Aningaaseriviup ukiup affaanut naatsorsuutai ilimagisamit pitsaanerusut
Bankivik Kalaallit Nunaanni ingerlatsinermini akileraarutit suli ilanngaatiginagit 23 millionit koruuninik sinneqartooruteqarpoq. Naatsorsuutigisamik pitsaanerusoq, pisortaaneq oqarpoq.
Savalimmiormiut aningaaseriviat Banknordikimik ateqarnikoq Bankivikimmik maanna ateqarpoq.
Assi: Bankivik
Bankivik, Savalimmiuni Føroya Bankip pigisaa, ukiup affaanut naatsorsuutit pitsaasut nalunaarutigai.
Ukioq manna ukiup affaani siullermi ineriartorneq naatsorsuutigineqartumit pitsaanerusoq, aammalu Kalaallit Nunaanni immikkoortortaq akileraarutit suli ilanngaatiginagit 23 mio. koruuninik tapertaasoq Pisortaaneq Turið F. Arge tusagassiorfinnut nalunaarummi oqarpoq:
- Ukiup affaani siullermi sullitat akuunerat annertusisimavoq, ilaatigullu ingerlatseqatigiiffimmi taarsigassarsisitsineq, realkreditimik taarsigassarsisitsineq, uninngatitallu annertuseriarsimallutik, pisortaaneq oqarpoq, nangipporlu:
- Ataatsimut isigalugu sullitatta aningaasaqarnikkut ingerlalluarnerat taarsigassarsiaminnillu akilersuisinnaanerat nuannaarutigaarput, tamannalu pissutaalluni aamma aningaasaqarnikkut annaasaqarsimanermik imatorsuaq eqqaasassaqarnata, Turið F. Arge oqarpoq.
Ukiup affaani siullerni erniat appariartorsimagaluartoq atuisut Bankivimmi ileqqaagaqarusullutik soqutiginnittut aningaaserivik paasissutissiivoq. Ukiup affaani siullermi Kalaallit Nunaanni uninngatitaqarneq siorna piffissamut tassunga naleqqiullugu 15%-imik qaffariarsimasoq aningaaserivik paasissutissiivoq.
Føroya Bankip naatsorsuutai ukiup affaani siullermi akileraarutit ilanngaatiginagit 190 mio. koruuniupput.
2025-mi ingerlatseqatigiiffiup naatsorsuutaasa inernerat akileraarutit peereerlugit 235 – 265 mio. koruunit akornanniissasoq ilimagineqarpoq.
