarneranut atatillugu Air Greenland aamma Visit Greenland nunanit tamalaanit takornariartitsisartut qulit angalanissaannut aaqqissuussipput. USA-mit, Tysklandimit, Hollandimit, Frankrigimit, Kinamit, Sverigemit, Australiamit, Schweizimit Brasiliamillu angalasut peqataapput. Ulluni tallimani Qeqertarsuup Tunuani takornariartitsisarnerit misigisassarsiornerillu sammineqarput.
2023-mi Skandinavia, Tyskland, Frankrig, Tuluit Nunaat aamma Amerika Avannarleq pillugit tuniniaanermik misissuinerit tallimat annertuut Visit Greenlandip aallartippai. Misissuinerit inerneri nalunaarusiamut katersorneqarput, videonillu takornariartitsisarnermut tunngasunik arlalinnik ilaneqarpoq. Niuernikkut ineriartornissamut takornariartitsisartut pitsaanerpaamik periarfissaqalernissaat, nunanilu tamalaani takornariartitsisartut Kalaallit Nunaata takornariarfissatut ineriartortinnissaanut tuniniaanissaanullu periarfissanik ilinniartinnissaat siunertaavoq.
Umiarsuarnik takornariartaatinik takornariartitsisarneq pillugu paasissutissanik katersineq, innuttaasullu takornariartitsinermut isiginnittaasiat pillugu misissuineq innuttaasunit 2000-init peqataaffigineqartoq, takornariaqarnermut suliniaqatigiiffiup suliniutaanut ilaapput.
Allaffik matusoq
Aaqqissuusseqqinnermut atatillugu ukioq manna marsip aallaqqaataani Københavnimi allaffik matuneqarpoq. Piffissaq tamaat sulisut 13-iusimapput.
2023-mi Namminersorlutik Oqartussanik kiffartuussinissamut isumaqatigiissummut atatillugu 17,3 millionit koruuninik Visit Greenland tunineqarpoq, taakkunannga millionit affaat Kalaallit Nunaata North Atlantic Tourism Associationimut ilaasortaaneranut immikkoortinneqarsimallutik, 1,6 millionillu nunaqarfinni isorliunerusunilu misigisassarsiornermut eqqumiitsuliornermullu atorneqarlutik.
Ukiup siuliani 949.000 koruuninik amigartooruteqarneranut sanilliullugu siorna 370.000 koruuninik sinneqartooruteqarsimavoq. Sinneqartooruteqarnissaq siunertaanngitsoq, aningaasaliissutilli pitsaanerpaamik atornissaat siunertaasoq, aqutsisut nalunaarusiaanni erseqqissarneqarpoq. Tamanna tunngavigalugu angusat siulersuisunit naammagisimaarneqarput.
2024-mi pingaartitat
2025-mit 2035-mut atuuttussamik takornariaqarnermut pilersaarusiornissaq ukioq manna Visit Greenlandip pingaartippaa. Takornarialerisut, Kalaallit Nunaanni innuttaasut Naalakkersuisullu qanimut suleqatigalugit pilersaarut suliarineqarpoq.
- Akisussaassuseqartumik takornariartitsinermik, avatangiisinik illersuinermik kulturimillu ataqqinninnermik tunngavilimmik ineriartornermik nutaaliornermillu siuarsaasumik periusissiornissaq anguniagaavoq, nalunaarusiami allassimavoq.
- Takornariartitsinermi pitsaassutsimut isumannaatsuunermullu najoqqutassiat qaffassarniarlugit, 2024-mi pingaarnertut sammisassat ilagaat nuna tamakkerlugu allagartamik akuersissummik aaqqissuussamik ineriartortitsinissaq. Tamanna takornariat misigisaqarluarnerannut pitsanngorsaaginnassanngilaq, aammali Kalaallit Nunaata takornariarfiulluartutut tatiginarnerunissaanut iluaqutaassaaq, nalunaarusiami allassimavoq.
