NAALAKKERSUISUT
Aqutsisut tamarmik Nunatsinniissapput
Naalakkersuisut Royal Greenlandip siulersuisuinut ersarissumik piumasaqaataat tassaavoq suliffeqarfiup qullersaqarfiata aqutsisullu Nunatsinniinnissaat. Taamaakkaluartoq aqutsisuni sisamaasuni pingasut Nunatta avataani najugaqarput
– Qullersaqarfimmi Nunatsinni aqutsisut amerlanerulernissaat piginnittut kissaatigaat – tamannalu siulersuisunit tapersersorneqarpoq. Aamma siulersuisuni isumaqarpugut tamanna naammattumik pingaartinneqarsimanngitsoq, tamannalu ukiuni aggersuni aaqqinniarniarlugu sapinngisatsinnik iliuuseqarniarpugut, Royal Greenlandimi siulersuisuni siulittaasoq Maliina Abelsen oqarpoq.
Foto: Leiff Josefsen
Royal Greenlandip 2023-mi ataatsimeersuarnerani Naalakkersuisut siulittaasuata Múte B. Egedep oqaatigaa, aqutsisut minnerpaamik marluk Nunatsinni najugaqassasut. Ukioq manna ataatsimeersuarnermi, tallimanngornermi maajip 17-anni ingerlanneqartumi, piumasaqaat sakkortusineqarpoq: Ingerlatseqatigiiffiup qullersaqarfia aqutsisullu tamarmik Nunatsinni najugaqassapput, tamannalu Múte B. Egedep kingusinnerusukkut Sermitsiamut uppernarsarpaa.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat ilaanni allaaserisaavoq.
Allaaserisat pisartagaqartunit siunissami taamaallaat atuarneqarsinnaajumaassapput.
Atuarluarna.
Piginnittunik oqaloqateqarluartarneq
Royal Greenlandimi qullersaqarfik ullumikkut sisamanik inuttaqarpoq. Pisortaaneq Susanne Arfelt Rajamand, februaarimi 2023-mi atorfinitsinneqarpoq, ukiumilu tassani septembarimiilli Sverigemi Malmømi najugaqarluni. Aningaasaqarnermut pisortaq Niels Duus Kinnerup aamma suliffeqarfissuup tunisassiornermi pisortaa Lars Nielsen, tamarmik Aalborgimi najugaqartut, aamma Sulisoqarnermut Attaveqaqatigiinnermullu pisortaq Bodil Marie Damgaard, septembarimi 2023-mi atorfinitsinneqartoq, aqutsisuni kisiartaalluni Nunatsinni najugaqarpoq. Taakku saniatigut pilerisaarinermut piujuartitsinermullu pisortamik aamma atorfinitsitsisoqarpoq, tassaasumik Joanna Hutchins, taanna aamma Nuummi najugaqarpoq, Royal Greenlandimilu aqutsisunut ilaalluni.
Naalakkersuisut Royal Greenlandip siulersuisuinut erseqqissumik piumasaraat, ingerlatseqatigiiffiup qullersaqarfia aqutsisuilu Nunatsinniissasut, ukiumoortumik ataatsimeersuarnerup kingorna Múte B. Egede Sermitsiamut allappoq.
Foto: Leiff Josefsen
Royal Greenlandip Naalakkersuisunit piumasaqaatit taamaalilluni naammassinerai aperineqarami, siulersuisuni siulittaasoq Maliina Abelsen ima akivoq:
– Pilersaaruterput malipparput, taamalu piginnittullu anguniakkavut assigiipput. Piginnittuvut oqaloqatigilluartarpavut, siunnerfeqaqatigiillutalu. Assersuutigalugu Bodil Marie Damgaard, Nunatsinni najugalik, aqutsisunut ilaasortanngortipparput, aamma Joanna Hutchins aqutsisunut ilaasortanngortinneqarluni. Piginnittullu kissaatigisaat naapertorlugit taama siunnerfeqarluta ingerlaqqissaagut, Maliina Abelsen oqarpoq.
Nunarsuaq tamakkerlugu pisisartoqartoq
Susanne Arfelt Rajamand Royal Greenlandimut nuuppoq, immummik tunisassiortup Fonterrap Asiap Kujataata kangiani immikkoortortaqarfiani tuniniaanermut pisortatut atorfeqarsimalluni Singaporemilu najugaqarsimalluni.
– Susanne Arfelt Rajamand atorfinitsipparput taamanikkut piukkunnarnerpaammat, Asiamilu misilittagaqarluarnera atorluarusullugu. Aammattaaq pingaaruteqarpoq paasissallugu suliffeqarfimmi Royal Greenlanditut ittumi pingaarnerpaaq tassaanngimmat Nunatsinni issiavimmi ullut tamaasa issianissaq. Suliffeqarfiup nioqqutissiaannik tuniniaanissaq aamma pingaaruteqarpoq, tamannalu ilaatigut pisinnaalluni nittarsaassinerni peqataanikkut aamma suliffeqarfik sinnerlugu sullitanut najuunnissaq, tamannalu Susanne Arfelt Rajamandip pikkoriffigilluinnarpaa. Taamaattumik siunissami nunarsuarmi nunani allani tuniniaanermut aamma pisortaqartassaagut, qullersaqarfilli pingaarnerusumik Nunatsinniissaaq. Matumani aamma pingaaruteqarpoq, Namminersorlutik Oqartussat ingerlatseqatigiiffii allat aamma Royal Greenland assigiinngissuteqarmata. Maani innuttaasut pinnagit nunarsuup sinnerani pingaarnernik pisisartoqarpugut. Taama inissisimasoqartillugu nunani tamalaani ingerlatsisoqartariaqarpoq. Isumaqarpungalu piginnittut tamanna paasisinnaalluaraat.
- Nunatsinni qullersaqarfimmi aqutsisut amerlanerunissaat piginnittut kissaatigaat – tamannalu siulersuisunit tapersersorneqarpoq. Aamma siulersuisuni isumaqarpugut tamanna naammattumik pingaartinneqarsimanngitsoq, tamannalu ukiuni aggersuni aaqqinniarniarlugu sapinngisatsinnik iliuuseqarniarpugut, Maliina Abelsen oqarpoq, nangillunilu oqaatigalugu pisortap isumaqatigiissutaani aamma aalajangersagaqartoq qanoq sivisutigisumik Kalaallit Nunaanniittarnissaa pillugu, taamaaliornikkut Naalakkersuisut kissaataat naaperiaaffigineqarsimasoq.
