Vivian: Aalajangiisinnaassuseqannginnitsinni sanngiilliorpugut
Naalagaaffinngornissamut nunanullu allanut naalakkersuisuugallartoq Vivian Motzfeldt (S) uppernarsaavoq Amerikamiut tikeraarnissaannut atatillugu Naalakkersuisuugallartut saaffigineqarsimasut naapeqatigiinnissaq siunertaralugu. - Ilisimatippagut nunatsinni qinersinerit ingerlanerini aammalu tamatuma kingorna isumaqatigiinniarnissat pillugit pisortatigoortumik iliuuseqarsinnaata, taanna erseqqissaavoq.
- Inatsisartunut kommuninullu qinersinerup nalaani qinersereernermilu suleqatissarsiuleruttorfimmi avataaniit saaffiginnittunut iliuuseqarsinnaannginnerput amerikamiunut ilisimatitsissutigineqareeraluarpoq, taamaattorli aalajangiissuseqarsinnaanngiffitsinni putoqquffiusinnaasut tamarmik atorniarneqarpasipput, Vivian Motzfeldt oqarpoq.
Assiliisoq: Leiff Josefsen
Nunatsinni piffissami matumani polikkikkut inissisimaffik tassaavoq aalajangiisinnaassusilinnik naalakkersuisoqannginneq.
Tamannalu inuiaqatigiinnut sanngiillisaataasoq Siumup siulittaasua aammalu naalagaaffinngornissamut nunanullu allanut naalakkersuisuugallartoq isumaqarpoq:
- Inuiaqatigiittut nukittuumik avataanit kimigiiserfigineqarnerput akiorsinnaassagutsigu piaartumik politikkikkut siunnerfilimmik aalajangiisinnaassusilinnik naalakkersuisoqarnissarput isumannaarneqartariaqarpoq, taamaattoqanngippat inuiaqatigiittut sanngiiffigut atorlugit avataaniit (amerikamiit, aaqq.) kimigiiserfigineqarnerput sakkortusigaluttuinnassaaq aammalu putussarsiuilluni nunatsinnut pulaterneq sakkortusigaluttuinnassaaq, soorlu tamanna maanna takugipput Avannaata Qimussersuanut tunngatillugu, Vivian Motzfeldt (S) oqarpoq.
Naalakkersuisuugallartut iliuuseqarsinnaanngillat
Apeqqutigigatsigu Naalakkersuisut pisoq kingulleq pillugu, tassa amerikamiut naalakkersuisoqarfiani qaffasissumik inissisimasut nunatsinnukarniarnerat pillugu qanoq iliuuseqarsimanersut, Vivian Motzfeldt erseqqissaavoq Naalakkersuisuugallartut allamik iliuuseqarsinnaanngitsut taamaallaat ilisimatsitseqatigiissinnaasut.
Nunanut allanut sillimaniarnermullu ataatsimiititaliaq arlaatigut akuutinneqarpa?
- Naamik, oqareernittut naalakkersuisuugallartutut iliuuseqarsinnaanngilagut aalajangiisinnaassuseqarnatalu, unalu tikeraarniarneq nammineq soqutigisat naapertorlugit inuttut angalanerussasoq oqaatigineqarpoq, taamaammat iliuuseqarsinnaanngilagut. Taamaallaat paasissutissat uagutsinnut apuunneqartut tusaatissatut tiguinnarsinnaavagut allamillu iliuuseqarata. Taamaammanuna pingaaruteqartoq piaartumik aalajangiisinnaassusilinnik naalakkersuisoqalernissarput, Vivian Motzfeldt erseqqissaavoq.
Aningaasaliisut kikkuuppat qanorlu piumasaqarpat?
Ilisimaneqalereersutut amerikamiut kikkuusimagaluarnersut amerikamiut Nuummi aallartitaqarfiat aqqutigalugu Kalaallit Nunaanni Qimussertartut Kattuffiannut tapiissuteqarsimapput, tamannalu aamma Naalakkersuisuugallartunut ilisimatitsissutigineqarsimavoq:
- Aningaasaliisut kikkulluunniit piumasaqaatitaqanngitsumik imaluunniit arlaatigut utertitsiffigineqarnissamik naatsorsuutitaqanngitsumik aningaasaliineq ajorput. Paasitinneqarpugullu Kalaallit Nunaanni Qimussertartut Kattuffiat ukiuni arlalinni atuuttussamik aningaasatigut tapersersorneqarnissaat amerikamiut kikkuugaluarnersut qimussertartullu kattuffiata akornanni isumaqatigiissutigineqarsimasoq, tamannalu ernumanissamik annertuumik pilersitsivoq, inuiaqatigiittummi ingerlanitsinnut siunniussimasatsinnullu sanngiillisaanermik kinguneqarsinnaammat.
Inuiaqatigiittut pingaartitat imaluunniit aningaasat ajornanngitsut
Vivian Motzfeldtip innersuussutigaa piffissami matumani nunatta aalajangiisinnaassuseqannginnermigut sanngiilleqqanerani, sunniiniarneq aningaasanik ajornanngitsunik tunioraaniartoqarneratigut ajornannginnerulersinneqartoq:
- Inuiaqatigiittut pingaartitagut ataatsimoorussagullu maanna mangiarneqalersutut isikkoqarput, sanngiiffigut nakkutigineqaqqissaarput aammalu putoqquffissarsiortoqarluni. Taamaammat pingaaruteqarpoq pisariitsumik aningaasanik aningaasanilluunniit nalilinnik ajornanngitsumik "tunniussuiniarneq" nalaatissagaanni eqqarsaqqissaarnissaq, qanormi kinguneqassanersut nalulluinnarparput, tassami tunniussisut naatsorsuuteqartuaannarput utertitsiffigitissallutik namminneq soqutigisaminnut naapertuuttumik.
