Allamut saaqattaarneq: RAL-imi pisortaqatigiinnik ikilisaangaatsiarneq
Namminersorlutik Oqartussat umiarsuaatileqatigiiffianni Royal Arctic Linemi, ukiuni marlunni qaammatinilu arfinilinni kingullerni aqutsisut qaffasinnerpaat aaqqissuussaanerat eqqarsaatigalugu allamut saaqattaarfiusumi, pisortaqatigiit ataatsimiittarfiani aaqqissuussisoqangaatsiarpoq.
Royal Arctic Linemi pisortaaneq juunip aallaqqaataaniilli pisortaqatigiinnik marluinnarnik suleqateqarsimavoq.
Royal Arctic Line
Royal Arctic Linemi Verner Hammekenip aqutsinerani pisortaqatigiit arfineq-marlorsuarnik inuttaqarlutik marloriaat sinnerlugu inuttaqalersimagaluarput. Niels Clemensenip Verner Hammeken pisortaanertut taarsermaguli pisortaqatigiit maanna pingasuinnaapput.
Verner Hammeken 2023-mi oktobarimi pisortaanertut tunuarpoq, pisortaqatigiinniittumillu allamit Niels Clemensenimit taarserneqarluni. Taamaalillutik pisortaqatigiit arfinilinngorput, Clemensenimmi atorfia taarserneqanngimmat.
2024-p aallartinnerani ingerlatsinermut pisortaq Ivalu Kleist “inuunermini nutaanik unammilligassaqarniarluni” aalajangerpoq, soorlu Niels Clemensen Sermitsiamut taama nassuiaasimasoq. Taamaalillutik pisortaqatigiit tallimaannanngorput.
Allannguineq kingulleq
Ukioq manna juunip aallaqqaataani kingullermik allanngortoqarpoq, tassami pisortaqatigiit marluk pisortatut nalunaarsorneqarsimasutut tunuarmata. Tamatumuuna sulisoqarnermut pisortaq Bebiane Boye Hansen umiarsuarnillu ingerlatsinermut pisortaq Anders Bay Larsen pisortaqatigiinni pisariaqartinneqanngitsutut nalilerneqarput.
RAL-imi siulersuisut 2021/22-mi ukiut nikinneranni allaanerulluinnartumik oqariartuuteqarput, tassami pisortaqatigiit sisamanik ilaneqarnissaat aalajangerneqarmat, tassani Niels Clemensen, Bebiane Boye Hansen, Ivalu Kleist aamma Anders Bay Larsen siulersuisunit pisortaqatigiinngortinneqarlutik.
Taamanikkut siulersuisuni siulittaasup Ulrik Blidorfip pisortaqatigiit amerliartornerat ima nassuiarpaa:
- Ingerlatseqatigiiffiup attaveqatigiinni ammasuni siunissami suliassarilerumaakkaminut nukittunerusumik inissisimanissaa anguniarlugu pisortaqatigiit annertusarnissaannik siulersuisut aalajangiipput. Pisortaqatigiit amerlassutsimikkut kikkunnillu inuttaligaanermikkut allanngortinneqanngillat, allannguinerli ingerlatseqatigiiffiup pitsaasumik ineriartornerata ingerlatiinnarsinnaanissaanut annertuumik sunniuteqassaaq.
Hammekenip nassuiaataa
Taamanikkut pisortaanerup Verner Hammekenip annertusaaneq pillugu 2022-mi januaarimi ima oqaaseqarpoq:
- Pisortaqatigiit sulisullu akunneranniittup peerneratigut ataatsimoornissaq qulakkeerluarsinnaanerulissavarput, pisortaqatigiinnilu ataatsimoorluni pilersitseqatigiittarneq pitsaanerusoq angusinnaallugu, pingaartumik eqimattat pineqartut taama assigiinngisitaartigitillugit, ukioqqortussutsimut/misilittakkanut, suiaassutsimut tunuliaqutigisanullu tunngatillugu, aammali suliaqarfigisamut tunngatillugu.
Ulrik Blidorf pisortaqatigiinnik amerlanerusunik toqqaanermit qaammatit tallimat qaangiuttullu siulittaasutut tunuarpoq, Pâviâraq Heilmann-imillu taarserneqarluni, taassuma siulersuisut sinneri peqatigalugit umiarsuaatileqatigiiffiup qullersaqarfiata aaqqissugaanerani allannguiniarluni aalajangerpoq, taamaalilluni 2021-mi qaffasissutsimut utertoqarniassammat.
