Demokraatit aalisartoqarfiunerusuni arlalinni, soorlu
Ilulissani, Sisimiuni, Qeqertarsuarmi Qasigiannguanilu, partiini
siuttunngorput.
– Aalisarnermut inatsisip inuit qinersisimanerannut
arlaatigut sunniuteqarsimanissaa ilimagissallugu tunngavissaqarluarpoq,
Sulisitsisuni pisortaq Christians Keldsen oqarpoq.
Demokraatit aalisartoqarfiunerusuni arlalinni, soorlu
Ilulissani, Sisimiuni, Qeqertarsuarmi Qasigiannguanilu, partiini
siuttunngorput.
– Aalisarnermut inatsisip inuit qinersisimanerannut
arlaatigut sunniuteqarsimanissaa ilimagissallugu tunngavissaqarluarpoq,
Sulisitsisuni pisortaq Christians Keldsen oqarpoq.
Demokraatittaaq aalisarnermut inatsisip suliarineqarneranik
sakkortuumik isornartorsiuinertik qinersinermi ajugaanerminnut pissutaasoq
aamma isumaqarput.
– Oqariartuutigisarput, tassa naalakkersuisut atuisartunut immikkut
ilisimasalinnullu tusarnaaqqissaarsimannginnerat aalisarnermullu inatsisissamut
naammaginartumik naatsorsuisimannginnerat kisitsisini taakkunani ersertoq
isumaqarpunga, Jens-Frederik Nielsen qinersinerup unnukkuani Sermitsiamut
oqarpoq.
Politikerit isornartorsiuineq tusaajumanngikkaat
Sulisitsisuni siunnersortip Bent Sørensenip aalisarnermut
inatsisip suliarineqarnera tamaat peqataaffigaa, inuussutissarsiortullu
isornartorsiuinerannut politikerit tusaanngitsuusaarilluinnarsimanerat
ajornartorsiutini annerpaasoq isumaqarpoq. Naak inuussutissarsiortut
aalisarnermut ataatsimiititaliarsuup inassuteqaatai tunngavigalugit
uppernarsaatissaqartunik isornartorsiuereeraluartut taamaattoqarpoq.
– Naalakkersuisuusimasut namminneq piumasamittut iliorput, taamatuttaarlu
sinerissap avataani qanittuanilu aalisartut inatsisip naleqqutinnginnerannik
erseqqissaasut tusaasimanngilaat. Tamannalu illuatungiliuttut, Demokraatit
ilanngullugit, isumaqatiginninniarnernut atatillugu
erseqqissaaffigisarsimavaat, Bent Sørensen oqarpoq.
Aalisarneq pillugu Ataatsimiititaliarsuup innersuussutai
Aalisarnermut inatsit sivisuumik suliarineqarpoq. Ukiut 20-t
sinnerlugit. Ataatsimiititaliarsuaq 2019-imi pilersinneqarpoq, aalisarnerullu
qanoq ineriartortinneqarsinnaaneranik aamma “aalisarnerup inuussutissarsiutitut
pisuussutitullu inuiaqatigiinnut iluaqutaanerpaanissaanik
qulakkeerinninniarluni” 2021-mi arlalinnik innersuussuteqartoqarpoq.
Suliffissaqartitsinermut, isertitaqartitsinermut
atugarissaarnermullu iluaqutaasumik siunissami pisuussutit
attatiinnarneqarnissaat pingaarnertut oqariartuutigineqarput. Tamatuma
saniatigut aningaasaliissutinik ineriartortitsinerup ingerlaannarnissaa eqqarsaatigalugu
aalisartut ataasiakkaat isertitaqarsinnaaqqullugit pisuussutinillu katillugit
erniaqartitsineq annertusineqarsinnaaqqullugu aqutsinerup
aaqqissuunneqarnissaanut aalisarnermik
inuussutissarsiuteqarneq aalajangersimasumik siumullu oqaatigineqarsinnaasumik
sinaakkuteqalersinneqassaaq. Aqutsinermi ammasumik naligiissumillu
pineqarnissaq qulakkeerniarlugu naligiissitsinissaq
piviusunngortinneqartariaqartoq, aamma pisuussutinik atuinermut
piginneqataanerit annertusineqartariaqartut ataatsimiititaliarsuup aamma
tikkuarpaa. Kiisalu aalisarnermut politikkimut allannguutit peqatigalugit
suliffissaqartitsinermut ilinniartitaanermullu politikkimik suliniutit
piujuartitsisumik ikaarsaariarnermut qulakkeerinnittussaasut
ataatsimiititaliarsuaq isumaqarpoq.
