KL

DK

Aallarnisaasoq qiasunngusuinnaasoq

Nomad Greenlandip takornariartitsisarnermut inatsisissatut siunnersuut pissutigalugu, nunanit allanit aningaasaliisartut tunuarnerat pissutigalugu, illuaqqat takornariartitsisarfiillu pitsaasut nutaat pilersaarutini taamaatiinnartariaqarpai.

Anika Kroghip pingaartitami Nomad Greenlandip takornariartitsinermut inatsisissaq pissutigalugu unittooqqanera aliasuutigeqaa.
Jesper Hansen freelance tusagassiortoq
Saqqummersinneqarpoq

Takornariartitsinermik aallarnisaasoq Anika Krogh, uini Jon Krogh peqatigalugu suliffeqarfimmik Nomad Greenlandimik 2017-imi pilersitsisoq, qiasunngusuinnaavoq. Takornariartitsinermut inatsisissatut siunnersuutip kinguneranik ingerlatseqatigiiffiup allilerneqarnissaanik pilersaarutit, ilaatigut Kiattuami illuaqqanik, Qussummi qissattariartartut tammaarsimaffiannik aamma Nomad Greenlandip Saqqami tammaarsimaffiata allilernissaanik pilersaarutit taamaatiinnarneqarput.

PISARTAGAQARTUNUT

Allaaserisaq una Nutaarsiassaqartitsivimmi aviisit naqitat ilaanni allaaserisaavoq.

Allaaserisat pisartagaqartunit siunissami taamaallaat atuarneqarsinnaajumaassapput.

Atuarluarna.

- Angalaarfiusartunut nutarterinissamut pilersaarutitsinnut ilaavoq minnerpaamik 10 millionit koruuninik aningaasaliisoqarnissaa, nunanit allanit aningaasaliisoqarnissaanik qulakkeerinniffiusoq. Aningaasaliissuteqarnissat taakkua najukkami inuiaqatigiinnut aningaasaqarnikkut iluaqutaalluarsinnaagaluartut, maanna piffissaligaanngitsumik unitsinneqarput, Anika Krogh nassuiaavoq.

Inuilaarsuarmi illuaqqat akimasuut

- Ukiorpassuarni qinnuteqaatigisareerlugu kiisami Nuup Kangerluani inuilaarsuarmi illuaqqanik akimasuunik pilersitsinissamut akuersissummik pissarsivugut. Tupernik nalinginnaasunik kalaallit qangaaniilli tuperisartagaat isumassarsiorfigalugit pilersitsinissaq pilersaarutaavoq, Kalaallit Nunaannut takornarianut nutaanik pilerisaariniarluni. Taakku saniatigut Saqqami tammaarsimaartarfitta nutaanerpaap allilerneqarnissaa aamma kissaatigaarput.

- Sapaatilli akunnerata siuliani aningaasaliisussatut ilimagineqartoq, takornariartitsinermut inatsisissatut siunnersuut nutaaq pissutigalugu tunuarpoq. Aningaasaliisussatut ilimagineqartoq taanna aningaasaannaanngitsunik aammali ingerlatsinermut tuniniaanermullu ilisimasaqarluarpoq. Tamanna uatsinnut annaasaqaataavoq angisooq, maannami angorusutarput kiisami takusinnaalereeraluaratsigu.

- Aningaasaliisussarpulli alla, siornatigut sullissarisimasarput Schweizimeersoq, immaqa aamma inatsit nutaaq pissutigalugu tunuartariaqalissaaq.

Pingaartitaralugu pilersaarut ajalusoortoq

- Ukiorpassuarni ilungersorluta sulisimagaluarluta suliarput ajalusoormat aliasuutigingaarpara. Nunanit tamalaanit nersornaaserneqartarlutalu akissarsisinneqartarnikuuvugut, namminerli kisimiilluta aningaasaateqaratalu allilerilluta suliassarput kivissinnaanngilarput, Anika Krogh oqarpoq, taanna aamma isumaqarpoq inatsisissatut siunnersuut suli piviusunngortinneqanngitsoq pissutigalugu suliniut ajornartorsiortinneqartariaqanngikkaluartoq.

- Suut tamaasa eqqortumik iliuuseqarfigivavut. Akimasumik takornariartitsineq aallukkusukkatsigu, tamannami umiarsuarnik takornariartaatinik takornariartitsinermit Kalaallit Nunaata aningaasaqarneranut annertunerujussuarmik tapersiisussaammat. Sullittakkatta ullormut unnuamullu 1.750 eurot akiliutigisarpaat. Umiarsuarnik takornariartaatinik takornariartartut aningaasanik ikittuinnarnik akiliutigisartagaannit niuerneq allaanerulluinnarpoq – malugineqartariaqarlunilu tamanna ulluinnarni inuunermut pinngortitamullu ajoqutaanngitsutut pilerigineqarluarmat.

- Aamma eqqumiippallaarami mittarfinnut aningaasaliisoqarneratigut neriuutigineqarmat takornariaqarnermut pitsaanerusumik atugassaqartitsisoqarsinnaassasoq, peqatigisaanilli aningaasaliinissamut periarfissat pilerigineqartut mattullugit. Nunani tamalaani misilittakkat oqaluttuarisaanermi takutereerpaat, killilersuinerit taamaattut ineriartornermut kinguariartitsisinnaasut allilerinissamullu periarfissat minnerulersinnaasut.

Anika Kroghip ilaatigut innersuussutigai misilittakkat Maldiverineersut aamma Mauritiusimeersut, Kalaallit Nunaannisut qeqertatut inissisimasuneersut. Nunat taakkua marluk siornatigut nunanit allanit aningaasaliissuteqartarneq siornatigut killilersorpaat, maannali inatsisit ammanerulersinneqarmata, aningaasaliissuteqartarnerit amerleriarujussuarnerannik kinguneqarpoq.

Aningaaseriviit taamaaliorsinnaanngitsut

- Aningaasaliisartut nunanit allaneersut peqataatittariaqarpavut. Aningaaseriviit kisimiillutik taamaaliorsinnaanngillat. Erniat qaffasippallaarmata aningaasallu qularnaveeqquserneqartariaqarlutik. Qularnaveeqqusiinissaq uagut isumagisinnaanngilarput. Illorput qularnaveeqqutigereerparput, ileqqaakkavullu tamaasa atoreerlugit, taamaammat aningaasaleeqataarusuttut piginnaasallit peqataatittariaqarpavut, Anika Krogh nassuiaavoq.

- Inatsisissatut siunnersuut aallarnisaasunut eqquissaaq. Nammineerluni atukkanut taarsersuissagaanni, taava apeqqutaassaaq qanoq amerlatigisunik aningaasaliisinnaanissaq aamma qanoq amerlatigisunik aningaasaleerusussuseqarneq.

- Kalaallit Nunaanni aningaasaliisartut ikippallaarput. Inuit taamaallaat ikittunnguit takornariartitsinermik suliniutinut annertuunut aningaasaliinissamut aningaasaateqarsinnaapput. Taamaattumik takornariartitsinermut inatsit akuerineqassappat, kalaallit millionærit ikittunnguit piumaneqarluassapput.

Nomad Greenland ApS aappariinnit Kroghinit aamma Miiti Geislerimit pigineqarpoq. Aammattaaq Schweizimiup aningaasaliisartup eqqaaneqartup – siornatigut sullinneqareersup – ingerlatseqatigiiffiup 40 procentia pigaa.

iværksætter turismelov erhverv turisme inuussutissarsiutit

ATORFIIT Se alle jobs

Powered by Labrador CMS