Atuaqatigiit 18-inik amerlanerpaaffillit suleqatigiisitamut suliassanngortinneqartut
Meeqqat atuarfiannut atatillugu allannguutitut siunnersuutit marluk suleqatigiissitap suliarisussanngorpai.
Meeqqat atuarfianni atuartitsivimmi ataatsimi amerlanerpaamik 18-inik atuartoqartarnissaa, kiisalu 3. aamma 7. klassini alloriarnermut allattariarsornermi misilitsinnerit atorunnaarsinneqarnissaat Demokraatit Inatsisartuni gruppiata siunnersuutigaa.
Assi: Oscar Scott Carl
Suliniaqatigiiffiit kommuninilu pingaarutilinnik suliaqartunik suleqatigiissitaliap, Demokraatit Inatsisartuni suleqatigiissitaata meeqqat atuarfiannut allannguutinut siunnersuutai misissussavai.
Suleqatigiisitaliamik pilersitsinissaq Naalakkersuisut isumassarsiaat, Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliami amerlanerussuteqartut tapersersorpaat.
Demokraanit siunnersuutigineqartuni siulleq tassaavoq meeqqat atuarfianni atuartitsivinni atuartut amerlanerpaamik 18-iunissaat, aappaattullu 3 - 7 klassimi atuartunut alloriarnermut allattariarsorluni misilitsittarnerisa atorunnaarsinneqarnissaa.
Naalakkersuisut siunnersuutigineqartut ingerlaannaq atuutilersinnagit suleqatigiisitamik,, pisariaqartitsiffiusuni atuartitsiviit ikilisarnissaannut periarfissanik misissuisussamik, pilersitsisoqarnissaa kissaatigaat. Piorsaanermik suliaqarnerit, aningaasaqarnikkullu sunniutaasussat nalunaarsorneqassapput.
Aammattaaq suleqatigiissitap atuartitseriaaseq qanoq tulluarsarneqarsinnaanersoq, atuartullu assigiinngitsunik misilitsinneqartarnerat nalilersorlugu misissussavaat.
Suleqatigiissitaq malittarisassat inatsisillu qanoq naleqqussaaffigineqarsinnaanerat pillugu siunnersuuteqassaaq, suliaallu nalunaarusiamut ataatsimut 2027-mi ukiakkut ataatsimiinnermi saqqummiunneqartussanngorlugit katersorneqassapput.
Naalakkersuisut suleqatigiissitaliornissamik siunnersuutaat Inatsisartuni marlunngornermi akuerineqarpoq.
