Bussinik ingerlatseqatigiiffik angusarissaarpoq ilaasuilu amerleriarlutik

Nuup Bussiisa naatsorsuinermi angusaat 2023-mi 861.000 koruuninik sinneqartooruteqarnermik ersersitsipput.

Nuup Bussii
2023-mi 1,7 millioninit amerlanerusunik Nuup Bussii ilaasoqarsimapput.

Kommunip bussinik ingerlatseqatigiiffiutaa Nuup Bussii 2023-mi 1,7 millionit sinnerlugit ilaasoqarsimapput, 2022-mullu sanilliullugu 28.416-inik ilaasoqarnerupput.

Bussinik ingerlatseqatigiiffik naapertorlugu bussertut amerleriarujussuarnerat akeqanngitsumik bussertarnerup atuutilersinneqarneranik pissuteqarpoq, tassani meeqqat 16-it inorlugit ukiullit 2022-mut sanilliullugu 55,1 procentimik amerleriarsimammata, utoqqalinersiallit/sioqqutsilluni soraarnerussutisiaqalersimasut 2022-mut sanilliullugu 78,4 procentimik amerleriarsimallutik.

- Tassa imaappoq politikkikkut anguniagaq anguneqarpoq – taakkunani bussinik atuisut amerlanerusut anguniarneqarmat, ingerlatseqatigiiffiup ukiumoortumik naatsorsuutaani, Kommuneqarfik Sermersuumi Aningaasaqarnermut Inuussutissarsiornermullu Ataatsimiititami sapaatip-akunnerani matumani suliarineqartussami, tamanna erserpoq.

Angusat naammaginartut

Ingerlatseqatigiiffik aningaasatigut 861.000 koruuninik sinneqartooruteqarpoq, ukiumi naatsorsuusiorfiusumi 2022-mi 673.000 koruuninik sinneqartooruteqartoq.

Angusat naammaginartutut nalilerneqarsimapput.

Sillimmasiinermut akiligassat siornatigut akiligassat katillugit 825.000 koruuniusut ingerlatseqatigiiffiup akilersimavai.

- Naatsorsuutit immikkoortuat immikkut ittoq taanna ilanngunneqarsimanngitsuuppat 2023-mi ukiumut angusat 1.686.000 koruuninik sinneqartooruteqarfiusimassagaluarput, taamaalillunilu missingersuutigineqartumit angusaqarluarnerusimapput, kommunimi ingerlatsivik naatsorsuutit pillugit allappoq.

Nuup Bussii 20,3 millionit koruuninik nammineq aningaasaateqarput.

Powered by Labrador CMS