Arctic Circle Business Destination Managerimik nutaamik atorfinitsitsivoq
Arctic Circle Businessip Taatsi Fleischer Destination Manageritut atorfinitsippaa. Taatsi Fleischer septembarip aappaa aallarnerfigalugu atorfinissaaq, Qeqqata Kommuniata takornariarfissatut inuussutissarsiortunullu pilerinartuunissaanik ineriartortitsinermi qitiusumik inissisimassalluni.
Foto: Taatsi Fleischer
Taatsi Fleischer Arctic Circle Businessip allaffeqarfiani septembarip ulluisa aappaannit takussaalissaaq. Taassumammi Tupaarnaq Kreutzmann Kleist Destination Manageritut taarserpaa.
- Taatsi misilittagaqarluarpoq nunallu immikkoortuani ineriartortitsinissamut pimoorussilluarluni, Arctic Circle Business atorfinitsitsinermi nalunaarummi allappoq.
Taatsi Fleischer pisortani namminersortunilu suliffeqarfinni assigiinngitsorpassuarnik misilittagaqarpoq, ilaatigut Tusassimi tunisassiornermut pisortatut Inuussutissarsiornermullu Naalakkersuisoqarfimmi immikkut siunnersortitut, kiisalu kingullermik Visit Greenlandimi allaffissornikkut pisortatut misilittagaqarluni.
- Nunap immikkoortuani ineriartortitseqqinnissamut suleqataalerama qilanaarpunga. Siornatigut Sisimiuni ukiorpaalunni najugaqarnikuuvunga Kangerlussuarmilu piffissami sivisuumi arlaleriarlunga najugaqarnikuullunga, taakkulu marluk uummateqarfigingaarpakka.
- Kommunimi tamarmi suliniutit pissanganartut ingerlareersut ingerlateqqinnissaannut aamma Qeqqata Kommuniata takornariartitsinermi inuussutissarsiornermilu periarfissaanik immikkuullarissunik nukittorsaasussanik siuarsaasussanillu nutaanik pissanganartunik suliniuteqarnissara qilanaaraara.
