Akerliussutsimik takutitsisut umiarsuarnik takornariartaatinik assersuisut
Ilulissani takornariartitsisartut naammaginninngillat. Umiarsuarnik takornariartaatinik angallassisut nunanit allaneersunik illoqarfimmi kiffartuussisunik atuerusunnerusut isumaqarput. Taakku ippassaq sisamanngornermi umiarsuarmik takornariartaammik Ilulissat umiarsualiviani assersuipput, akerliussutsimillu takutitsinissanik arlalinnik pilersaaruteqarput. Pissutsit ernumanartoqartippavut, AECO-mit oqaatigineqarpoq, taakkualu kikkut tamarmik suleqatigiilluarnissaannik siuarsaaniarput.
Foto: Lars Erik Gabrielsen
Akerliussutsimik takutitsisut takornariartaammik Hurtigrutenimik Ilulissat umiarsualiviannut sisamanngornermi juulip 25-ani tulaleruttortumik assersuipput.
Takornariartitsisartut Ilulissaniittut umiarsuarnik takornariartaatinik tikittoqartarnera naammaginngilaat. Umiarsuarnik takornariartaatinik takornariartitsisartut nunanit allaneersunik Ilulissani takornariartitsisartunik kisimi atuisartut Ilulissani innuttaasut isumaqarput, takornariallu nunaqavissunit kiffartuunneqarnissaat taakku kissaatigineruaat.
AECO, Issittumi takornariartitsisartut soqutigisaqaqatigiivi pissutsit pillugit malinnaapput:
- Ilulissani pissutsit AECO-p ernummatigai. Uagut ilaasortavullu piujuartitsisumik takornariartitsisarnermik najukkamilu naleqarnerulersitsisarnermik siuarsaaniarluta suliniuteqarpugut. Najukkami innuttaaqatigiit ilaasortatta tikeraartagaat tikeraanik tikilluaqqusinissaat tikeraarnerannillu nuannersumik misigisaqartitsinissaat uagutsinnut pingaaruteqarpoq, AECO-mi pisortap tullia Anders La Cour Vahl Sermitsiamut allakkatigut akissuteqarluni oqarpoq.
Misissuileruttorneq
Ilulissani takornarialerisut ukioq manna umiarsuarnut takornariartaatinut akerliussutsimik takutitsineq aatsaat ingerlatinngilaat. Sapaatip-akunnerata matuma aallartinnerani umiarsuaq takornariartaat akerliussutsimik takutitsivigineqarpoq, takornarialerisut najukkamiittut atorneqartariaqarnerinik allassimasunik allagartalinnit.
Umiarsuarnik takornariartaatinik Ilulissanukartoqarnerit tamaasa akerliussutsimik takutitsinissamik pilersaaruteqartoqarnera, takornarialerisut Sermitsiamut oqaatigisareersimavaat:
- Soqutigisaqaqatigiittut arlaannik ikiuussinnaanerluta nalilerumallugu AECO-mi suliaq misissuleruttorparput. Takornariartitsisartut ataasiakkaat niuernikkut ingerlataat AECO-p akuliuffigineq ajorpai, ataatsimulli isigalugu piujuartitsisumik akisussaassuseqartumillu takornariartitsinerup tamanut iluaqutaasumik pitsaanerpaamik periarfissaqarnissaa qulakkeerniarlugu suliniuteqartarpoq, Anders La Cour Vahl oqarpoq.
Tatigeqatigiinnermik ajornerulersitsisoq
Attaveqaqatigiilluarneq suleqatigiilluarnerlu siuarsarniarlugit AECO suliniuteqartartoq kattuffiup oqaatigaa, tassanilu oqaloqatigiinnissamut suleqatigiinnissamullu periarfissaqarnerarpaa:
- Akerliussutsimik takutitsinerit akerliussutsimilluunniit takutitsinissamik sioorasaarinerit, soorlu umiarsuarnik takornariartaatinik ingerlatsisunut maannakkut takutitsinerit, tatigeqatigiinnermik suleqatigiinnermillu pilersitsinissamut pitsaasumik periusiusut isumaqanngilagut. Akerliussutsimik takutitsinerit taamaattut takornarianut takornarialerisunullu Ilulissat takornariarfissatut ajortumik isumaqalersitsinissaat taamaalillunilu kissaatigisat akerlerluinnaannik sunniuteqarsinnaanerat ernummatigaarput, AECO-mi pisortap tullia oqarpoq nangillunilu:
- Ornigassat ilaasortattalu akornanni oqaloqatigiinnermik pitsaanerpaanillu paarlaasseqatigiinnissamik siuarsaaniarluta suliniuteqartuassaagut, kikkullu tamarmik iluaqutaasumik peqataanissamut oqaloqatigiinnermullu tikilluaqquneqarput. Assersuutigalugu ukiumoortumik aaqqissuussisarpugut, tassani nunaqavissut umiarsuarnik takornariartaatinik sullissinermik ingerlatsisut, tunisassiortut takornariartitsiviillu naapeqatigiittarput.
