Blue Water Greenland ineriartorpoq

Blue Water Greenlandip allaffiani ammasumi allaffiup qarasaasiallu igalaasartaata saavani sulisut imminnut qanillutik issiapput, assartuinermut, nassiussinermut, timmisartukkut assartuinermut, umiarsuarmut usilersuinermut nutsernermullu tunngasunik suliassanik ulapputeqarlutik. Suliffeqarfimmi assartuinermik pilersuinermillu suliaqartumi, Nuummi 45-t missaanni sulisulimmi Kalaallit Nunaannilu katillugit 100-t missaanni sulisulimmi, niuerneq ingerlalluarpoq.

- Aap, ulapippugut, mittarfik kisiat pissutiginagu aammali ineriartorneq nassiussallu amerliartornerat pissutigalugit suliassavut amerliartorput, pisortaq Lars Vajse oqarpoq, nunallu tamalaat akornanni mittarfimmut nutaamut suliffeqarfiup naatsorsuutai, ineriartorneq piffissamilu kingullermi saattuanik uumasunik nipisallu suaanik nutaanik timmisartukkut assartuinermik misilittakkat pillugit, ulapinnermi nalaani oqaluttuarnissamut piffissaqarpoq.

- Alliartorpugut, pilersuinermillu suliffeqarfimmi uagutsitut ittumi tamanna malugineqanngitsuunngilaq. Tamatumunnga arlallit pissutaapput, soorlu aalisakkat, umiarsuarnut takornariartaatinut ilaasartaatit nioqqutissanillu eqqussinermi avammullu niuernermi nioqqutissat, Lars Vajse oqarpoq.

Islandimit, Savalimmiunit Norgemillu aalisakkanik qalerualinnillu nutaajusunik avammut tunisinermi Blue Water Shipping misilittagaqarluarpoq, mittarfittaarlu pissutigalugu avammut tunisat amerleriarumaartut ilimagaa.

- Billundimi sulisuvut aalisakkanik nutaanik tuniniaanermik suliaqartuupput, taamaattumik kikkut tamaasa ikiorsinnaajumallugit ilisimasaqarluarpugut. Kalaallit Nunaannit avammut tunisassiat siunissami amerlinerunissaat naatsorsuutigilluinnarpara, Lars Vajse oqarpoq.

Kangerlussuup aqqusaarneqartarnera

Nuummi illoqarfinnilu allani pisisartut nioqqutissanik nutaanik takuniaanissaat, Kalaallit Nunaanni assartuisartut annersaasa ilaattut naatsorsuutigaa.

- Kangerlussuup aqqusaarneqartarnera ajornakusoortitsisorujussuuvoq, qaangiuppallu nioqqutissat illoqarfiit pingaarnersaanut toqqaannartumik sukkanerusumillu timmisartukkut tikiunneqartalissapput. Assigiinngitsorpassuarnik nioqquteqarsinnaalissaagut, nioqqutissanullu piffissaajannginnerulissaagut, Lars Vajse oqarpoq, Kujataanilu pisiniarfissuit assersuutitut taallugit.

- Nioqqutissat aalajangersimasut Kujataani pisiniarfissuit piaaralutik pisiarineq ajorpaat, nalunngilaammi 60-70 procentii asiussasut, Lars Vajse oqarpoq.

Timmisartuutileqatigiiffiit allat Nuummut tikinnerisigut assartuinermi akigitinneqartut unammillerneqartalerpata nioqqutissat akikinnerulernissaasa qulakkeerneqarnissaa, nioqqutissat assigiinngitsut akikinnerulerlutillu assigiinngiiaarnerulernissaat, mittarfiillu nutaat nunanit tamalaanit tikinneqartartut timmisartukkut assartuinermi unammillernermik pilersitsinissaat neriuutigaa.

Mittarfiit nutaat takornariaqarnerulernermik kinguneqarumaarnersut nalornissutigigaluarlugu neriuuteqarluarpoq.

- Timmisartortitseqatigiiffiit Nuummut tikittartut taamaallaat timmisartunik minnerusunik nassiussaqanngitsunillu takornarianik tikisitsisassanersut nalunarpoq, qanorluunniilli pisoqaraluarpat unammillertoqarnissaa qularnanngilaq. 30-40 procentinik nioqqutissanik useqarlutik Nuummut toqqaannartumik timmisartuussisarumaarnerminnik, allallu tamarmik assigalugit akikinnerulerumaarnerminnik Air Greenland iliuuseqartuulluni oqarumaartoq neriuutigaarput, Lars Vajse oqarpoq.

