Venezuelamiu
Sofia Hernandez aamma qallunaaq René Kristensen, Uummannami meeqqat
angerlarsimaffianni nipilersornermik ilinniartitsisuullutillu
immikkoortortaqarfimmi pisortaallutik perorsaasut, ingerlalluartunik marlunnik
pisiniarfiuteqarput.
Uummannaq
Sushi aamma Uummannaq Online Shop aappariit illuminni aneerasaartarfimminniillu
ingerlappaat. Tamanna Sofia Hernandezip sushiliai meeqqat angerlarsimaffiani
kaffillernermi sassaalliutaasartut mamarineqaqisut paasinarsimmat
nalaatsornerinnakkut aallartippoq. Uummannami innuttaasut naammaginngitsoortaraat. Uummannami
namminersortut angallassinerup ajornartorsiutaanera unammilligassaasa
annersaaraat, René Kristensen oqarpoq.
Venezuelamiu
Sofia Hernandez aamma qallunaaq René Kristensen, Uummannami meeqqat
angerlarsimaffianni nipilersornermik ilinniartitsisuullutillu
immikkoortortaqarfimmi pisortaallutik perorsaasut, ingerlalluartunik marlunnik
pisiniarfiuteqarput.
Uummannaq
Sushi aamma Uummannaq Online Shop aappariit illuminni aneerasaartarfimminniillu
ingerlappaat. Tamanna Sofia Hernandezip sushiliai meeqqat angerlarsimaffiani
kaffillernermi sassaalliutaasartut mamarineqaqisut paasinarsimmat
nalaatsornerinnakkut aallartippoq. Uummannami innuttaasut naammaginngitsoortaraat. Uummannami
namminersortut angallassinerup ajornartorsiutaanera unammilligassaasa
annersaaraat, René Kristensen oqarpoq.
Sushi
aallarniutaasoq
Sofia
Hernándezip, Uummannamut ukiut aqqaniliinnarnik matuma siorna tikikkami,
qaammatini pingasuni illoqarfimmiinnissani siunertaraa. Assigiinngitsunilli
pissuteqarluni, ilaatigut asanninneq, taamanimiilli illoqarfimmi
aalisartoqarfimmiunngorpoq. Meeqqallu angerlarsimaffianni nipilersornermik
ilinniartitsisutut atorfeqarpoq.
- Sushit
mamaaraakka, Uummannamullu taamani tikikkama sushinik pisiniarfissaqannginnama
nammineq sanasalerpunga. Meeqqallu angerlarsimaffianni kaffillernermi
sassaalliutissagisarlugit. Mamarineqartorujussuullutillu.
- Sushinik
tuniniaasalissasunga siunnersuutigineqarpoq. Tuniniaasalerpunga
ilimagisanniillu ingerlalluarnerujuulluni, taamanimiilli sushinik
assigiinngitsunik sananeq ilikkarpara. Kalaallit sushingersuupput.
Suliarilluagaanerat peqqissaarullugillu suliaanerat iluarisarpaat.
- Sushinik
tuniniaasarneq ingerlalluarpoq, Facebookimilu quppernitsinni 1300-nik
malinnaasoqarluni. Illoqarfimmiut kisimik pisineq ajorput, aamma umiatsiamik
tikittut sushiseriarlutik ingerlaqqittartut amerlapput, Sofia Hernandez
qungujulluni oqarpoq.
Ullormulli
sushinik amerlasuunik sanasoqassappat akuutissat amerlasuut
pisariaqartinneqarput.
-
Akuutissanik pisarialinnik pissarsiniarneq ajornakusoortuaannarpoq, ingammik
ukiukkut timmisartuussinerit ajornukusuuleraangata.
-
Taamaattumik pisiniarfimmik Uummannaq Online Shopimik taaguutilimmik
pilersitsinissamik siorna isumassarsivugut. Nuummiit Danmarkimiillu
nioqqutissanik assigiinngitsorpassuarnik piniartarluta, pingaartumik
nioqqutissat Pilersuisumi pisiarineqarsinnaanngitsut, oqarpoq,
sushiliornerminilu raajanik, saattuanik aalisakkanillu pujuukkanik
nunaqavissunit pissarsiani atortarlugit aamma oqaatigaa.
Suli
aallartisartoq
Suliffeqarfik
suli aallartisarlunilu suut pisiariumaneqartarnersut suli ilinniarneqartoq
Sofia Hernandez oqarpoq.
-
Nioqqutigisartakkavut imeruersaatit assigiinngitsut, naatsiiat panertut,
mamakujuit nioqqutissallu Asiameersut maani pisiariumaneqarnerusarput.
-
Susheerniartarnitsinnulli naatitarpassuarnik piniartarpugut, taakkulu aamma
tuniniartarlugit.
- Illumik
pisiniarfiuteqannginnata Uummannaq Sushi aamma Uummannaq Online Shop nammineq
illutsinnit ingerlappavut. Taamaattumik pisiniartartugut amerlanertigut
Facebookikkut inniminniisarput uagutsinnullu aasarlugit, oqarpoq.
Aappariit
aallarnisaasut nunaqarfinnut Uummannap eqqaaniittunut nioqqutissanik
assartuisinnaanersut aperineqarsimapput, taamaaliortoqarsinnaanersorlu
misissuleruttorpaat.
Assartuineq
ajornartorsiutaasoq
Nioqqutissanik
assartuineq unammillernarnerpaasoq René Kristensen oqarpoq.
-
Namminersortunut, ingammik nerisassanik suliaqartunut assartuussineq,
unammillernartorujussuuvoq. Taamaammat uagut maanimiullu amigaativut piniarsinnaajumallugit periarfissat
assigiinngitsut misissorpavut.
-
Nioqqutissat Danmarkimiit Uummannamut apuunniarnerat minnerpaamik qaammatinik
pingasunik sivisussuseqarsinnaasarput, tassa Nuummukaanneqartarnerannit
marloriaatingajammik sivisunerusarluni.
Inuit
pisiniarsinnaaniassammata aappariit nioqqutitik aneerasaartarfissuarminnut
iliorartarpaat.
-
Angerlarsimaffipput niuertarfittut atorparput. Marluulluta saniatigut
suliffeqarpugut, illoqarfiullu qeqqani pisiniarfiuteqalissagutta arlatta taanna
ingerlattariaqarpaa. Suullu tamaasa ataqatigiissarsinnaajunnaassavagut, René
Kristensen oqarpoq.
Suliffeqarfik
ineriartorsinnaasoq neriuutigaa, illoqarfiulli angissusaa pissutaalluni
piffissami tamakkiisumi sulisoqalernissaq killeqartoq erseqqissarpaa.
