Zelenskyj Mette F.-imik oqaloqateqareerluni: Rusland-ip allannguuteqannginnera takusinnaavarput
Piffissami matumani naalagaaffiit attaveqaqatigiinnerannik suliaqarnermik ulapaarfiuvoq, Ukrainemi præsidenti Mette Frederiksenimik oqaloqateqareerluni taamak oqarpoq.
Ukrainep præsidentia, Volodymyr Zelenskyj, aamma ministeriuneq Mette Frederiksen aasap ingerlanerani siusinnerusukkut Aarhusimi naapipput. Arfininngornermi oqaloqatigiissimallutik Zelenskyj X-imi allappoq.
Assiliisoq (Toqqorsivimmit): Ida Marie Odgaard/Ritzau Scanpix
Ukrainemi præsidentiata, Volodymyr Zelenskyjip, arfininngornermi ministeriuneq Mette Frederiksen (S) oqaloqatigaa.
Oqaloqatigiinnerminni eqqartorpaat Ukrainemi sorsunneq Ruslandillu inissisimanera.
Taamak Zelenskyj attaveqaqatigiiffimmi X-mi allappoq.
- Ruslandip inissisimanerani allannguuteqartoqanngilaq - russit toqoraanertik suli unitsikkumanngilaat, suli sorsunnermut aningaasalersuipput aamma suli ukrainemi nunaminertanik "paarlaasseqatigiinnissamik" isumassarsiartik ingerlateqqippaat, Zelenskyj ilaatigut allappoq.
Zelenskyj allappoq, nammineq Mette Frederiksenilu "naalagaaffiit akornanni attaveqaqatigiinnerup inissisimanera illuatungeriillu attaveqaqatigiinnerat" eqqartueqatigiissutigisimagitsik.
- Ulluni makkunani naalagaaffiit akornanni attaveqaqatigiinneq qaffasissupilussuuvoq, præsidenti allappoq.
Mette Frederiksenip oqaloqatigiinnerup kingorna erseqqissarpaa "ataavartumik aaqqiissutissat suulluunniit Ukrainemi naalagaaffiup kiffaanngissusianik ataqqinninnermik aallaaveqartariaqartut".
- Danmarkimit suleqatigut peqatigalugit sorsunnermik unitsitsiniarluni isumaqatigiissut attapparput, taannalu aallaaveqassaaq Ukrainep nukittuumik inissisimanissaanik, nunat killiit ataatsimoornerannik aalajangiussisimanerannillu,, X-mi oqaaseqarnermi erseqqissaatigineqarpoq.
Zelenskyj Frederiksenilu oqaloqatigiinnerat pivoq, USA-p præsidentiata, Donald Trumpip, Ruslandillu præsidentiata, Vladimir Putinip, naapinnissaat uppernarsarneqareersoq.
Naapinneq pissaaq aggustip 15-iani Alaskami, tassani Ukrainemi sorsunneq oqaluuserineqassaaq.
Manna tikillugu paasisat naapertorlugit Zelenskyj naapinnermut qaaqquneqassanersoq ilisimatitsissutigineqanngilaq.
- Alloriarnigut tamarmik sorsunnerup ilumoortumik unitsinneqarnissaanut qanillattuutaassapput, sorsunnerullu allanngortinneqaannarnissa pineqassanngilaq. Suleqatitsinni ataatsimoorussamik aalajangiinerit ataatsimoorussamik isumannaatsuunissatsinnut iluaqutaassapput, Ukrainep præsidentia allappoq.
Zelenskyj allappoq, "qujamasuppunga tapersersuinermut".
USA-mi Ruslandimilu præsidentit naapinnissaat Donald Trumpimit tallimanngornermi unnukkut kingusissukkut uppernarsarneqarpoq.
Tallimanngornermilu siusinnerusukkut Trump oqarpoq, "nunap immikkoortuisa allanngortinneqarnissaat pissasoq" tamannalu Ukrainemut Ruslandimullu iluaqutaassasoq, apeqqutillu tassunga tunngasut oqaluuserineqassasut.
Taanna erseqqissumik nassuiaateqanngilaq, suna pineqarnersoq.
Ruslandip siornatigut piumasarisimavaa, Ukrainemi Krimip qeqertaa aammalu Ukrainemi nunap immikkoortortai Donetsk, Luhansk, Zaporizjzja aamma Kherson russit nunataatut akuerineqassasut, Ukrainemi eqqissineqassappat.
Arfininngornermi ullaakkut Zelenskyj X-imi allappoq, eqqissinissamut isumaqatigiinniarnerni Ukraine nunaminertanik tunniussaqassanngitsoq.
Ukrainemi sorsunneq pillugu oqaloqatigiinnerup saniatigut Ukrainep taassumalu sanilerisaata Moldovap EU-mut ilanngunnissaanut periarfissat Zelenskyjip aamma Mette Frederiksenip oqaluuseraat.
- EU-mut ilaasortanngornissamut sulinivut aamma Ukrainemi Moldovamilu ingerlariaqqinnerit eqqartorpagut, Zelenskyj allappoq.
