Ukiualuit
qaangiuppata Kujataani mittarfik nutaaq ammarpat, Icelandair nunanit
allaneersunit kisimiilluni toqqaannartumik timmisartuussisassaaq.
Icelandair
taamaalilluni Kujataani takornariaqarnermik ineriartortitsinermi qitiusumik
pingaarutilimmik suliaqartussanngussaaq, sumiiffiullu nittarsaanneqarnera
nukittorsarniarlugu timmisartuutileqatigiiffiup tuniniaasartuisa
ilisimasaminnik attaveqaatiminnillu ineriartortitsinissaat
pisariaqarluinnarpoq. Taama oqaluttuarpoq Innovation South Greenlandimi (ISG)
takornarialerinermilu pisortaq Sarah Woodall.
Ukiualuit
qaangiuppata Kujataani mittarfik nutaaq ammarpat, Icelandair nunanit
allaneersunit kisimiilluni toqqaannartumik timmisartuussisassaaq.
Icelandair
taamaalilluni Kujataani takornariaqarnermik ineriartortitsinermi qitiusumik
pingaarutilimmik suliaqartussanngussaaq, sumiiffiullu nittarsaanneqarnera
nukittorsarniarlugu timmisartuutileqatigiiffiup tuniniaasartuisa
ilisimasaminnik attaveqaatiminnillu ineriartortitsinissaat
pisariaqarluinnarpoq. Taama oqaluttuarpoq Innovation South Greenlandimi (ISG)
takornarialerinermilu pisortaq Sarah Woodall.
ISG Visit
Greenland peqatigalugu FAM-imik taaguutilimmik qanittukkut angalatitsivoq,
tassani Icelandairimi tuniniaasut tallimat Islandimiullu assiliisartup ataatsip
Kujataa angalaffigaat. Tassani takornarialerisut 18-it sumiiffinni
assigiinngitsuni arfineq-marlunni takornariartitsinermik misigisassanik
takutitsipput. Angalanerup Kujataani piujuartitsisumik takornariartitsinermik
ineriartortitsilluni tikikkuminassuseq, najukkami pigiliussat, ukiup ilaani
pisartunik ineriartortitsineq, neqeroorutigineqartunillu ineriartortitsineq
nunanullu allanut ussassaarineq tapersersorneqassallutik, takornarialerinermut
pisortaq oqarpoq.
Najukkami
takornarialerisut malunnaateqarluarput. Ukiut tallimat-arfinillit matuma
siornatigut Kujataani takornarialerisut ilisimaneqartut marluinnaagaluarput
pingasuinnaagaluarlutilluunniit. Maannakkut ilisimasakka naapertorlugit
Kujataani angallassisartut 60-ingajaat malunnaateqarluartut
ilisimaneqarluartullu tamaaniipput, Sarah Woodall oqarpoq.
Kujataa
takornariarfissatut
FAM-imi
angalaneq takornarialerisunut suleqatigisanullu aaqqissuussineruvoq, tamatumani
takornariartitsisartut tikitassanut angalasarlutik, angalanerminni
unnuisarfinni unnuisarlutik, takornariallu angalanerattut misigisaqartarlutik. Icelandairip
tuniniaasartuisa ilisimasatik nutaat atorlugit Kujataa takornariarfissatut
namminneq nittarsaassinerminni nittarsaatissavaat, takornariartitsisartunullu
allanut innersuussutigissallugu.
Icelandairip
angalatitsisuisa Kujataani inuit, inoroorsaarneq, angalatitsisut pinngortitarlu
alutornartoq pillugit misigisatik atorlugit Amerikap Avannaani, Europap
Kujataani, Skandinaviami, Hollandimi Asiamilu angalallutik suleqatiminnut
maanna ussassaarutigisinnaavaat.
- Timmisartuutileqatigiiffik
nunatta nunani tamalaani takornariartinneqarnissaanut siuttuusutut
akisussaaffimmik annertuumik Icelandairimut tunniussivugut, nunani allani
angalatitsisartunut suleqatiminnut Kujataa takornariarfissatut
ilisaritissinnaaqqullugu, Sarah Woodall oqarpoq.
