Combymik piginnittoq: Taamaattumik nutaanik piginneqatitaarpugut
Qarasaasianik suliaqarfiup Comby A/S-ip norskillu aningaasaliinermik ingerlatseqatigiiffiata Hawkip suliffeqarfinnik annertuumik paarlaasseqateqarnerat ukiuni marlunni kingullerni ingerlasimavoq, tassani pisiortornissamut alliartornerunissamullu suliffeqarfimmik nukittorsaasinnaasumik Comby A/S aningaasaliisussarsiorsimalluni.
- Uagutsitut pingaartitalinnik suleqatissaqalernissarput pingaaruteqarsimavoq, Brian Torp Norgemi suliffeqarfimmik Hawkimik pisineq pillugu oqarpoq.
Leiff Josefsen
Brian Torp, Michael Collin peqatigalugu Comby A/S-imik piginneqataasoq, piginneqataasumik nutaamik “piginnaasumik” suleqateqalernissaq sooq kissaatigineqarsimanersoq nassuiaavoq.
- Uagutsitut pingaartitaqartumik suleqatissatsinnik nassaarnissarput pingaaruteqarsimavoq, taamaalilluta suliffeqarfiutivut assigiimmik isiginnittaaseqarluta ineriartortissinnaavavut. Hawkimi piginneqataalerpugut, aamma Hawk Combymi piginneqataalerpoq, tamatumalu kingunerisaanik suliffeqarfitta pitsaanerpaamik tamatsinnullu iluaqutaasumik ingerlannissaat soqutigaarput, Brian Torp Sermitsiaq.AG-mut oqarpoq.
Aningaasanik pissarsisut
Piginneqatigiinnermik paarlaasseqatigiinnerup saniatigut Comby-mik piginnittut „aningaasannguit“ pissarsiaraat, aningaasalli qanoq amerlatiginersut oqaatigiumanngilaa.
- Kalaallit Nunaanni ikiorneqarnissamik pisariaqartitsigutta, Hawkitut ittut qarasaasialerinermik suliaqartut amerlasuut saaffigisinnaavavut, taakkulu ajornartorsiutitsinnik aaqqiinitsinni aamma ikiuukkumasarput, Brian Torp nassuiaavoq.
Comby A/S, Comby Greenland A/S-imut aamma Comby Danmark A/S-imut piginneqataasutut ingerlatseqatigiiffiusoq, atorunnaarsinneqarumaartoq taanna ilisimatitsivoq. Taarsiullugu piginneqataasutut ingerlatseqatigiiffik nutaaq pilersinneqassaaq, tassalu CB Bidco ApS, tassani Combymik piginnittut Brian Torp, Michael Collin aamma Stefan Boel piginneqataassutsip 20 procentia avillugu pigissavaat, Hawkillu 80 procentit sinneri pigissavai.
- Kalaallit Nunaanni inatsisitigut atugassarititaasut pissutigalugit Danmarkimi piginneqataassutsinik ingerlatseqatigiiffimmik pilersitsineq pitsaanerpaavoq, nassuiarneqarpoq.
Comby Greenland A/S-ip 2022/23-mut ukiumoortumik naatsorsuutaani kingullermi 11,8 millionit koruuninik sinneqartooruteqartoq takuneqarsinnaavoq – ukiup siulianut sanilliullugu 3 millionit koruuninik amerlanerusunik. qarasaasialerinermik ingerlatsiviuvoq ingerlalluartoq, 52 millionit koruuningajannik nammineq aningaasaateqartoq.
Illunik piginneqatigiiffik ilanngunneqanngitsoq
Ingerlatseqatigiiffik Comby aamma illunik piginneqatigiiffiuvoq.
- Illunik piginneqatigiiffik matumani ilanngutinngilarput, taamaattumillu Hawkimut, qarasaasianik suliaqartuinnarmut, ilanngunneqanngilaq, Brian Torp oqarpoq.
