Arctic Umiaq Line nunaqavissumik nutaamik suleqateqalerpoq
Naleraq Seasafari Uummannamiit Upernavimmut, Ukkusissanut, Saattunut Ikerasammullu attaveqarnermik qulakkeerinnissaaq.
Annonse
Namminersortunik suleqateqarnikkut Arctic Umiaq Linemut ilaasut Uummannamit aasaanerani angalallutik ingerlateqqinnissaat qulakkeerneqassaaq.
Arctic Umiaq Line Naleraq Seafarimik isumaqatigiissuteqarsimavoq, suliffeqarfiit taakku marluk tusagassiuutinut nalunaarummi allapput.
Arctic Umiaq Linep umiarsuaa Sarfaq Ittuk marlunngorneq allortarlugu juunimiit oktobarimut tikittassaaq. Sarfaq Ittuk akunnerni arfinilinni umiarsualivimmiittassaaq, piffissamilu tassani Naleraq Seasafari Uummannamit Ukkusissat, Saattut aamma Ikerasak aqqusaarlugit Uummannamut uteqqittassaaq, AUL-ip kujammut allannginnerani.
Takornariartitsineq ineriartorteqqinniaraat
Avannamut kujataanullu ilaasunut allakkanullu nutaanik nassiussanut suleqatigiinneq periarfissaqalersitsivoq.
Umiarsuaatileqatigiiffik nunap immikkoortuani ingerlatseqatigiiffiit ineriartornissaannut ikiuerusuttoq, Arctic Umiaq Linep pisortaa Jens-Jakob Sandgreen oqarpoq:
- Aalisakkat ukiuunerani maaniittartut eqqarsaatigalugit takornariartitsinerup inuussutissarsiutitut ineriartornera mianersornarsinnaavoq, isumakuluuteqartuaannarlunilu. Takornariat aalisakkatut aaneqarsinnaanngillat, taamaattumik angallassisartunut siunissaq takorlooruminaassinnaalluni, annermik Nuup avataani angallassinermik suliaqartunut.
- Suleqatigiinneq imatut ittoq, takornarialerineq eqqarsaatigalugu ineriartornissaanut siuariartorsinnaaneranut sunniuteqarsinnaalluarpoq, Umiarsuup nunatta illoqarfii kommuninit tallimaneersut tikittarpai, taamaasilluni sineriammi inuiaqatigiinni sunniuteqarsinnaalluni, Jens-Jakob Sandgreen oqarpoq.
Maligassiuisuuniartut
Naleraq Seasafarimi suleqataasoq Heidi Jensen suleqatigiinnissamik kiisami nalunaaruteqarnerminik nuannaarutiginnippoq:
- Nunaqavissut suliffiuteqartugut uagutsinnut isumaqartorujussuuvoq, sinersortaat suleqatigalugu maani avannaani tikissinnaasavut amerlissammata. Uigalu neriuutigivarput suleqatigiinnerup matuma takutissinnaagaa, sumiiffinni assiginngitsuni nunaqavissut qanoq suleqatigillutik ineriartortitsisinnaanerannik, Heidi Jensen oqarpoq.
Inniminniinerit Arctic Umiaq Linep inniminniisarfiatigut nutaakkut ingerlanneqartassapput.