Nuummi, Ilulissani Qaqortumilu mittarfiit
nutaat 2024-mi, 2025-mi 2026-milu atorneqalissapput.
Air
Greenlandip Nuummit-Narsarsuarmut aqqutikkut imaluunniit siunissami Nuummit
-Qaqortumut angallassisinnaanera soqutaanngitsutut isiginngilarput.
Tamakku
tamarmik pisariaqarput Kujataaniillu, Kujataanut Kujataanilu angallannermi iluaqutaassallutik,
Sarah Woodall oqarpoq.
”Ilippanaateqarluartoq”
Icelandairip
Visit Greenlandilu nittarsaassinermi suleqatigiinnertik siorna
nutarterpaat, Icelandairillu
timmisartuussisarneri aqqutigalugit Kalaallit Nunaat takornariarfissatut
nittarsaanniarlugu ineriartortinniarlugulu. Ukiuni marlunni nittarsaassinermi
suleqatigiinnermi ilaatigut FAM-imi angalanerit aqqutigalugit
soqutiginnilersitsiniaaneq pingaarnertut sammineqarpoq.
Icelandairip
Europami Amerikamilu Avannarlermi timmisartuussisarfiinit Keflavík aqqusaarlugu
Kalaallit Nunaannut timmisartuussineq ajornanngeqaaq. Kalaallit Nunaanni
mittarfiit alliartortillugit angalasut amerlanerusut misigisassarsiorlutik
angalanissaat nuannaarutigissavarput, Icelandairimi nunarsuaq tamakkerlugu
nittarsaassinermut pisortaq Gísli S. Brynjólfsson tusagassiorfimmut Arctic
Business Journalimut oqarpoq.
Kujataani takornarialerisut 18-it pisinnaasamik
takutinnissaannut neqeroorutigisinnaasaminnillu nittarsaassinissamut
periarfissaqarsimapput, Sarah Woodall oqaluttuarpoq, Icelandairimiillu
angalatitsiviit takornarialerisut Kalaallit Nunaannik suleqateqarnissaminnik
qanoq kissaatiginninnersut pillugit paasissutissillugit.
- Taakkua akeqanngitsumik paasitippaat nunanit
tamalaanit angalatitsisartunut qanoq pingaaruteqartigisoq nunaqavissumik
angalatitsisartoqarpat, angalanermut billetinik, unnuiffissanik misigisassanillu
aaqqissuussisinnaasumik pingaaruteqartoq. Taamaattoqartillugu sila pissutigalugu allatigulluunniit
ajornartorsiuteqalerpat eqqissisimanartinneqarnerusarpoq.
ISG-p, nunap immikkoortuani takornariaqarnermik
ingerlatsisutut, Kujataata nunap immikkoortuatut takornariaqarnermik
ineriartortitsinermik naapertuuttumik ineriartornissaa qulakkeertarpaa. Nunap
immikkoortuani takornariaqarnermik ineriartortitsinermut periusissiaq 2021-mit
2025-mut atuuppoq.
- Kujataani periarfissarpassuaqarpoq,
takornariaqarnerlu ukiuni tulliuttuni qanoq ineriartornersoq takussallugu
qilanaaraara, Sarah Woodall oqarpoq.
– Najukkami takornarialerisut malunnaateqarluarput. Ukiut tallimat-arfinillit matuma siornatigut Kujataani takornarialerisut marluinnaagaluarput pingasuinnaagaluarlutilluunniit. Kujataani maannakkut angallassisartut 60-it missaanniittut malunnaateqarluartut ilisimaneqarluartullu angallassisarput, Sarah Woodall oqarpoq, taanna Innovation South Greenlandimi takornarialerinermut pisortaavoq. Foto: Sarah Woodall - Innovation South Greenland
Sarah Woodall - Innovation South Greenland