Illumik anginermik pisarisaqartitsisut

Nuummi Nukappiakkulumi Blue Water Greenlandip illuutai tatineqaqqapput.

- Inissatigut unammillerneqaqqagatta alliliillutalu allatut iliuuseqartariaqarpugut, Nuummi alliartortoq takusinnaavarput. Pilersuinermik assartuinermillu ingerlatsivik anginerusumik illutaassaaq, soorluttaaq Blue Waterip Ilulissani immikkoortortaqarfia terminalimut nutaamut nuuttoq. Pioreersumik illusissanerlutik imaluunniit terminalimik nutaamik sanassanerlutik aqutsisut aalajangertariaqarpaat, Lars Vajse oqarpoq.

Nuummi mittarfik nutaaq nunanit tamalaanit tikinneqartartussaq kisimi ineriartortitsinngilaq, umiarsualivimmilli alliliisoqarnera pissutigalugu Blue Water Greenlandip suliassai amerlissapput.

-Umiarsualiviup allilerneqarnerata kingunerisaanik umiarsuarnik amerlanerusunik tikittoqarsinnaalissaaq. Umiarsuit anginerusut, soorlu aalisariutit aammali takornariartaatit tikilluaqqusinnaalissavagut, taamaattumik ukiut marlussuit qaangiuppata umiarsuarnik amerlanerusunik tikittoqartalernissaa ilimagisinnaavarput, Lars Vajse oqarpoq, ullumikkullu umiarsualivik ulikkaarmat sullitanik itigartitsisariaqartarlutik nassuiaalluni.

- Sullitat arlallit itigartittariaqartarpavut oqarlutalu pilersaarutiminnut naapertuuttumik ulloq alla tulaassuiffigerusussinnaagivut, taamaattumik umiarsualivik allilerneqarpat qularnanngitsumik alliartornerulissaagut, Lars Vajse oqarpoq.

Nuummi ilaasunik taarseraaneq

Umiarsuarnik takornariartaatinik nioqquteqarneq Blue Water Greenlandip niuerfiisa annersaasa ilagaat, umiarsuarnut takornariartaatinut umiarsualivinni sinniisuugami. Siorna umiarsuarnik 250-it missaanniittunik tikittoqarsimavoq, 2024-milu taamaattoqaqqissasoq naatsorsuutigineqarpoq, tassa umiarsuarnik angisuunik 2.500-nik ilaasoqartunik umiarsuarnillu ilisimasassarsiortunik minnerusunik 150-250-inik ilaasoqarsinnaasunik.

Assersuutigalugu umiarsuarnut takornariartaatinut ilaasunut akileraarutinik Blue Water Greenland isumaginnissinnaavoq, umiarsuarmi ilaasut qassiunerannik immersugassanik immersuisarluni namminersorlutillu oqartussat sinnerlugit akiligassanik naatsorsuisarluni, imaluunniit ilaasut inuttallu kigutileriffimmut nakorsiartarfinnulluunniit ornigussinnaanissaat isumagisarlugu, sinerissamilu katersugaasiviit ammasarfii isertarfiilu pillugit paasissutissiisarluni allarpassuarnillu isumaginnissinnaalluni.

Umiarsuarnik takornariartaatinik saqqummersitsinermit “Seatrade Cruise Global”-imi Miamimi Floridamiittumi Lars Vajse peqataareerluni angerlaqqammerpoq, aappaagulu suliassarpassuaqassalluni naatsorsuutigaa, umiarsuarnik takornariartaatinik ilaasunik inuttanillu taarseraasoqartalerpat.

- Taarseraannerit isumagisalerutsigit pingaaruteqarnerulissaagut, naak umiarsuarnik takornariartaatinik takornariartitsinermut pingaaruteqarluareeraluarluta, oqarpoq.

Mittarfissap malitsigisaanik nassatanik isumaginninnermut, umiarsualivimmi umiarsuarnik kiffartuussinermut nerisassanillu pilersuinermut sulisut amerlanerusut pisariaqartinneqassapput, oqarpoq aasaaneranilu ikiortinik amerlanerusunik atorfinitsitsisareersimallutik nassuiaalluni.

- Sulinermi tatineqarneq annikillisarumallugu aasaanerani sulisussarsiortarpugut, aappaagulu suli amerlanerusunik pisariaqartitsissaagut, Lars Vajse oqarpoq, Greenland Business Schoolimiillu aamma Ilisimatusarfimmiit aasaanerani ilinniartunik ikiortissarsiornini iluatsinngitsoorsimanerarlugu.