Múte: USA, Danmark Kalaallit Nunaallu isumaqatigiinniarnermi pingaarutilimmi aallaavimminnit suli nikinngillat

Nunanut allanut naalakkersuisuusimasoq, Vivian Motzfeldt (D), danskit nunanut allanut ministererigallagaat, Lars Løkke Rasmussen, USA-p nunanut allanut ministeria, Marco Rubio aamma USA-p præsidentiata tullersortaa, J.D. Vance, Washingtonimi januaarip qiteqqunnerani ataatsimiinnerminni suleqatigiissitaliortoqarnissaa isumaqatigiissutigaat. 

Kalaallit Nunaata USA-mit tatineqarneranit tamanna aallaaveqarpoq. Suleqatigiissitaq taanna, nunat taakkua akunneranni atorfilittat, qaffasissumik atorfillit, suleqataaffigaat. 

Suleqatigiissitamili ataatsimiittoqallattaareeraluartoq nunat akunnerminni isumaat suli nikinngitsut, Nunanut Allanut Naalakkersuisoq Sermitsiamut oqarpoq. 

- Suleqatigiissitap aallartinneqarneranit tunngaviit, isummat siunnerfiillu pilersinneqarsimasut taakkua suli attanneqarput nunat pingasut akunnitsinni.

- Sapinngisaq tamaat atorlugu pitsaasumik suliap naammassineqarnissaa pillugu anersaaq atorlugu USA-p Danmarkip aammalu nunatta akornanni suleqatigiissitaq ingerlatsivoq, Múte Bourup Egede (IA) oqarpoq.

Paaseqatigiinniarneq piffissamik atuiffioqisoq

Naalakkersuisup nassuiaanera naapertorlugu nunat taakkua akunnerminni paaseqatigiinniarsarinerat, maannamulli suli paaseqatigiinnginnerat, piffissamik atuiffiuvoq.

- Paaseqatigiinniarnigut piffissamik atuiffiupput, Múte Bourup Egede oqarpoq.

Suleqatigiissitaq qaammatit sisamat matuma siornatigut pilersinneqartoq tunngavimmigut suli nikeriarfiunngilaq. Taamaakkaluartoq atorfilittat qaffasissumik atorfillit oqaloqatigiittarnerat torersumik ingerlasoq naalakkersuisoq erseqqissaavoq.

- Suli aallaavitsinni, nunat akunnitsinni assigiinngitsumik inissisimangaluarluta oqaloqatigiinnerit massakkut torersumik aammalu inerititaqarfiusussamik ujartuiffiusumik suleqatigiissitami ingerlanneqarput, Múte Bourup Egede oqarpoq.

Suleqatigiissitaq ukioq manna januaarip 22-ani siullerpaamik ataatsimiippoq.