Watson eqqartuussivimmi sassarteqqinneqassaaq
Arfanniarnermut akerliusoq Paul Watson parnaarussaaqqaannassanersoq pingasunngornermi Nunatsinni Eqqartuussiviup isummerfigeqqissavaa.
Paul Watson juulip 21-anili tigusarineqarami Nuummi tigummigallarneqarpoq.
Assi: Leiff Josefsen
Arfanniarnermut akerliusoq Paul Watson Japanimi eqqartuunneqassanersoq Inatsisinik atortitsinermut ministeriaqarfiup aalajangiinissaa suli utaqqineqarpoq.
Inatsisinik atortitsinermut ministereqarfiup aalajangiinera suli saqqummiunneqanngilaq, taamaattumik Paul Watson pingasunngornermi ullaap tungaani Nunatsinni Eqqartuussiveqarfimmi sassartitaaqqissaaq.
Paul Watson Inatsisinik atortitsinermut ministereqarfiup aalajangiinissaata tungaanut tigummigallarneqassanersoq eqqartuussiveqarfiup aalajangiiffigisussaavaa. Watson juulip 21-ani tigusarineqarpoq kingornalu tigummigallarneqarluni.
Taamanili tigummigallarneqarnera sivitsorneqaqattaarnikuuvoq. Unnerluussisussaatitaasut tunngavilersuisimapput inatsisinik atortitsinermut ministereqarfiup aalajangiinnginnerani Paul Watson iperagaassaguni qimaanissaa aarlerinartoq.
Akerlianilli Watsonip iperagaasariaqarneranik illersuisua tunngavilersuivoq, tassami suliaq, Japanip eqqartuussissutiginiagaa, ima ilungersunartiginngimmat Watsonip taama sivisutigisumik Nuummi tigummigallagaaqqaneranut naapertuunnani.
Watson 2010-mi Sikuiuitsumi kujallermi arfanniummik ajoqusiisimasutut arfanniallu sulinerinik akornusersuisimasutut Japanimit unnerluunneqarpoq. Aamma arfanniap ajoquserneqarneranut peqataasutut unnerluutigineqarpoq.
Paul Watson 73-inik ukiulik Ritzauimut oqarpoq tunniunneqassaguni naapertuilluanngitsumik eqqartuussisoqareerpat inuunermi sinnera Japanimi parnaarussaasinnaalluni.
