Yellow September: Imminut toqunnerup pinaveersaartinnissaanut suleqatigiittariaqarpugut
Nuna tamakkerlugu imminut toqunneq pinaveersaartinniarlugu suliniuteqartut 23-t Paarisamit tapiiffigineqarput. Sisimiuni pisussanik assigiinngitsunik aaqqissuussisoqarpoq.
Sisimiuni imminut toquttarnerup pinaveersaartinnissaa eqqumaffigineqarnissaa siunertaralugu septembarip qulingani arpatsitsisoqarpoq.
Assi: Qeqqata Kommunia
Septembarip qaammataa "Imminut toquttarnerup pinaveersaartinnissaanut qaammatitut“ taaneqarpoq. Qalipaat sungaartoq imminut toquttarnerup pingaveersaartinneqarneranut tunngatinneqarpoq, qalipaammi neriuummut, qaamanermut kissalaamullu takussutissiivoq. Taamaattumillu qaammat Yellow Septembarimik aamma taaneqartarluni.
Paarisap suliniut siorna perngaammik peqataaffigaa, ukioq mannalu aamma iluatsilluartumik aaqqissuunneqarpoq. Imminut toquttarnerup pinaveersaartinnissaa siunertaralugu nunami sumiiffinni assigiinngitsuni aaqqissuussiniarlutik Paarisamut tapiiffigineqarnissamik qinnuteqartut katillugit 23-upput.
Qeqqata Kommunia aamma tapiiffigineqarpoq, Sisimiunili qaammammi tamatumani aaqqissuussanik assigiinngitsunik pilersaarusiortoqarpoq.
Septembarip qulingiluaani naalagiaqatigiittoqarnerani naneruutinik ikitsisoqarlunilu minutsi ataaseq nipaallisimasoqartoq, pinaveersaartitsinermut siunnersorti Nuka Olsen oqarpoq.
- Inuppassuit oqaluffimmeeqataapput, oqarpoq.
Aammattaaq sisoraatinik arpattartoqatigiit, meeqqat tamat oqartussaaqataanerannik suliniaqatigiiffik aamma Inuk Coaching Consulting peqatigalugit aaqqissuussisoqarpoq.
Naneruummik ikitsineq erinarsoqatigiinnerlu
Sisimiuniinnaanngilarli mminut toquttarnerup pinaveersaartinnissaanik qaammammi matumani isammisaqarfiusoq.
Paarisap paasissutissiineratut Avannaata Kommuniani illoqarfiit nunaqarfiillu arfineq-marluk tapiiffigineqarput. Qeqqata Kommuniani Sisimiut saniatigut illoqarfiit nunaqarfiillu marluk tapiiffigineqarsimapput. Kommune Qeqertalimmi pingasu Kommune Kujallermilu marluk.
Kujataani septembarip qulingani unnukkut oqaluffimmi naneruummik ikitsisoqariarluni kaffisoqatigiinniarluni atuarfiliaqatigiittoqarpoq.
Kangaamiuni iliveqarfimmukaapput, tassani erinarsoqatigiit pingasunik atuipput, peqataasullu nerisassanik imigassanillu nassataqarput.
Maniitsumi pisuttuaatigaluni oqaloqatigiittoqarpoq, illoqarfiup qeqqani nipilersortoqarnissaa inuunermilu atukkat pillugit oqalugiartoqarnissaa pilersaarusiorneqarpoq.
Illoqarfinni tamani qalersat sungaartut
TUSAANNGA
Imminut toqunnissamik eqqarsaateqaruit eqqarsaatitit pillugit Tusaannga attavigisinnaajuaannarpat.
Kinaassutsit isertuullugu ulloq unnuarlu akeqanngitsumik sianersinnaavutit. Oqarasuaat: 80 11 80. SMS: 1899.
Septembarip qulingat nunarsuaq tamakkerlugu imminut toquttarnerup pinaveersaartinnissaanut WHO-p ullorititaraa.
Taamaattumik Sisimiuni SSP, sisoraatinik arpattartut peqatigiiffiat suleqatigalugu, ilaqutariittut arpatitsimmat inuit 20-t missaanniittut takkupput, Nuka Olsen oqarpoq.
Inuk Coaching Consulting innuttaasunut 16-ileereersunut septembarip 23-ani workshoppertitsivoq. Paarisamit tapiissutit tassunga atorneqarput. Tassani akuerinninnissaq akiuussinnaanerlu sammineqarput.
Meeqqat tamat oqartussaaqataaninngaanneersut qisunnik qalersatut isikkulinnik ilusilersuipput.
- Sungaartumik qalipappavut illoqarfimmullu assigiinngitsunut iliorarlugit - pisiniarfiit, napparsimmaviup oqaluffiullu saavani, Nuka Olsen oqarpoq.
Siorna aamma taamaaliorsimapput, allagartallu qaammat naallugu takuneqarsinnaasimallutik.
Nuka Olsenip imminut toqunnissamik pinaveersaartitsinerup pingaartinnissaa pingaartippaa.
- Imminut toquttarneq pineqaraangat soorunami artornartarpoq. Eqqaamavagut, tamannalu annernarpoq.
- Neriuppugut taamatut pisoqaqqinnavianngitsoq, oqarpoq.
