Greenland Airportsimi siulersuisut taarserneqarput
Randi Vestergaard Evaldsen, Greenland Airportsimi siulersuisuni ilaasortaajunnaartoq, Naalakkersuisut qujaffigerusuppaat.
Tallimanngornermi Greenland Airports - Mittarfeqarfiit Nuummi Hotel Hans Egedemi ataatsimeersuarpoq. Naalakkersuisut sinnerlugit peqataapput Naalakkersuisut siulittaasuat Múte B. Egede (IA) aammalu attaveqaasersuutinut Naalakkersuisoq Hans Peter Poulsen (S).
Foto: Leiff Josefsen
Greenland Airports - Kalaallit Airportsiunikoq - tallimanngornermi ataatsimeersuarpoq, siulersuisunilu ilaasortat akornanni ataasiinnarmik Naalakkersuisut taarsiipput.
Randi V. Evaldsen, qinigaaqqinngitsoq, naalakkersuisunit qutsavigineqarpoq.
Annette Brøndholdt, ilaatigut SAS-imi pisortatut atorfeqarsimasoq, ilaasortanngortoq, ataatsimeersuarnermi Múte B. Egede oqaluttuarpoq:
- Siulersuisuni ilaasortartaaq, Annette Brøndholt, ingerlatseqatigiiffiup tigulluassagaa neriuppunga. Air Greenlandip siulersuisuini Annette siornatigut ilaasortaanikuuvoq.
- Taassuma saniatigut SAS-imi aqutsinermik tunuliaqutaqarpoq, ingerlatseqatigiiffinnilu niuernermik tunngaveqartuni anginerusuni siulersuisuni ilaasortaanermik misilittagaqarluarluni. Ingerlatseqatigiiffiup ineriartortinneqarnissaani Annette Brøndholtip tunniussilluarnissaa, Naalakkersuisut qilanaaraat.
Siulersuisunut ilaasortat qinigaaqqittut allat tassaapput Kjeld Zacho Jørgensen (siulittaasoq), Julia Pars aamma Niels Thomsen.
- Ilimagisamit niuernikkut ingerlatsineq pitsaanerusoq
Greenland Airports tassaavoq namminersorlutik oqartussat ingerlatseqatigiiffiutaat, taassumalu suliaasa ilagaat Nuummi, Ilulissani Qaqortumilu mittarfinnik sanaartortitsineq.
Mittarfissat naatsorsuutigisamit pitsaanerusumik iluanaaruteqartitsissapput, taamak naliliivoq Jens Lauridsen.
Leiff Josefsen
Pisortaq Jens Lauridsen ataatsimeersuarneq sioqqullugu ilisimatitsinermi erseqqissavoq, 2023-mi silaannakkut angallattut amerleriarnerisa aammalu siunissami qanoq inissisimasoqarnissaanik naatsorsuinerit ersersikkaat naatsorsuutigisamit pitsaanerusumik timmisartukkut angallannerit ineriartortut, Kalaallit Nunaannut aammalu Kalaallit Nunaanniit, taamaattoqarneralu Greenland Airportsip siunissaanik isumalluarnarnerulersitsivoq:
- Naatsorsuinerit nutaat – ilaatigut angallattut amerliartornissaannik tunngaveqartut – takutippaat Kalaallit Nunaanni timmisartoqarfinnik nutaanik sanaartorneq ingerlatsinerlu maannamut ilimagineqartuniit suli pitsaanerusumik niuernikkut ingerlatsiviusussatut isikkoqartoq.
- Timmisartoqarfiit naatsumik oqaatigalugu Kalaallit Nunaanni innuttaasunut aammalu inuiaqatigiinnut kalaallinut aammalu Kalaallit Nunaata aningaasaqarneranut suli annertunerusumik iluanaaruteqartitsissapput, Jens Lauridsen oqarpoq.
Taaguummik allannguineq akuerineqartoq
Greenland Airportsip pisortaa naapertorlugu timmisartuutileqatigiiffiit qanimut suleqatigineqarput taamatuttaq nunat tamalaat akornanni angalatitsiviutileqatigiit suleqatigineqarluarlutik Kalaallit Nunaannut aammalu Kalaallit Nunaanniiit silaannakkut angallannerup siunissaata ineriartortinneqarnerani.
Mittarfeqarfiit siorna Greenland Airportsip ataanut ingerlatsivittut inissinneqarpoq taamaaliornikkut anguniarneqarmat mittarfitsigut sullissiviit ingerlatseqatigiiffissuarmi ataatsimuulersinneqarnissaat.
Ataatsimeersuarnermi piginnittut sinnerlugit Naalakkersuisut siulittaasuat, Múte B. Egede (IA) akuersaarpoq, ingerlatseqatigiiffik Kalaallit Airportsimik taaguuteqarunnaarluni Greenland Airports - Mittarfeqarfiit A/S-mik taaguuteqartsinneqalissasoq.
- Mittarfeqarfiit aamma Kalaallit Airports-ip Greenland Airports – Mittarfeqarfiit ataanni ataatsimoortillugit aaqqissuussaanerit kattutsinneqarnerannut suliniuteqarneq ingerlallualeruttorpoq. Aamma periusissiamik ataatsimoorussamik nutaamik atuutsitsilerpugut aammalu takuneqarsinnaasumik ataatsimoortutut isikkoqartitsilerluta, Greenland Airportsimi pisortaaneq Jens Lauridsen oqarpoq.
