Air Greenland
Aalborgimiit København aqqusaarlugu Kangerlussuarmut aasaanerani marlunngormat
timmisartuussisalerpoq.
Timmisartoq aqqummik
nutaamik perngaammik angallassisussanngormat ilaasut 20-innaat takkussimapput,
Air Greenlandimillu tikilluaqquneqarput VIP-kortimillu tunineqarlutillu
akisunermik billitseqarlutik angalasut utaqqisarfiannukarsinnaalerput.
Air Greenland
Aalborgimiit København aqqusaarlugu Kangerlussuarmut aasaanerani marlunngormat
timmisartuussisalerpoq.
Timmisartoq aqqummik
nutaamik perngaammik angallassisussanngormat ilaasut 20-innaat takkussimapput,
Air Greenlandimillu tikilluaqquneqarput VIP-kortimillu tunineqarlutillu
akisunermik billitseqarlutik angalasut utaqqisarfiannukarsinnaalerput.
Aalborgimi nuannaarneq
Aalborgip mittarfiata
Air Greenlandip timmisartuussisarneranut ilanngunnini nuannaarutigaa.
– Atlantikup avannaa
misiliiffigaarput, pingaartumik assartuineq Nuummilu mittarfissap nutaap
ammarnissaanut toqqaannartumik attaveqarneq. Soqutigineqarlualerumaarpoq,
sivisussagunarporli, mittarfiup pisortaa aallarnissaq sioqqutilaarlugu
Sermitsiamut oqarpoq.
Air Greenlandimi
ussassaarinermi pisortap Katja Vahlip aamma Jettimi timmisartumi Boeing
737-800-mi 189-inik issiavilimmi 20-t missaannaat ilaanerat
tupaallaatiginngilaa.
- Aalborgimiit
Københavnimut timmisartoq ilaasunik ulikkaarsinnaagatsigu ajunngilaq.
Ajorunnanngilaq, Katja Vahl oqarpoq.
Soqutigineqalerumaarpoq
– Aallarteqqaassaagut –
aqqut nutaaq soorunami nittarsaatissavarput. Aqqut soqutigineqareerpoq,
taamaattumik isumaqarpunga aasaanerani soqutiginninneq annertusissasoq.
Aalborgimiit København
aqqusaarlugu angalaneq ilaasunut Kastrupimi mittarfimmi sivisuumik
pisunnissaminnik orniginninngitsunut pitsaasuuvoq. Ingammik ilaqutariinnut
meerartalinnut utoqqalinersiaqartunullu tulluarpoq, timmisartormi ataasiinnaq
atorlugu angalaneruvoq – Kastrupimilu orsernermi minutsit 15-iinnaat atorlugit
nerisassanik aallertoqarsinnaalluni.
Timmisartumik
perngaammik aqqut taanna atorlugu angalaneq aporfissaqaaluppoq. Aalborgip
Kastrupillu mittarfii assigiinngitsunik atortorissaaruteqarmata ilaasut
nutaamik ikissutissaminnik tunineqarput, taamaalillunilu sivikitsumik
uninnganermut atatillugu issiavimmut allamut nuutsinneqaratarsinnaallutik.
Ilaasut niusussanngormata tigummiaannarlugu nassatatik tigussagaat
ilisimatinneqarsimanngillat, taamaattumillu Aalborgimit angalasut issiavimmut
allamut nuuttussanngoramik nassatatik tigusimannginnamikkit paatsoortoqarpoq.
– Soorunami
taamaattoqassanngilaq. Nutaamilli aaqqissuussineq attaveqaqatigiinnerlu
inissinneqaqqaassaaq. Siunissami pitsaanerussaaq, Air Greenlandimi
ussassaarinermut pisortaq neriorsuivoq.
