Akiikkutaralugu aalisartartut
nunanit tamalaaneersut Kangerluarsussuarmi, Nuup kujataani 100 kilometerisut
ungasitsigisumiittumi, kuunni ilisimaneqarluartuni pingasuni aggustimi
septembarimilu eqaluppassuarnik pisaqarput.
Isak Brandt Hansen, Rasmus Brandt
aamma Casper Frank Møller inuusuttuupput pingasut Nuummi aallarnisaasut,
tamarmik aliikkutaralugu aalisarnermik nuannarisaqartut.
Akiikkutaralugu aalisartartut
nunanit tamalaaneersut Kangerluarsussuarmi, Nuup kujataani 100 kilometerisut
ungasitsigisumiittumi, kuunni ilisimaneqarluartuni pingasuni aggustimi
septembarimilu eqaluppassuarnik pisaqarput.
Isak Brandt Hansen, Rasmus Brandt
aamma Casper Frank Møller inuusuttuupput pingasut Nuummi aallarnisaasut,
tamarmik aliikkutaralugu aalisarnermik nuannarisaqartut.
Angalanermi misigisanik soorlu
niviugaasalerluni qissattarnermik, umiatsiarluni arfernik takuniaanermik,
piniarnermik, arsarnernik isiginnaarnermik, inoqajuitsumi
tammaarsimaartitsinermik takornarianullu ataasiakkaanut immikkut ittumik
angalatitsisarnermik neqerooruteqarniarlutik suliffeqarfik Raw Arctic Aps
2024-mi upernaakkut pilersippaat.
– Ulapaarfik siulleq aliikkutaralugu aalisartut arlallit Kangerluarsussuarmut
aallartippagut, ukiorlu manna aliikkutaralugu aalisartut 25-30-t Europameersut,
Canadameersut, USA-meersut, Australiameersut New Zealandimeersullu
tammaarsimaffitsinni aalisarput, pisortaq Casper Frank Møller, 28-nik ukiulik
Sermitsiamut oqarpoq.
Raw Arctic, piffissami sivikitsumi ulapaarfiusumili juulimiit septembarimut,
ullut qulikkaarlugit angalatitsisarpoq. Nuummut tikinnerup aallarnerullu
akornanni aliikkutaralugu aalisartut ulluni arfinilinni
Kangerluarsussuarmiittarput, tassani kuut Isua, Eqaluit Ilivertallillu kuua
aalisarfigisarpaat – ilaatigut nunap pissusaanik allanngorartumik
misigisaqarniarlutik aammali kuut pingasut taakku
aalisarfiallaannginniassammata.
AALISARFIK OQALUTTUASSARTALIK
Nuup kujataani Kangerluarsussuup
imartaata aalisarfissaqqissuunera kinguaariippassuit ilisimasimavaat.
KGH-p kuummi Eqalunni
eqaluppassuaqarnera atorluarniarlugu aalisakkanik uutsiffissatut 1913-imi
tunisassiorfiliaata toqqavia Kangerluup paavani suli takuneqarsinnaavoq.
Tunisassiorfik nutaalianik
atortorissaarusersugaalluni toqqavilerneqartoq »Kalaallit Nunaat pillugu
nalunaarutit«-ni allassimavoq:
»Tunisassiorfimmi aalartitsilluni
uutsiveqarlunilu naqitsineq atorlugu uutsilluni tappiorannartuiaaveqarpoq,
taamatuttaarlu quersuaqarlunilu kalaallinut inissiaqarpoq. Tunisassiorfik
qallunaamit ilinniarsimasumit ukiut tamaasa angerlarsimaffimminit aallartitamit
aalisarnerup nalaani juulip qiteqqunneraniit aggustip qiteqqunneranut
uutsinermik isumaginnittartumik aqunneqarpoq«.
Qatanngutigiinniat
Kangerluarsussuarmi najugarisimasaat ukiut hunnorujukkaat nikinnerisa siulianni
suli takuneqarsinnaasimapput, tassanilu aalisartut eqalunnik kiilumut 5 oorinik
akilinnik tunisassiorfimmut tulaassisarput.
