EU-p aalisarneq pillugu isumaqatigiissutaa naapertorlugu Kalaallit Nunaat aalisarnermut tapiissutinik tunineqartarpoq.
Kalaallit Nunaat isumaqatigiissutip 2021-miit 2024-mut atuunnerani aalisarnermut tapiissutinik ukiumut 22 millionit koruunit missaannik tunineqartarsimavoq.
EU-p aalisarneq pillugu isumaqatigiissutaa naapertorlugu Kalaallit Nunaat aalisarnermut tapiissutinik tunineqartarpoq.
Kalaallit Nunaat isumaqatigiissutip 2021-miit 2024-mut atuunnerani aalisarnermut tapiissutinik ukiumut 22 millionit koruunit missaannik tunineqartarsimavoq.
Taakkualu ilaatigut Aalisarnermut Piniarnermullu Nakkutilliisoqarfimmit, Pinngortitaleriffimmit aamma Aalisarnermut, Nunalerinermut Imminut Pilersornermullu Naalakkersuisoqarfimmit pissarsiarineqartarput.
“Aningaasat Naalakkersuisoqarfimmut tunniunneqartut sinerissap qanittuani aalisariutinut 6 meterinit anginerusunut tapiissuteqartanermut atugassanngorlugit Aalisarnermut aningaasaliissutinut immikkoortitanut aammalu Inuussutissarsiutinik siuarsaanissamut atatillugu umiatsiaaqqanut tapiissuteqartarnernut atugassanngorlugit ingerlateqqinneqartarput."
"Angallatinut 6 meterinit anginerusunut nutaanut sisamanut, motooritaartunut marlunnut angallatigisallu nutaanik atortulersornissaanut kiisalu nutaanik umiatsiaarartaartunut atortui ilanngullugit 12-inut 2024-mi tapiissuteqartoqarpoq, Kathrine Kærgaard oqarpoq, taassumalu Aalisarnermik piniarnermillu inuussutissarsiutillit inuussutissarsiornerannik siuarsaaneq pillugu Inatsisartut inatsisaat, aalisarnermik piniarnermillu inuussutissarsiutinik pitsaasunik unammillersinnaasunillu pilersitsinissamik siunertaqartoq, innersuussutigaa.
Aalisartut sineriammit tamarmeersut tapiiffigineqartut
Inuussutissarsiornermik siuarsaanermut 2.884.000 koruunit 2024-mi immikkoortinneqarput. Aningaasat taakkua ilaat EU-mit 2021-2024-mut immikkoortunut tapiissut aqqutigalugu matussuserneqarput. Qinnuteqaatit 20-t 2024-mi tiguneqarput, taakkunanngalu umiatsiaaqqanut aqqaneq-marlunnut aningaasanut inatsisip kontuani aningaasanut sinaakkutit iluanni sumiiffiit imatut agguataarlugit tapiissuteqartoqarpoq:
- Qaanaaq – aalisartut marluk
- Aappilattoq (Avannaa) – aalisartoq ataaseq
- Ikamiut – aalisartoq ataaseq
- Nuuk – aalisartut marluk
- Qaqortoq – aalisartut marluk
- Aappilattoq (Kujaataa) – aalisartut marluk
- Tasiilaq – aalisartoq ataaseq
- Kuummiut – aalisartoq ataaseq Katillugit: aalisartut aqqaneq-marluk
- Qaanaami, Tunumi Kommune Kujallermilu aningaasarsiornissamut periarfissat annikinnerunerat pissutigalugu taakku immikkut eqqarsaatigineqarput, taakkunaniillu qinnuteqartut 84 procentimik tapiiffigineqartarput, nunatta sinnerani qinnuteqartut 75 procentimik tapiiffigineqarlutik.
- Tamakkiisumik tapiiffigineqarnissaq ajornarmat qinnuteqartut umiatsiaaqqamik atortulersukkaminnik, aamma isumannaallisaanermut atortunik pisariaqartunik, pisinissamut aningaasartuutaasut sinneri namminneq matussusertariaqarpaat, aalisarnermut immikkoortortaqarfimmi pisortaq nassuiaavoq.
Inuussutissarsiutigalugu umiatsiaaqqanut tapiissuteqarnissamut qinnuteqaatit katillugit 20-t tiguneqarput, aningaasanullu inatsisissami kontomi aningaasanut sinaakkutit iluanni ataatsimut nalilersuinermi qinnuteqartut aqqaneq-marluk tapiiffigineqarput.
Aalisartut taakku umiatsiaaqqamik aquuteralalimmik isumannaallisaanermullu pisariaqartunik atortussalimmik pisinissaminnut maanna periarfissaqalerput, taamaalillutik nammineersinnaanerulerlutillu inuiaqatigiinni aalisarnerup inuussutissarsiutigineqarnera ingerlatiinnarsinnaavaat.
Nakkutilliineq ilisimatusarnerlu
EU-p aalisarnermut tunngasunut tapiissutai aalisarnermut tunngasunut arlalinnut aamma atorneqartarput – ilaatigut ilisimatusarnermut piginnaanngorsaanermullu. Ilaatigut aamma aqutsinissamut pilersaarusiornermut, aalisariutinik nakkutilliinermut, ERS-imik aamma umiarsuarnut nalunaarsugaasivimmik elektroniskimik atuutilersitsinermut, misissuinernut aamma Pinngortitaleriffimmi ilisimatusarnermut atorneqartarput, Aalisarnermut, Piniarnermut, Nunalerinermut Imminut Pilersornermullu Naalakkersuisoqarfik taama ilisimatitsivoq.
