Yellow September – imminut toquttarneq pinaveersaartinniarlugu aallartinneqarpoq
Qaammammi septembarimi paasititsiniaanerup ’Yellow September’-ip imminut toqunnissamik pinaveersaartitsinerup eqqumaffigineqarnera annertunerulersissavaa, tassani najukkani aaqqissuussinerit ingerlanneqarnissaannut sineriammit qinnuteqarsimasut 18-it Paarisap imminut toqunnissamik pinaveersaartitsinermut aningaasaliissutaannit tapiiffigineqassapput, taamak tusagassiuutitigut nalunaaruteqarpoq meeqqanut inuusuttunullu naalakkersuisoqarfik
Meeqqanut Inuusuttunullu Naalakkersuisoq, Aqqaluaq Biilmann Egede (IA) assimi sungaartumik orseqarpoq, taanna tassaavoq "Yellow Septembari" Paarisap imminut toquttarnermut pinaveersaartitsinermut atatillugu suliniutaa ullumikkut aallartittoq.
Assiliisoq: Naalakkersuisut
Ukioq manna Paarisap nuna tamakkerlugu paasititsiniaaneq "Yellow September" ilisaritissavaa, "Yellow September" suliniutaavoq Qamani – Imminut toqunnissamik pinaveersaartitsineq pillugu periusissiaq 2023-2028-mik atulersinneqarneranut ilaasoq, taamak tusagassiuutitigut nalunaaruteqarpoq Meeqqanut Inuusuttunullu Naalakkersuisoqarfik.
Yellow Septemberip malunnartinniarneqarnerani inunnut imminut toqunnissamik eqqarsaateqartunut, qanigisaannut qimagaasimasunullu saaffiginninnissamut periarfissaasa saqqummiunnerisigut imminut toqunnissamik pinaveersaartitsineq eqqumaffigineqarnerulissaaq.
Najukkani aaqqissuussinerit
Aaqqissuussinerit arlallit Paarisap imminut toqunnissamik pinaveersaartitsinermut aningaasaliissutaannit tapiiffigineqartut aqqutigalugit septembari naallugu sammisaq ukkatarineqassaaq.
TUSAANNGA
Imminut toqunnissamik eqqarsaateqaruit kiserliortutulluunniit misigiguit Tusaannga attavigisinnaavat.
Tusaannga ulloq unnuarlu ammasarpoq, kinaassutsimik isertuussiffiuvoq akeqarnanilu
- Oqarasuaat: 801180
- SMS: 1899
Sineriammi suliniutinit assigiinngitsunit 18-init aaqqissuussinerit ingerlanneqarnissaannut aningaasaliiffigineqarsimapput, aaqqissuussinerit ataatsimoortitsinernik siuarsaassapput imminullu toquttarneq eqqarsartaatsikkullu peqqissuseq pillugit ammasumik oqallitsilissallutik.
- Nunarsuaq tamakkerlugu pinaveersaartitsineq nunami maani siullerpaamik malunnartinniarneqalerpoq, tamannalu imminut toqunnissamik eqqarsaateqarlutik eqqugaaqqasunik imminullu toqoreernerup kingunerisaanik qimagaasimasunik ataatsimoorutta pitsaanerpaamik ikiuisinnaanerput pillugu ersarissumik oqariartuuteqarpoq” taama oqarpoq Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq Biilmann Egede (IA).
Yellow September nunarsuaq tamakkerlugu nunani arlalinni ingerlanneqartarpoq, qalipaammut sungaartumut pitsaassuseq, nuannaarneq aamma neriulluarneq attuumassuteqartarnera pissutaalluni Yellow September sungaartumik ilisarnaateqarpoq.
Septembarip ingerlanerani Paarisap Facebookimi quppernermini imminut toqunnissamik pinaveersaartitsineq pillugu paasissutissanik nutartikkanik ilisimasanillu ingerlaavartumik avitseqateqartarumaarpoq.
Tamatuma saniatigut inuit assigiinngitsunik kinaassusillit Yellow September pillugu ilisimasaminnik siammartereqataasarniarput.
Paarisa.gl-imi Yellow September aamma Qamani pillugit atuagaqarnerugit.