Tunisassiorfik 1918-imi aalisakkanik 8.380 kilonik
tigusivoq, taakkulu qillertuusanut 30.000-inut poortorneqarput. Ukiut
marlussuit tulliuttut aalisakkanik tulaassineq annikilliartorpoq, KGH-llu
Kangerluarsussuarmi tunisassiorfik tamaat 1924-mi Sisimiunut nuuppaa,
taamaalillunilu illoqarfimmi aalisakkerinermik oqaluttuarisaaneq
tulluusimaarnartoq aallartippoq.
kurt@sermitsiaq.gl
Raw Arctic-imiit aalisartut
amerlanerpaamik arfineq-pingasut ataatsikkut kangerlummukaanneqartarput.
Suliffeqarfik aasaq manna Isuani tupersualimmik mikinerusunillu arfinilinnik
tupilimmik tammaarsimaarfittaarpoq, taakkulu aasap naanerani peerneqarput. Tammaarsimaarfimmi
aqutsisumik, angallassisartunik marlunnik, igasumik igaffimmilu ikiortimik
sulisoqarpoq, taamaalillutillu Nuummiit sulisut arlallit Kangerluarsuatsiami
paarlakaajaallutik sulipput.
Nuummi Kangerluarsussuarmilu ullunut qulinut aki: 50.000 koruunit (qaavatigut
nunagisamiit Nuummut timmisartumut bilitsi ilanngullugu).
Naak Raw Arctic ukiup aappaa
avillugu taamaallaat pioreeraluartoq, suliffeqarfiup takornariartitsinermut
isiginnittaasia piujuartitsinermik, kulturimik misigisanillu piviusunik
ukkataqartoq maluginiarneqarluarpoq. Ingerlatseqatigiiffik »Greenland Tourism
Award 2025«-imik, Visit Greenlandip Air Greenlandillu suleqatigiillutik
nersornaasiuttagaannik, qanittukkunni nersornaatisitinneqarpoq.
Akuersissut tusarniaassutigineqassasoq
Kangerluarsussuaq eqaloqarluartunik kuulik
Assi: Raw Arctic / Marcus F.G. Jensen
Raw Arcticip Kangerluarsussuarmi
Camp Isuani aliikkutaralugu aalisartunut nuannaariartarfimmik
ineriartortitsinini ingerlatiinnarpaa, suliffeqarfillu kuunni pingasuni
taakkunani akiliilluni aalisaammik eqalunniartitsisinnaanermut akuersissummik
qinnuteqarput.
Inuussutissarsiornermut
Naalakkersuisoqarfik akuersissutinik tunniussisarlunilu kommuni sumiiffiup
kommunimut pilersaarutinut naapertuunneranik qulakkeerisarpoq. Taamaammat
Kommuneqarfik Sermersuup Kangerluarsussuarmi akuersissutigineqarsinnaasut
pingasut pillugit kommunimut pilersaarummut tapiliussaq sapaatip-akunnerini
arfineq-pingasuni novembarip tallimaata tungaanut tusarniaassutigaa.
KGH Kangerluarsussuarmi uussilluni tunisassiorfimmik 1913-imi pilersitsivoq, toqqavialu suli takuneqarsinnaavoq.
Assi: Sermitsiaq
Takornariartitsisarnermut akuersissut piginnittuunermut
ersiutaasoq inuppassuit immaqa isumaqarput, akuersissulli takornariartitsisut
allat akiliisitsillutik sumiiffimmi pineqartumi aalisartitsisannginniassammata
akiliutaavoq. Akuersissuteqaraluartoq inuinnaat
inuussutissarsiutigaluguluunniit aalisartut kuumi tassani eqalunniarsinnaapput.
Tamatumunnga peqatigitillugu sumiiffiit takornariartitsinernut allatut ittunut
suli ammapput, soorlu tammajuitsorsiniarluni piniarnissamut pisuttuarnissamullu
kikkullu tamarmik aliannaarsaarfiginissaannut.
Takornariat siammarterluarneqarsinnaammata Kommuneqarfik
Sermersuumiit akuersissummik tunisinissaq tapersersorneqarpoq. Kommunimi
maannakkut marlunnik akuersissuteqarpoq: Nuup Kangerluani Qussummi
eqalunniarnissamut Tasiilamilu qulimiguulimmiit pissilluni sisorarnissamut
akuersissutit.
