Vivian: Pitsaanerusumik illersorneqarnissarput anguarput
Oktobarip qulinganni illersornissamut isumaqatigiissummut ilassutitut isumaqatigiissut 2 pillugu tamanut saqqummiisoqarneraniit nunatsinni oqallinneq sakkortuumik ingerlanneqarpoq. Politikkikkut isumaqatigiissummut tapersersuineq annertuvoq, tamannali peqatigalugu aamma mianersoqqussutit sakkortuut tusarsaapput, ilaatigut nunarput aatsaat taamak ulorianartorsiortinneqarneragaalluni. Tamatuma malitsigisaanik nunanut allanut tunngasunut Naalakkersuisup Naalakkersuisullu siulittaasuata eqqissisaasariaqalerneranik kinguneqartumik.
Assiliisoq: Oscar Scott Carl
Saammaasseqatigiinnertaqanngiusartumik inuit attaveqaqatigiittarfiini allakkatigut takussutissiatigullu sorsunnertut ittumik inuiaqatigiinni oqallittoqarpoq, innuttaasut mianersoqqussutitut ittunik killeqanngiusattumik siammarteriffigineqarput Kalaallit Nunaata illersorneqarnera annikilllineragaalluni, aammalu Naalakkersuisut nunatsinni - pingaartumillu Nuummi - innuttaasut nunanit allanit saassunneqariaannanngorlugit inissisimalersissimagaat pisuutitsissutinik imaqartunik.
Taamaakkaluartoq Naalakkersuisut aalajangiusimavaat nunarput maanna pitsaanerusumik illersorneqartussanngortoq illersornissamut isumaqatigiissutip ilassutaa aqqutigalugu:
- Ukiorpassuit ingerlaneranni nunarput pitsaanerpaamik illersorneqarsimanngilaq. Assersuutigiinnarsinnaavarput umiatsiat tingerlaatersortut umiatsiaallu allat assigiinngitsut amerlasuut kangerlutsinnut pulatertarput, uagullu susoqarnersoq nalulluinnarlutigu, aammalu suna nunatsinnit annissortarneraat nalullutigu, maannakkorpiaq nakkutiginnilluarsinnaannginnatta taamaalillutalu nalullutigu susoqarnersoq.
Greenland Rangers
- Maanna isumaqatigiissut aqqutigalugu illersornissaqarfimmit pitsaanerusumik illersorneqartussanngorpugut nunattalu namminiussusia qulakkeerniarlugu killeqarfinnik nakkutilliineq qaffanneqartussanngorpoq, aamma minnerunngitsumik nunatta illersorneqarnissaanut inuiaqatigiittut peqataasinnaanerput annertusarneqartussanngorpoq, taamaalilluni sakkutuujunngitsut aamma nakkutilliinermi suleqataasinnaalertussaapput.
Vivian Motzfeldt taamak oqarnermini innersuussutigaa, illersornissaq pillugu isumaqatigiissutip ilassutaa aqqutigalugu ilanngullugu isumaqatigiissutaasoq Greenland Rangers atuutilersinneqarnissaa suliarineqassasoq, Naalakkersuisut aamma danskit naalakkersuisuisa Issittoq aamma Atlantikup Avannaani immikkoortup siulliani isumaqatigiissutaat malillugu. Maanna immikkoortup aappaani isumaqatigiiissut aqqutigalugu aalajangiunneqarpoq, misissuineq naammassineqassasoq, aammalu periusissat pillugit aalajangiineq 2026-mi pissasoq.
Tassa imaappoq nunatsinni sumiiffinni assigiinngitsuni, assersuutigalugu Qaanaami, Nanortalimmi Ittoqqortoormiinnilu, siunissami nunap illersorneqarnissaanut sakkutuujunngitsut nakkutilliinermi peqataasinnaalissasut.
Tassunga ilanngullugu isumaqatigiissutigineqarpoq umiarsuit alapernaarsuutit ilaat siunissami nunatsinnit aqunneqarlunilu ingerlanneqalissasoq, taamaalilluni nunarput nammineq naalagaaffiup killeqarfia illersorneqarnissaa qulakkeerniarlugu aammalu Kalaallit Nunaata imartaani aalisarnerup inatsisit naapertorlugit ingerlanneqarnissaa nakkutigineqarsinnaalissasoq.
Nunat tamalaat politikkikkut soqutiginninnerat USA-llu kimigiisernera
Taamaakkaluartoq oqaatigisariaqarpoq Danmarkimut Nunatsinnullu kimigiiserneq aamma ikinngutitsinnit pimmat, tassa USA-mit. Kalaallit Nunaat ilisimaneqartutut Amerikap avannarliup nunavittaata ilaaniippoq, USA-llu akeratoqarsua Rusland Issittumi annertuumik oqartussaaffeqarpoq, nunallu Issittumi sakkussiaqarnikkut annertusaanera annertusiartorpoq, aamma silap allanngoriartornera malillugu imaatigut angallavissat nutaat ammaraluttuinnarput pisuussutillu sermip ataaniittuarsimasut puttussuutilerput Issittumi sermip aakkiartornera ilutigalugu.
- Nunattali inissisimanerata nunat tamalaat akornanni soqutiginninnerup annertusiartornera ilutigalugu aamma pisariaqarluinnarpoq illersornissaqarfiup sulinerata atortorissaarutaasalu pitsanngorsarneqarnissaat, assersuutigalugu USA-p kimigiississutigaa nunarput ullumikkornit pitsaanerusumik illersorneqartariaqartoq, Danmarkimullu piumasarineqarluni nunap illersorneqarnissaa pitsaanerusumik isumagineqassasoq, taamaanngippat Kunngeqarfik piumappat piumanngippalluunniit nammineq nunarput tigoriarlugu aqutarilissallugu sioorasaarinikuuvoq.
- Ataatsimoortariaqarpugut
Vivian Motzfeldt Sermitsiamut isertuarani oqaluttuarpoq ilaatigut nammineq pisuutinneqarsimalluni Kalaallit Nunaannik navianartorsiortitsisutut aammalu Kalaallit Nunaannut sorsunnissamik aggersaasuuneragaasimalluni.
- Inuttut tamanna tigunngilara, uannut pingaarneruvoq ataatsimoorluta nunaqqativut illersorlugillu paarissagigut. Neriuutigaara ataatsimoorfigisinnaasatsinnik nassaassasugut, suliassami tassani pingaaruteqarluinnartumi avissaartuunneq pinngitsoorniarlugu, pingaartumik uagutsinnut naalagaaffiup issittortaani inuusunut pingaaruteqaarmat. Uagut immitsinnuinnaq pinnata, aammali kinguaariinnut tulliuttunut.
