Amaroq Minerals kuulti atorlugu aningaasanik nutaanik pissarsisoq

Canadamiut aatsitassarsiortitseqatigiiffiat Amaroq Minerals Nalunami kuultisiornissaminut aktianik nutaanik tuniniaanermigut 27,5 millionit pundit, imaluunniit 250 millionit koruuningajaat, katersorsimavai.

Aatsitassarsiortitseqatigiiffiup kuultisiorfimmit kuultimik akuiarneqanngitsumik sapaatip akunnerata siuliani tulluusimaarluni siullermeerluni tuniniaanera saqqummiunneqarsimatsiaannartoq, sapaatip akunnerani kingullermi taama nalunaaruteqartoqarpoq.

Amaroq Mineralsimit oqaatigineqartut naapertorlugit aningaasat nutaamik katersorneqartut atorlugit Kujataani pilersaarut nutaamik siuarsarneqassaaq, sapaatimmi akunnerani kingullermi teknikikkut ingerlanneqartussat ilaat akuersissuteqarfigigallarneqarmata, taamaalillutillu ingerlatassaminni teknikikkut periaasissat aallarnisarsinnaalissallugit. Aatsitassarsiortitseqatigiiffiup siusinnerusukkut nalunaarutigereerpaa, suliareqqiisarfiup naleqqussarniarnera ingerlatiinnarneqassasoq, naatsorsuutigineqartorlu 2025-p ingerlanerani immikkoortiterivimmik pilersitsisinnaassallutik. Kuulti taamaalilluni Nunatsinni suliareqqinneqarnerusinnaalissalluni.

Kuultinik niuerutissanik tunisassiorneq 

Kuultisiorfiup tamakkiisumik 2025-mi ammaqqinnissaa Naalakkersuisut naatsorsuutigaat, neriuutigalugulu suliniut taamanikkussamut suliffissanik inuussutissarsiornermilu periarfissanik kiisalu najukkami nunallu sinnerani isertitassanik pilersitsissasoq. Kuultisiorfiup suliffissanik 168-inik pilersitsisinnaanissaa naatsorsuutigineqarpoq. Taamaattorli aatsitassarsiortitseqatigiiffiup, Namminersorlutik Oqartussat kommunillu akornanni nungusaataanngitsumik atuinissamut isumaqatigiissut (IBA) suli isumaqatigiissutigineqanngilaq. Aatsitassarsiortitseqatigiiffiup akuiaavimmik, tigooraavimmik piiaaffiullu pilerseqqinnissaanut sanaartornissaminut 2020-miilli 500 millionit koruunit missaannik aningaasaliisimavoq.

AAMMA ATUARUK

Nalunamit kuulti siulleq

Pisortap Eldur Olafssonip tusagassiuutinut nalunaarummini oqaatigaa, aningaasaliissutit nutaat kingunerinik Nalunami kuultisiorfimmik aningaasarsiutigalugu tunisassiortoqalersinnaassasoq. - Aningaasaliisartut tamaasa, maannakkut aningaasaliisartut nutaallu, suliniummut tapersersuilluarsimanerat pillugu qujaffigerusuppakka. Siunissami pissanganartunik ineriartornernik arlalinnik pisoqarumaarpoq, ilaatigut Nalunami pitsaanerpaamik ingerlatsinissaq aningaasarsiutigalugulu tunisassiulernissaq naatsorsuutigineqarlutik, aamma misissuinitsinnik annertunerusumik siuarsaanissaq, ingerlatsinermilu siuariarnerit pingaarutillit pillugit nutaanik paasissutissiinissaq qilanaaraarput, Eldur Olafsson oqarpoq.

Nalunami kuultisiorfik 2004-09-mi Canadamiut ingerlatseqatigiiffiata Crew Gold Corporationip ataani piiaaffiuvoq. 2009-miit 2013-imut Tuluit ingerlatseqatigiiffiata Angel Miningip ataani piiaaffiuvoq. 2014-imi Canadamiut ingerlatseqatigiiffiata AEX Goldip akuersissut pisiaraa. Aatsitassarsiortitseqatigiiffik tamatuma kingorna Amaroq Mineralsimik taaguuteqalerpoq. 2025-mi piiaaffimmik aallartitsinissaq naatsorsuutigineqarpoq.