Zelenskyj: Putinimut nassuernissaq imminut toqunnerussaaq
Naammattumik sakkussiaateqartariaqarpugut, isumaqatigiinniarnerni tapersersorneqartariaqarnata, Zelenskyj EU-mi siuttunut Budapestimi ataatsimeersuarnermi oqarpoq.
Sisamanngornermi Budapestimi EU-p nunat siuttui ataatsimeersuarneranni Ukrainep præsidentia Volodymyr Zelenskyj qallunaallu ministeriunerat Mette Frederiksen (S) oqaloqatigiipput.
Assiliisoq: Marton Monus/Reuters
Ukrainemi sorsunneq unitsinniarlugu Ruslandimut Ruslandillu præsidentianut Vladimir Putinimut nassuerneq Europamut tamarmut „imminut toqunnerussaaq“.
Taama oqarpoq Ukrainep præsidentia Volodymyr Zelenskyj sisamanngornermi Ungarnip illoqarfiisa pingaarnersaanni Budapestimi EU-p siuttuinut ataatsimeersuartunut.
- Ilasi maaniittut Ukrainep Putinimut ’nassueruteqarnissaanik’ sakkortuumik oqariartuuteqarput. Tamanna Ukrainemut akuerineqarsinnaanngilaq, Europamullu tamarmut imminut toqunnerussaaq,’ nutaarsiassaqartitsivik TT naapertorlugu Zelenskyj oqarpoq.
Nutaarsiassaqartitsivik AFP taama allappoq.
Putinip piumasaraa eqqissinissamik isumaqatigiinniarnerit aallartissappata Ukrainep kangiani kujataanilu nunaminerpassuit tunniutiinnarfiussasut.
Tamanna Zelenskyjip arlaleriarluni itigartitsissutigaa. Ukrainep taassumalu killermi iliisa arlallit ernummatigaat Putinip taamatut akissarsisinneqarnissaa saassussinermik kinguneqaannarumaartoq.
Sisamanngornermi Budapestimi ataatsimeersuarnerup nalaani Ukrainep præsidentiata Ruslandip Ukrainemut saassussinera akiorniarlugu nunap tapersersornerunissaanut ilini kajumissaaqqippai.
- Naammattumik sakkussiaateqartariaqarpugut, isumaqatigiinniarnerni tapersersorneqartariaqarnata. Putinimik tapersersuineq iluaqutaanngilaq. Ilassi maaniittut ukiut 20-t tapersersorpaat, ajorneruliinnarporlu, nutaarsiassaqartitsivik AFP naapertorlugu Zelenskyj oqarpoq.
Donald Trumpip marlunngornermi USA-mi præsidentinngortussatut qinersinermi ajugaanerata kingorna tapersersorneqarnerulernissamik kajumissaarut maannakkut pingaaruteqarnerulerpoq.
Trumpip Ukrainemut sakkutooqarnermut aningaasat milliardillit atorneqarnerat isornartorsiorpaa.
Siusinnerusukkut Zelenskyj oqarpoq USA-mit ikiorneqarsimanngikkuni Ukraine sorsunnermi ajorsareersimassagaluartoq.
EU-mi siuttuusut Budapestimi ataatsimiinneranni oqalugiarnermini nangilluni oqarpoq neriuutigalugu Donald Trumpip præsidentinngortussatut qinersinermi ajugaanerata kingorna USA nukittunerulerumaartoq.
Trumpip marlunngornermi qinersinermi ajugaanerata kingorna taakku marluk oqaloqatigiipallalaarput.
- Soorunami naluarput qanoq iliussanersoq, neriuppugulli Amerika nukittunerulerumaartoq. Amerika taamaattoq Europap pisariaqartippaa, TT naapertorlugu Zelenskyj oqarpoq.
Qineqqusaarnermini Trump arlaleriarluni oqarsimavoq „akunnerit 24-nit iluini sorsunneq unitsissinnaallugu“, qanorli taamaaliorsinnaanini oqaatiginngilaa.
Putinip oqaaseqartartua Dmitry Peskov sisamanngornermi oqarpoq Trumpip oqaasii Ruslandip maluginiarsimagai, naak „ Trumpip qanoq sukkatigisumik tamanna iluatsissinnaaneraa ingasaassivallaarsimagaluartoq“.
Reuters naapertorlugu Peskov oqarpoq: „Naalakkersuisoqatigiit nutaat sorsunnerup ingerlateqqinnissaa pinnagu eqqissineq kissaatigippassuk, tamanna naalakkersuisunut tunuartussanut sanilliullugu pitsanngoriaataassaaq.
Ruslandip piumasaraa Ukrainep ilii killermiut isumaqatiginninniarnermut peqataassasut sorsunnerup qanoq unitsinneqarsinnaanera eqqartorniarlugu.
/ritzau/
