Enos Tasiilami aalisakkanik tunitsivimmut tunisisarpoq: 
– Maanna ilaquttakka pilersorsinnaalerpakka 

22-nik ukiulik Enos Kristiansen ullaakkut aalisariarluni aallarmat Tasiilaq suli ussissumik pujorpoq, soorlulusooq putsup Tasiilaq pooqqaannaraa. 

- Ullumikkut silagippoq, Enos oqarpoq.

Minutsit qulit qaangiutiinnartut kangerluup paava aalanikkaaq tikippaat. Enosip motoori siullermik tassani qamippaa ningitassanilu siulliit ningillugit. Inuttaasa marluliaasut 16-inik ukiullit Barselajip Eliaserillu ningitassatik aamma siulliit ningippaat. Pitsianngitsoq saarulliit siulliit qaqikatareerpaat. Tasiilami aalisakkanik tunitsiviup ammarnerata kingorna nukappissanut taakkununnga qaammatini kingullerni ullut taama aallartikkajupput.

- Sila qanoq ikkaluarpalluunniit aalisarneq orniginartarpoq, inuussutissarsiutigivarpummi. Nerisassaqarnikkut, assigiinngitsutigullu, soorlu atortut pigisat atisallu, tamakkuninnga pisiniarsinnaasarpugut. Iluaqutaavoq, Enos oqaluttuarpoq.

Ulluni sisamani 52.000 koruunit

- Maani mikipput, ingerlaqqinniarta, Enos taama oqarpoq, kingornalu nukappissat taakkua pingasut Poca 770-imik allamut ingerlaqqipput.

Enos inuttaalu saarullinnik ullut sisamat ingerlaneranni 3,7 tonsinik sapaatip-akunnerata siuliani tunisipput. Saarulliit niaqullit kiilumut 14 koruuneqarmata, taamaalillutik 52.000 koruunit isertippaat. Isertitaat ajoriinnagassaanngillat, Enosilli umiatsiaq attartoramiuk attartornerminut akiliisarpoq. Inuttat aamma akissarsilluartariaqarput. Akiligassallu tamarmik akilereermata ulluni sisamani pisani 13.000 koruuninik pissarsissutigai.

AAMMA ATUARUK

Aqqaneq-marluullutik ineqatigiipput, aniguiniarnissarlu imaannaanngilaq

- Pilersuivunga. Aappara Qaqortumi GU-mi atuartoq ornittussaariarakku katersuivunga Qaqortuliarnissannut. Aalisarnermi isertitat, ulluni sisamani aningaasarsiat anginerujussuupput, suliffiinnarminngaanniit ajunnginnerujussuuvoq aalisarneq, Enos oqarpoq.

Seqernup imaanut saqqarnerani qillaallattarnerit Enosip seqinersiutaanut Oakleyinut qinngortarput. Saarulliit angingaatsiartorsuit qaqillattaaleramikkit iluarisimaarpasikkaa nalunanngilaq. Pisatik kaarersuarnut milorutillattaajutaa Barselajimut qungujuttarpoq. Aalisartullu allat eqqaatungaaniittut pisaqarsimanermit pukkilisimaqaat.

Sapaatip-akunnerata siuliani kinngungajassimallutik Enosip oqaluttuaraa. Taama pisoqarnera ullut ullumikkutulli alianaattuaannannginneranik eqqaasitsipput. Sila alianaatsillugu aalisariarneq nuannertuaannarpoq, silali ajoraluarpalluunniit aamma aallartariaqartarput.

Umiatsiaqanngikkaanni aalisartoqarsinnaanngilaq

Saarulliit kaarersuarnut milorujunneqaraangamik misarpallattarnerat angutit inuuttaruttortut pingasut aningaasarsiorluarnerat ersersittutullusooq ittarpaat. Aningaasarsiorneq aalisakkanik tunitsiviup ammarnerata kingorna ajornannginnerulersimaqaaq.

Tunitsiviulli qerigasuartitsiviata ajoquteqarnera peqqutaalluni inuussutissarsiutigalugu aalisartut kisimik tunisisinnaapput. Unammillernartup aappaa tassaavoq saarulliit takkusimaartarnerisa sivikinnerujussuat. Saarulliit Tasiilap eqqaani qaammatit sisamat tallimallu akornanni ukiumut takkusimaartarmata, aalisartut ukiup sinnerani allatigut isertitaqarniartariaqartarput.

