2024 Kalaallit Nunaanni silaannakkut angallannermut immikkut ittuuvoq, maannalu 2025 unammilligassarpassuaqarlunilu periarfissarpassuassaaq. Juullikkunni Air Greenlandimukarluta ukiup nikinnerani qanoq inissisimanissaq pillugu pisortaq Jacob Nitter Sørensen aperigatsigu, suliassarpassuit taakkartorneqarput.
Ukiumi qaangiuttumi pingaarnersat aallarniutigisinnaavavut:
2024 Kalaallit Nunaanni silaannakkut angallannermut immikkut ittuuvoq, maannalu 2025 unammilligassarpassuaqarlunilu periarfissarpassuassaaq. Juullikkunni Air Greenlandimukarluta ukiup nikinnerani qanoq inissisimanissaq pillugu pisortaq Jacob Nitter Sørensen aperigatsigu, suliassarpassuit taakkartorneqarput.
Ukiumi qaangiuttumi pingaarnersat aallarniutigisinnaavavut:
– Maanga Nuummut mikkatta pisarninnit killitsinneroqaanga. Aqussinnaanngilluinnakkannik killitsippunga, inuillu tusindilikkaat takorluugaqarlutik siunissamullu neriuuteqarlutik takkussuuttut takugakkit qulliikka ulussakkut kuupput, Jacob Nitter Sørensen oqarpoq.
2024-mi novembarip 28-anni timmisartoq angisooq siulleq, Tuukkaq, Nuummut mimmat taamaattoqarpoq. Pisimasoq tamanna Air Greenlandip pisortaata aamma pingaarutilimmik sunniuteqarfigisimavaa.
– Ukiuni arfineq-marlunni ilungersorsimanera naggataatigut naammassineqarpoq. Timmisartortitseqatigiiffik inuiaqatigiinnit pigineqartoq 6-700 millionit koruuninik akilimmik timmisartusippat, taava ingerlalluartariaqarpoq, Jacob Nitter Sørensen oqarpoq.
Timmisartoq inuiaqatigiinnik tiguaasoq
Mittarfiit ukiup ingerlanerani sammineqangaarput. Nuummi mittarfik pilersinneqarmat Air Greenlandimut aamma ilungersunarpoq. Kangerlussuarlu Kalaallit Nunaanni silaannakkut angallannermi qitiusutut inissisimaffimminit tunuarniarluni piareersarpoq.
Inuillu malinnaasimapput, ilaatigut Sermitsiap nittartagaani, timmisartummi mittarfiillu pillugit allaaserisat nuannarineqarnerpaat ilagimmatigit. Nunami illoqarfiit nunaqarfiillu akornanni aqqusinernik atassuserneqanngitsumi silaannakkut angallanneq sammisaq soorunami pingaaruteqarpoq. Tamannali aamma inuit imminnut ilisarisimanerannik pissuteqarpoq, Jacob Nitter Sørensen erseqqissaavoq:
– Air Greenlandimi sulisartumik ilaqutaqarput, timmisartumi saqisumik nalunngisaqarput mekanikerimilluunniit naapitsisarput, taamaalillutillu inuppassuit namminneq ingerlatseqatigiiffik pillugu paasisaqarnerusarput.
Taamaattumik Kalaallit Nunaanni inuppassuit timmisartortitseqatigiiffik pigisartik pillugu ilisimasaqalersarput, assersuutigalugulu Ryanairimik atuisut taama paasisaqartiginavianngillat.
Kalaallit Nunaanni aamma sulisartut kattuffiisa annersaata, SIK-p, 2024-mi nunatta timmisartortitseqatigiiffia ukiup suliffitsialaatut toqqarpaa.
Ukiumi pisut pingaarnerit ilaat alla:
– Kangerlussuarmi sulisut pingaaruteqangaartut nuunneqarnerinut tunngatillugu amerlanerillu maluginngisaat pillugit iliuuseqarnerput pissutigalugu ilaatigut toqqagaavugut. Suleqatima kissaatigisaannik tunngaveqartumik tamanna iluatsilluaratsigu tulluusimaarutigeqaara.
Aammattaaq timmisartunit nutaajusunit 23-nit kingulliit 2024-mi pisiortorneqarput. Siunissamut piareersarneq pissutigalugu taamaaliortoqarpoq, tamannalu pisariaqarpoq.
Nutaanik unammillernartoqalissasoq
Kalaallit Nunaanni silaannakkut angallannermut 2025 ukiuussaaq pingaarutilik, minnerunngitsumik SAS Nuummit Københavnimut timmisartuussisalernera Air Greenlandimut toqqaannartumik unammillertunngorpat.
