NAALAKKERSUISOOQATIGIINNISSAMUT ISUMAQATIGIINNIARNERIT
Vivian: – Immitsinnut ungasippallaarpugut
Siumup siulittaasuata, Vivian Motzfeldtip Demokraatit peqatigalugit naalakkersuisooqatigiilersinnaanissamut isumaqatigiinniarnerit taamaativinngilai. Taamaattorli isumaqatigiinniarnermi tunngavissat maannamut takusani naapertorlugit Motzfeldtip isertuutinngilaa Siumup maannamut takusimasai naapertorlugit politikkimut ungasippallaarlutik.
Assi: Leiff Josefsen
Siumup siulittaasuata, Vivian Motzfeldtip uppernarsarpaa partiip maanna marloriarluni Demokraatit naapissimagai:
- Siumut aamma Demokraatit marloriarlutik maannamut ataatsimiissimanerat uppernarsarsinnaavara, aammalu maannamut takusagut tunngavigalugit naliliivunga immitsinnut ungasippallaartugut aammalu taamaalilluni ajornakusoorsinnaasoq politikkikkut ataatsimoortitsisinnaanissarput, kisianni takussavarput pingajussaanik ataatsimiinneq qanoq kinguneqarsinnaassanersoq, Vivian Motzfeldt Sermitsiamut oqarpoq.
"Arriippallaamik suliniartoqarpoq"
Partiit ungasippallaarnerannik Vivian Motzfeldtip naqissusiinermi saniatigut, taassuma erseqqissaatigaa nammineq isummani naapertorlugu naalakkersuisooqatigiilernissamut isumaqatigiinniarnerit arrippallaamik ingerlanneqartut:
- Demokraatit saqqummiussai takuagut tusarnaarlutalu, kisianni naliliivunga isumaqatigiinniutigineqarsinnaasut tigussaanngippallaartut annikippallaartullu, aamma iliuusissatut pilersaarutit amigaataammata, taamaammat qanoq iliortoqarniarnera suli ersarissinngilaq tigussaasunimmi isummerfigisassanik amigaateqaratta, taamaalillutalu nammineq politikkikkut tunngavitsinnut naleqqiullugu uuttoruminaatsitsigatta.
- Taamaattumik pisariaqartitsivugut paasissutissanik aammalu siunnerfigerusutanik amerlanerusunik tusagaqassalluta, uangalu isumaga naapertorlugu isumaqatigiinniarnerit sukkatsinneqartariaqarput, tassami innuttaasut nuna tamakkerlugu politikkikkut siunnerfigineqarniartut paasisaqarfigissallugit pisariaqartitsipput, Vivian Motzfeldt oqarpoq.
