Datacenterip nutaap attaveqaatit isumannaannerusut qulakkiissavai
Tusass Nuummi datacenterimut nutaamut aningaasaliissuteqarpoq. - Nuummi nutaaliamik datacenteritaarnissaq pisarialimmik attaveqaasersuisinnaanissamut pingaaruteqarluinnarpoq, Tusassimi pisortap tullia oqarpoq.
Tusass nuannaarutigaarput nutaamik datacenterimik, attaveqaatit isumannaannerusut qulakkeerniarlugit.
Assiliisoq: Tusass
Attaveqaatit isumannaatsut patajuutsullu nunarsuarmi attaveqaatitigut saassunneqaratarsinnaanermik aarlerinaateqarfiusumi pingaaruteqarluinnalersimapput.
Tusass datacenterimik nutaamik sanaartortoqarnissaanut aningaasaliissuteqarpoq, Kalaallit Nunaanni attaveqaatit pingaaruteqartut isumannaatsuunissaat qulakkeerniarlugu. Tusass ilisimatitsivoq datacenter nutaaq Nuummi illoqarfiup immikkoortuani Qinngorput-mi sananeqassasoq, innaallagialersuummik sillimmassummik, nillorsaammik attaveqaatinillu peqassalluni, piumasaqaatillu annerpaat naapertorlugit sananeqassalluni.
Tamassumalu Tusassimut oqarasuaatitigut internettimullu atortorissaarutinik pisariaqartunik inissiisinnaanissaanut periarfissiissaaq. Sanaartorneq 2026-p naanerani naammassisussatut ilimagineqarpoq 155 milliuunit koruuninillu akeqassangatinneqarluni.
- Nuummi nutaaliamik datacenteritaarnissaq pisarialimmik attaveqaasersuisinnaanissamut pingaaruteqarluinnarpoq. Attaveqaasersuinissamut isumannaallisaaneq kisimi pineqanngilaq, inuiaqatigiinnili isumannaallisaanermut aamma attuumassuteqarmat. Una datacenteri nutaaq periusiatsinnit pilersaarutinit pilersitsinermi siulliuvoq, siunissamilu Nunatsinni attaveqaatitigut isumannaallisaanermut annertuumik aningaasaliissamaarluta, Tusassimi pisortap tullia Jonas Hasselriis tusagassiorfinnut nalunaaruteqarluni oqarpoq.
Permagreen sanaartussaaq
Datacenterip sanaartorneqarnissaa piaarnerpaamik aallartinneqassaaq. Permagreen datacenterimik sanaartortussatut toqqarneqarsimavoq.
- Suliniummut taama pingaaruteqartigisumut ilaanissarput nuannaarutigeqaarput. Tusass suleqatigineratigut sanaartornermut teknikkikkullu suliaqarsinnaanermut piginnaasagut saqqummiulluarsinnaanissaannut periarfissinneqaratta tulluusimaarutigaarput. Datacenterimillu suliffeqarfinni piumasaqaatinik annertuunik piumasaqaatitalimmik aammalu inuiaqatigiinnut qarasaasiatigut siunissaannut pisariaqarluinnartumik pilersitsiniarnermi naammassinnilluarnissarput qilanaaralugu, Jeppe Bloch, Permagreenimi pisortaaneq oqarpoq.