Jacob Nitter Sørensen aperivarput unammillerneq ernumagineraa, assersuutigalugu nunani tamalaani timmisartortitseqatigiiffiit assersuutigalugu SAS-ip atuisartuminut pitsaanerpaanut arlalinnik iluaqutissanik neqeroorutiginnittarmat.
– Maannakkutut isikkoqartillugu timmisartortitseqatigiiffiit allat piffissami sivikitsuinnarmi, tassa timmisartuussiffiunerpaami, timmisartuussinissaat pilerinartuuvoq. Air Greenlandili ilumoorfiginninnermik suli annerusumik sulissutiginnikkumaartoq qularutissaanngilaq, Jacob Nitter Sørensen oqarpoq.
Air Greenlandili assinganik periarfissaqanngilaq, ingerlatseqatigiiffik naalagaaffiup pigisaa niuernermik ingerlatsisuullunilu atortulersuutinut pingaarutilinnut tunngatillugu pingaarutilimmik suliaqartuugami, pisortaq nangilluni oqarpoq.
– Kalaallit Nunaanni innuttaasut iluaqutissanik akilersuisuussanngillat. Aamma unammilleqatigiittoqartillugu taamaallaat iluaqutissanut tunngatillugu aaqqissuusiorsinnaavugut – taamaaliortuuguttalu Nuummi innuttaasut nunap sinneranit pitsaanerusumik atugaqalersissagaluarpavut.
Unammillerneq suleqatigiinnerlu
Taamaakkaluartoq Air Greenlandimi sullitanut annerusunut nutaamik pilersitsisoqassasoq pisortaq oqarpoq. Suna pineqarnersoq 2025-p tungaanut ingerlatseqatigiiffiup itisiliiffigiumanngilaa.
Tamannali nalliutserlugu niuernermi peqataasut amerlanerujartortillugit aamma suleqatigiittoqarsinnaanera Jacob Nitter Sørensenip eqqaasitsissutigaa.
– Icelandair isumaqatigiissuteqarfigilereerparput, tassanilu timmisartortitseqatigiiffiit timmisartuussinernik assigiinnik tuniniaasinnaapput, aamma SAS isumaqatigiissuteqarfigilereerparput, taamaalilluni ukiup ingerlanerani Air Greenlandip timmisartuussineri tuniniaaffigissavaat. Tamannalu ukiukkut aningaasarsiornerunissamut iluaqutigissavarput.
United Airlinesip Nuup mittarfianut tikinnissaa, tassa Amerikamiut timmisartortitseqatigiiffiata 2024-mi aasakkut New Yorkimut timmisartuussilernissaa, Jacob Nitter Sørensenip aamma tigulluarpaa.
– Niuerfimmut maannakkut iserfigisinnaanngisatsinnut isernissamut ikiorsinnaavaatigut. Inuit nutaat nunatsinnut tikissinnaanngitsut tikisissavaat, taakkualu ilaat nunap iluani timmisartukkut angalassapput, akunnittarfitsinni unnuissapput il.il.
Nunarsuarmut tamarmut siaruarsimasunit eqqortut perusunnerugaat
Aamma United Airlines peqatigalugu timmisartuussinerit agguataarnissaat isumaqatigiissutigineqarpoq, taamaalilluni assersuutigalugu atuisoq bilitsi ataaseq atorlugu Sisimiunit Nuuk aqqusaarlugu New Yorkiliarsinnaavoq.
– Suli isumaqatigiissut inissinngilaq, oqaloqatigiinnerli pitsaasumik ingerlavoq.
– Timmisartortitseqatigiiffinnik nunarsuaq tamakkerlugu siaruarsimasuninngarnit eqqortunik suleqateqarneq maannakkorpiaq Air Greenlandimut pingaaruteqarnerusoq isumaqarpunga, aammami taamaattunut suli aningavallaanngilagut. Suleqatit uagutsinnut naleqquttut toqqarpavut, Jacob Nitter Sørensen oqarpoq.
2025-milu qanorluunniit pisoqassagaluarpat Air Greenlandi kamannarineqassaaq – aamma timmisartortitseqatigiiffik pisuunngikkaluarpalluunniit.
– Suleqativut ima oqarfigisarpakka: Inuit uagutsinnik isumaqarfiginnillutillu soqutiginnimmata nuannaarutigisariaqarparput. Ilaannikkut isumaqatiginngikkaluaraangatsigilluunniit, inuilluunniit oqaasii allataalluunniit naapertuutinngikkaluarpataluunniit, tamannali suliatta inunnut qanoq pingaaruteqartiginerannik ersersitsivoq.
