Aalisakkanik qalerualinnillu suli uumasunik timmisartukkut assartuineq aappaagu annertuseriassaaq

Air Greenland saattuanik aalisakkanillu suli uumasunik aamma arnarluillu suaannik nutaanik Kalaallit Nunaannit assartuinermik misileraaleruttortoq aappaagumut isumalluarpoq. Air Greenlandimi assartuinermut pisortaq Søren Støvhase Nørsø Tuukkaq Nuummit novembarimi aallarsinnaalerpat isumalluarpoq.

- Aalisakkanik qalerualinnillu suli uumasunik avammut niuerneq soqutiginarluinnartoq qularutissaanngilaq. Nuummiit Kangerlussuaq aqqusaarlugu Københavnimut nioqqutissanik nutaanik ukioq manna timmisartuussisarluta aallartipparput. Nuummili mittarfik nutaaq novembarimi ammarpat ullumikkumut sanilliullugu amerlanerusunik assartuineq ajornannginnerulissaaq, taamaattumik aalisakkat piuppata timmisartukkut assartuuttassavagut, Søren Støvhase Nørsø oqarpoq.

Blue Water Greenlandip, saattuanik uumasunik umiarsualivimmit mittarfimmut taavalu Københavnimiit aalisakkanik tuniniaasarfimmut Hanstholm Fiskeauktionimut assartuisimasup, Nuummi nunat tamalaat akornanni mittarfissap nutaap atulernissaa qilanaaraa. 

Taamaalilluni nassiussat Kangerlussuarmukaqqaaratik toqqaannartumik nunarsuarmut nassiunneqarsinnaalissammata. Air Greenland, Kalaallit Nunaannit nassiussanik timmisartuussisartoq, aamma qilanaarpoq, maannalu misileraanermi aalajangersimasunik periuseqalernissaq anguniarlugu qulakkeerinninniarpoq taamaaliornikkut assartuineq ajornannginnerusumik ingerlasalissammat.

-Naleqartitsineq pillugu akisussaaffitsinnik ilisimaarinnilluarpugut, ingammik aalisakkat nutaat pineqartillugit. Taamaattumik assartuineq tamarmi misilittarneqarsimassaaq. Taamaalilluta kukkusoqarsinnaanera annikillisinniarlugu aalajangersimasunik periuseqarnissamik timmisartuussisarnermullu pilersaarutinik pilersitsivugut. Nunap iluani angallassineq unammillernarnerpaavoq. Nunap iluani timmisartuni inissat killeqarput taamaammat assartuinerup misilittarnerani kiilunik ikinnerusunik assartuisinnaanerput akueraarput, naak amerlanerusinnaagaluartut, Søren Støvhase Nørsø oqarpoq.

Nuummiit aalisakkanik avammut niuerneq annertusissaaq

Aalisakkat qaleruallillu uumasut aappaagu avammut assartukkat amerleriassasut Air Greenlandimi assartuinermi pisortap ilimagaa.

- Tuukkaq Nuummut mittalerpat aalisakkat sukkanerusumik nassiussinnaalissavavut. Nalunngilarput novembarip kingorna aalisakkat Kalaallit Nunaanni sumiiffinnit allanit tikiunneqartarnissaat suli pisariaqartoq, taamaattumik aalisakkanik qalerualinnillu suli uumasunik assartuisinnaaneq tapersersorniarlugu nunap iluani timmisartuussinerit pitsaasut anguniarlugit pingaarnersiuivugut, Søren Støvhase Nørsø oqarpoq.

- 2025-mi angallassinissamut pilersaarut nutaaq aallaavigigutsigu, tassa sapaatip akunneranut tallimariarluta arfineq-marloriarlutaluunniit Nuummut Nuummillu timmisartuussisarutta, sapaatip akunneranut 100 tonsit angullugit assartorsinnaavagut, Søren Støvhase Nørsø oqarpoq. Taassuma Kalaallit Nunaannit aalisakkanik avammut assartuinerup annertusinissaa upperaa, silaannakkut angallannerinnakkuunngitsoq aammali imaatigut assartuinikkut.

-Aalisakkat uummasut nunarsuup sinneranut timmisartukkut assartorneqarsinnaalerpata aalisarnermut tamarmut iluaqutaassasoq upperaara. Aalisakkat umiarsuarmik avammut assartorneqartut amerlinissaat ilimagilluinnarpara, Søren Støvhase Nørsø oqarpoq.

Aalisakkanik tukertitsivinneersuunngitsunik soqutiginninneq

Air Greenland inuussutissarsiortut aallartitaat peqatigalugit Kinami nittarsaassinermut peqataavoq. Tassanilu timmisartortitseqatigiiffiit inuussutissarsiortullu aalisakkanik qalerualinnillu tukertitsivinneersuunngitsunik pinngortitami pisanik soqutiginnilluartut naapillugit.

- Aalisakkat imaani pisarineqarsimanerat immikkut iluanaarutissaavoq, aalisakkat nunanit allani tikiunneqartartut amerlasuut tukertitsivinneersuusarmata. Tamanna pitsaassutsimut tunngassuteqanngilaq, kisianni aalisakkat imaaneersut soqutiginarnerusut ilaat isumaqarput. Aammattaaq Kalaallit Nunaata aalisakkat assigiinngitsut neqeroorutigisinnaanerat kalaallit aalisakkanik avammut tunisaqartarnerannik soqutiginnilersitsissasoq isumaqarpunga, Søren Støvhase Nørsø oqarpoq.