- Tunitsiviup aallartinnera ingerlanerliulaarpoq, ulikkaartooqattaarlunilu qerigasuartitsivik ajoqattaarmat. Ingerlanerliuleraangat matoqqaqattaartarpoq, taava ilaatigut uninngaannartariaqartarluta aalisartussaagaluarluta, Enos oqaluttuarpoq.

Aalisartunngorlaanut aallartisarnissaq ajornakusoorfeqarpoq, aningaaseriviimmi umiatsiartaarnissamut imaaliallaannaq taarsigassarsititsineq ajorput. Enos nammineerluni umiatsiamik attartornermut akiliisarunnaarusulluni nammineq umiatsiartaarusukkaluarpoq.

- Siunissami suli angusarissaarnissara eqqarsaatigivara, aalisarnerup tungaatigut. Soorlu umiatsiartaarnissamik nutaamik, aamma anguniagaara nammineq initaarnissaq, Enos aalajangiusimarpalulluni oqarpoq.

Killeqanngitsumik aalisarneq

Nukappissat kondimik nillertumik kissinillu, ulloq taanna ulloqeqqasiutiminnik, tamussillattaapput. Saarulliit Tasiilap eqqaani aalisarfigisimasaminut allanut sanilliullugu anginerusut Enosip aalisaatini passutiutigalugu oqaluttuarpoq.

Tasiilami aalisakkanik tunitsiviup inuusuttunut aalisartunngorusuttunut qanoq isumaqartiginera illoqarfimmi inuussutissarsiortut ilaata sapaatip-akunnerata siuliani oqaatigaa. Inuusuttut Enositut, Barselajitut Eliaseritullu ittut matumani pineqarlutik. Inuusuttut kulturikkut illuata Igdlomeersut aalisarnermut ilinniarfiliorsinnaanissartik neriuutigaat. Illoqarfimmi inuussutissarsiornikkut periarfissat ajornakusoorneri eqqarsaatigigaanni tunitsiveqarnerup neriuuteqarfigineqarnera qaamaneqarneranik eqqaasitsivoq. Inuussutissarsiornikkummi siunnersuisoqatigiit borgmesteri Avaaraq Olsen peqatigalugu illoqarfimmi inuussutissarsiornermi atukkat ukiup uuma ingerlanerani isornartorsiornikuuaat.

- Iluaqaaq, siornatigorninngarniit annertunerusumik tunisisinnaavugut. Aamma aalisartut amerleriarnerat malunnarpoq, qujanarpoq aamma amerlasuunik aalisartoqartoq. Killilersorneqarata tunisisinnaalernikuuvugut, Enos oqarpoq.

Immap iimisaarnera malillugu umiatsiaaraq aalisakkallu aalapput. Enos inuttanilu aalisariarsimatillutik unnukkut arfineq-marlup missaani, aamma tunitsiviup matunerata nalaani Tasiilamut apuutereersimasarput. Ullumikkulli angerlajaassamaarput. Aalisarnermi saniatigut takornarianut angallassisarami utiaartariaqarpoq. Ulloq taanna saarulliit 444 kiilu tunivaat. Maani aalisartut aalisartuunermik saniatigut Enositulli piniartuupput. Aalisakkanilli tunitsiviup ammarnerata kingorna allanngortoqarnera maluginiarpaa.

- Siornamut utissagutta aalisartut piniartuunerupput, taava massakkut sunngiffimmi aalisartut piniartullu aamma tunisisinnaanngormata pitsaavoq, Enos taama oqarpoq, angorusutanilu tulleq ima oqaasertalerlugu.

- Nammineq umiatsiartaarnissannut januaarimi misiliiniarsariumaarpunga.

Enos malinnaaffigereeripput Tasiilami tunitsivik ruujorit ajoquteqarnerat peqqutigalugu matugallarneqarpoq. Tunitsiviup novembarip aallartinnerani ammaqqinnissaa naatsorsuutigineqarpoq.