Tusarniaanermut akissut 500-nik quppernilik
Aalisarnermut ataatsimiititaliarsuup innersuussutai Inatsisartuni ilaasortat
akornanni isumaqatigiinngissutaangaarput, aalisarnermullu inatsisissatut
siunnersuut arlaleriarluni kinguartinneqarpoq. Aalisarnermut inatsit aatsaat
januaarimi 2024-mi tusarniaassutigineqarpoq, tamatumalu kingunerisaanik
akissutit quppernerit 500-t sinnerlugit amerlassusillit – ilarpassui
isornartorsiuingaartut – nassiunneqarput.
Aalisartut ikilinatik amerlanerulerniassammata aalisarnerup
siammarternissaa aalisarnermut inatsimmi siunertarineqarpoq. Aalisarnerup
piujuartitsinerunissaa aamma pisuussutit inuiaqatigiinnit pigineqarnerisa
ersersinnissaat tassunga ilaavoq. Ukiuni tallimani nunaqavissuunissamik piumasaqaateqalerneq aalisartullu
tamarmik nunatsinniillu pisassiissutini aalisarnerit tamarmik 100 procentimik
kalaallinit pigineqarnissaat inatsimmi allannguutit isornartorsiorneqangaartut
ilagaat. Tassunga ilanngullugu sinerissap avataani aalisarnermi pisassiissutit
annertunerpaaffissalerneqarput, pisarineqartullu 25 procentiisa pinngitsoorani
tunineqartarnissaat piumasaqaataalerpoq.
Najugaqartuunissamut piumasaqaatit aamma pisassiissutit
annertunerpaaffissaat
Grønlandsbanken, tusarniaanermut akissumminni aalisarnermut inatsimm ammasumik
saqqummiussinermik aalisarnermilu allannguutit kingunerissaannik
naatsorsuusiortoqarsimaneranik amigaateqarluni ilaatigut oqariartuuteqartoq,
isornartorsiuisut ilagaat. Namminersortut nunanit allaneersut najugaqarnissamik
kalaallillu piginneqataanissaannik piumasaqaatit pissutigalugit pisassaminnik
tunniussisariaqartut tamannalu aningaasaliisartunik qimarratsitsigami
inuiaqatigiinnut iluaqutaanngitsoq taakku tikkuarpaat. Aamma pisassiissutit
killilerneqarnerat isornartorsiorpaat, tamatumalu kinguneranik
umiarsuaatileqatigiiffissuit pisassaminnik tuniseqqaartariaqartsinnaapput.
– Naalakkersuisunngortut Inatsisartunngortullu aalisarnermik
inuussutissarsiuteqartunut tusarnaarnerussasut, nunamullu suna
pitsaanerpaanersoq isiginerulissagaat neriuppunga. Aalisarnerput niuernertut
ingerlanneqassaaq. Nunarpassuarnut unammillertuuvugut, inuussutissarsiummi
taama pingaaruteqartigisumi inuiaqatigiit aningaasaqarnerannik
kinguneqartitsisinnaanera naatsorsorneqarsimanngitsoq politikkikkut
allannguisoqarsinnaanngilaq, Bent Sørensen oqarpoq, nangillunilu aalisarnermit
isertitat qiviaraanni namminersortut ingerlatseqatigiiffii
sunniuteqarluarsimasut oqaatigaa.
– Suliffeqarfiit namminersortut kaaviiaartitaannut sanilliullugu pisortat
karsiannut tapiissutaat qaffasippoq. Aalisarluarput, aalisarluarnerallu
aalisarnermut inatsit atuuttoq malillugu ajoquserneqarpoq, Bent Sørensen
oqarpoq.
